Mutapu ik Wadingay Yesu?
Chakul cha Bibil
Kwikil muntu wija kamu nawamp mutapu wadingay Yesu, mulong Bibil kalejenap mutapu wading chifu chend ap mujimbu wend. Chinech chimekeshin anch mutapu wading mujimbu wa Yesu udiap kwau wa usey. Pakwez Bibil utwinkishin yitongijok yimwing piur pa mutapu wadingay Yesu.
Chifu ni mujimbu: Yesu wading mwin Yuda ni chimeken kamu anch wayifana in Yuda, mud makwend. (Hebereu 7:14) Chimeken kamu anch chifu ni mujimbu wend yadingap kwau yishalijadina ni antu akwau. Dichuku dimwing wasala weny ku ujindj kudiokal ku Galaliya kushik ku Yerusalem pakad antu kumujingunin. (Yohan 7:10, 11) Ni chimeken anch ap pakach pa atwimbuy end kadingap kashalijadina nau nakash. Vurik anch pezau amasalay kumukwat Yesu katwishap kumujingunin, Yudas Isakariot ndiy wayilejay.—Mateu 26:47-49.
Kulep kwa nsuk: Chimeken anch Yesu kadingap ni nsuk jilemp, mulong Bibil ulondin anch “chidi chom cha usany kudi ikundj kulam nswish jilemp.”—1 Korint 11:14.
Wedj: Yesu wading ni wedj. Walondula chijil cha in Yuda, chading chiyijidikina amakundj ‘kukil nayimp kuns kwa wedj.’ (In Levi 19:27; Galatia 4:4) Chikwau kand, Bibil ulejen piur pa wedj wa Yesu mu uprofet wisambidina mar mend.—Isay 50:6.
Mujimbu: Yom yawonsu yimekeshin anch Yesu wading ikundj wa usu. Pa chisu cha mudimu wend, wendang akilometre avud nakash. (Mateu 9:35) Watokisha tempel wa in Yuda tupamp twaad, wadjibola matebur ma in kuswimpish nfalang, ni kapamp kamwing wasadina nfimbu mulong wa kuyopat annam mu tempel. (Luka 19:45, 46; Yohan 2:14, 15) Buku Cyclopedia McClintock ni Strong ulondin anch: “Nsangu jawonsu jidia mu ma Evanjil jimekeshin anch [Yesu] wading ni ukash wa mujimbu uwamp ni usu nakash.”—Volim wa IV, paj wa 884.
Mutapu wadingay ku mes: Yesu wading mwin chirungul ni mwin ranaken, ni chifu chend chamekeshang mwamu. (Mateu 11:28, 29) Antu a mitapu yawonsu amukimbang chakwel ayongoja ni kuyikwash. (Luka 5:12, 13; 7:37, 38) Ap an akemp iyovang nawamp nakash padingau nend.—Mateu 19:13-15; Marko 9:35-37.
Yitongijok ya makasu piur pa mutapu wadingay Yesu
Chitongijok cha makasu: Antu amwing alondining anch Yesu wading mwin Afrik mulong buku wa Kujingunik ufanakeshin nsuk jend ni ndand ni mend yend ni “utad wa bronze wa kwenguril.”—Kujingunik 1:14, 15.
Win yakin: Buku wa Kujingunik amulejen ‘mu yijingidij.’ (Kujingunik 1:1) Nsuk ni mend ya Yesu ayirumburil mu mutapu wa chifanakesh mulong wa kumekesh mikadil ya Yesu kupwa kwa divumbuk diend, kadiap mulong wa kumekesh mutapu wading mujimbu wend chisu chadingay panap pansh. Palondinay anch “nswich [ja Yesu] jading jitok too mudi unyevu utok, ap mudi ndand,” Kujingunik 1:14 usadidin ulombu mulong wa kufanakesh, kadiap mutapu wading nsuk. Chinech chimekeshin manangu mend kukwatijan ni uvud wa mivu yend. (Kujingunik 3:14) Verse winou kafanakeshinap mutapu wading nsuk ja Yesu ni ndand ap mutapu wading nsuk jend ni unyevu utok ap nej.
Mend ma Yesu yading “yilayin mudi utad wa bronze wa kwenguril.” (Kujingunik 1:15) Ni chifu chend “chading ni kuzut mudi muten wa pakach.” (Kujingunik 1:16) Mulong kwikiling antu akweting ulombu wa chikit ufanakena ni yom yiney, chishimushimu chinech chid cha chifanakesh, chimumekeshin Yesu wavumbulau mud muntu “ushicha mu chimunyik chakad muntu kutwish kusej piswimp.”—1 Timote 6:16.
Chitongijok cha makasu: Yesu wading uziyin.
Win yakin: Yisu yivud Yesu wasalang yom mud chifuvu. Chilakej, wimekesha pakad wom kud amasalay eza kumukwat. (Yohan 18:4-8) Yesu wafanyina kand kwikal ni usu nakash ku mujimbu, mulong wading nsong a mabay ni yom ya mudimu yasadinangay yadingap ya kasu ka nzembu.—Marko 6:3.
Chad, mulong wak Yesu wikala ni kuswir kwa ukwash mulong wa kusend mutond wa mar? Ni mulong wak wafa kurutu kwa antu akwau aad amujipau nend pamwing? (Luka 23:26; Yohan 19:31-33) Kurutu kwa Yesu kufa, mujimbu wend auzengola nakash. Kalalap uchuku wakabuj, diyingishin dimwing did anch mulong wiyakamisha nakash mu manangu. (Luka 22:42-44) Uchuku winiwa, in Yuda amuzengola nakash, ni pamanch in Rom amumesha niyau mar nakash. (Mateu 26:67, 68; Yohan 19:1-3) Chimeken anch yom yiney yasala anch afa pakad kulab.
Chitongijok cha makasu: Yisu yawonsu Yesu wading ni ushon.
Win yakin: Yesu wamekesha mu mutapu uwanyidina mikadil ya Tatukwend wa mwiur, Yehova, ulejenau mu Bibil anch ud ‘Nzamb wa musangar.’ (1 Timote 1:11; Yohan 14:9) Chakin kamu, Yesu wayifundisha antu akwau mutapu wa kwikal ni musangar. (Mateu 5:3-9; Luka 11:28) Yom yiney yimekeshin anch yisu yivud Yesu wading ni chifu cha musangar.