Chilakej cha mutapu ik uyishidina aney?
YITADINA ANVAJ
8 CHILAKEJ
KURUMBURIK
Anvaj adia chilakej chiwamp akat kusadin yom yifundishinau. Chilakej, ukutwishap kuchingej aney alonda uyakin anch wayilej dichuku dimwing kumwakul muntu wezina kukutal anch: “Mulejany anch nidiapaku.”
“Antu avud akat kulond anch: ‘Sal yinilondina, kangal kusal yinisadina.’ Mutapu winou wa kusal ukutwishap kuyikwash an. An ad mud shifon, akat kulam yom yawonsu tulondina ni tusadina, ni akutwish kutulej anch yom tusadina yikwatijadinap ni yom tuyifundishina.”—David.
MBIL YA BIBIL: “Ey ukata kurumburil mazu ma Nzamb anch: ‘Kichifanyidinap kwiy, ov, ey mulong wak ey amwiney ukat kwiy?”—Rom 2:21.
MULONG WAK CHID CHA USEY
An akemp ni ansand akweta mivu pakach pa 13 ni 19 akat kuyimburij anvajau nakash kusutamu muntu win mwawonsu—kusutamu kand ni arund nau. Chinech chimekeshin anch ey yeya muntu wa kusambish ufanyidina kuyitakel aney mwi njil yiwamp—ni ukutwish kusal mwamu ching anch wasadin niyey yom uyifundishina.
“Tukutwish kuchirikin chom chimwing tupamp chitot ni kwiyipul anch mwanetu uteshin, pakwez kapamp kamwing kwau anch tusadinap yom tulondina, ukutwish kutuvurish chom chinech. An akat kushinshikin chom chin chawonsu tusadina, ap anch etu tutongin anch kamenap kwau.”—Nicole.
MBIL YA BIBIL: “Manangu madiokila mwiur madi . . . makad kasolikany.”—Jakobu 3:17.
YOM UKUTWISHANYA KUSAL
Shinshikinany mbil jen ayinen. Mafilim ap mavideo ma mutapu ik ukata ey kutal? Mutapu ik ukata kumusadin mbay ney wa uruw ap aney? Arund a mutapu ik ukweta? Ov, ukat kuyibangin antu akwau? Mu wiswimp, ov, wuntu ukweta wawiy ukatina anch aney ikala nich?
“Am ni nfumwam tukatap kuyitekin anetu mbil jitwakad etu ayinetu kulimish.”—Christine.
Itany dilikishin anch warumbukangany. Anen ij anch udiany antu akad kuwanyin. Kulond kwau anch “nlikishinaku” pa chisu chiwanyidina—kud mbay ney wa uruw ap kud anen—kukutwish kuyifundish an anch udiany in kashinsh ni wikepishinany.
“Anetu afanyidin kwijik anch tukat kwitiyin kurumbuk kwetu ni afanyidin kutesh pitwitina dilikishin. Chamwamu, akusambish niyau kujindjik kurumbuk kwau.”—Robin.
“Etu anvaj, tukwet yibachikin yikash piur pa anetu ni chilakej chetu chawiy chikutwisha kuyikwash nakash mulong chawiy chimenau chisu chawonsu. Chid mud buku uding ching wa kuburil ni dilejan dilejinau chisu chawonsu.”—Wendell.