Ey Ukutond Ntakel ik?​—Bibil Ulondinap ik?

Kupwa kwa mbing jikemp jilondwilaku ej, kukwikal mavot mu jingand jivud pa mangand. Antu atongijokidin nakash pa antakel akutondau.

Bibil ulondinap ik?

Antakel achiwuntu akwet mimbu

Bibil ulejen mimbu yikwetau antakel awonsu achiwuntu.

• “Kangal wakumangen kudi antu in kutakel, mulong kwikil umwing ukutwisha kukupandish. Mulong pakufau akez kachirik kand ku divu. Mu dichuku dinidia kutenchik kwau kukez kapwa.”​—Kuseng 146:3, 4.

Ap antakel amekena mud atakedin nawamp nakash akez kafa niyau. Chikwau kand, kakwetap mutapu wa kusal anch yom yawonsu yiwamp yasalau yidandamen mu winyikel wa antu akuyiswinkana.​—Mulej 2:18, 19.

Uyakin ud anch, Bibil kalejenap ap pakemp anch antu ayitanga chakwel itakel ayinau.

• “Kwikil muntu ukutwisha kutakel mwom wend amwinend.”​—Jeremiy 10:23.

Ov, nlel kud muntu ukutwisha kwikal ntakel muwamp?

Ntakel witiyinay Nzamb

Bibil ulejen anch Nzamb watondin kal ntakel upandakena kuwap ni wakuchingejin: Yesu Kristu. (Kuseng 2:6) Yesu ndiy Mwant wa Want wa Nzamb, guvernema uyikedila kudiokal mwiur.​—Mateu 6:10.

Ov, ukutond winyikel wa Yesu? Bibil ulejen mulong wak chid cha usey kusal mwamu:

• “Zengamany, ni kusus mend ma mwan, [Yesu Kristu] palemp ukez kujiman, ukujirumukany mwi njil, mulong ujim wend kiukulabangip kwez. Ayuk kwau awiy akat kukungamen mwi Ndiy.”​—Kuseng 2:12, TMK.

Chinech chawiy chisu ufanyidina kukwat mupak. Uprofet wa Bibil umekeshin anch Yesu wasambisha kuyikel mu muvu wa 1914 ni anch piswimp ap Want wa Nzamb ukuswinkan pa mant mawonsu machiwuntu.​—Daniel 2:44.

Mulong wa kujingunin yom yivud piur pa mutapu ukutwisha kunung chikas ku winyikel wa Yesu, tang mutu wa mulong “Nung Chikas ku Want wa Nzamb Kusambish Kamu Katat!”