YOM UKUTWISHA KUSAL KATAT MULONG WA KURISH NI RUNENG

Anch wakimb yiyul piur pa mutapu wa kurish ni runeng, ukutan yitongijok yivud nakash—yimwing ya ukwash kusutamu yikwau. Mud mutapu twalondang kwinsambishin, chid mwamu pamwing ap mulong muntu ni muntu ukat kudil mu mutapu wend. Chom chikutwisha kwikal cha ukwash kud muntu umwing chikutwishap kamu kwikal cha ukwash kud mukwau.

Pakwez ap mwamu, kud yiyul yimwing ya pa dishin yayikwashina kal antu avud. Yiyul yiney akat kuyipan nakash kud in kuyulan piur pa milong ya chidil, ni yituvurishin mbil jakad kuswimpang jidia mu buku umwing mukur wa manangu nakash: Bibil.

1: ITIY UKWASH WA ANAMAKWEY NI WA ARUND NEY

• 

  In kwilej amwing amen anch chinech chid chom cha usey nakash mulong wa kurish nich runeng anch muntu wafish mukatish nend. Pakwez, yisu yimwing ukukat kwikal amwiney. Ukutwish ap kuyijimen antu asadina usu wa kukukwash. Chinech choviken kwau.

• Kangal wiyov anch ufanyidin ching kwikal chisu chawonsu ni antu akwau, pakwez kangal kand kuyipuk. Mu machuku ma kurutu ukutwish kwikal ni kuswir kwa ukwash wau. Yileja kwa matul yom ukweta nich kuswir katat ap yawakad kwikal nich kuswir.

• Kukwatijan ni maswir mey, ikal wisikena piur pa chisu usutishina ni antu akwau ni chisu ufanyidina kwikal amwiney.

MBIL: “Antu aad . . . amupandakenamu muntu umwing . . . Mulong anch umwing wawa, mukwau ukumulangwish.”—Mulej 4:9, 10.

2: SHINSHIKIN YAKUDIA YEY, NI ITEKINA CHISU CHA KWIJIDISH MUJIMBU

• Kushinshikin yakudia yey kukutwish kukukwash kurish nawamp ni runeng rey. Sal usu wa kudia mabuj kushalijan, yom ya mayij, ni yom yakad many nakash.

• Nang mem nakash ni yakuna yikwau yidia ya ukwash ku mujimbu.

• Anch wovilap ja kudia nakash, sal usu wa kudia yom yikemp yikemp pakwez mu yisu yivud. Ukutwish kand kumwit mwingang wey mavitamin makwau.a

• Kwendangan ni mitapu yikwau ya kwiyijidish yikutwish kukepish yovil yey yiyimp. Kwiyijidish kukutwish kukwinkish chisu cha kutongijokin pa mukatish ney wafang ap kukukwash kuvuramenaku yom yiney.

MBIL: “Kwikil muntu ukisina mujimbu wend amwinend, pakwez ukat kuudish ni kuulam nawamp.”—Efes 5:29.

3: LAL MU CHISU CHIWANYIDINA

• 

  Tul tuding twa usey kud antu awonsu, pakwez tud twa usey nakash kud antu akweta chidil, mulong chidil chikat kulet kuziy nakash.

• Babel kafe ni maar unila, mulong yom yiney yikutwish kukukangesh kulal nawamp.

MBIL: “Chidi chiwamp kwikal nich yom yikemp nich [kwiswedish], kupandakan kwiswidiosh nich midimu yikash yakad ukwash. Mwamu kudi kumulondul rinkind.”—Mulej 4:6.

4: IKAL WISIKENA

• 

  Ijik anch muntu ni muntu ukat kunenganan mu mutapu wend. Chawiy ufanyidin kujingunin mutapu wa kurish ni runeng ukwikala uwamp kud ey.

• Antu avud amen anch kuyilej antu akwau piur pa runeng rau kukat kuyikwash kurish nich nawamp, pakwez akwau kakatiningap kusal mwamu. In kwilej akwet yitongijok kushalijan piur pa usey wa kumulejamu muntu mukwau yovil yetu mulong wa kurish ni runeng. Anch ukwet kuswir kwa kumulejamu muntu mukwau yovil yey, pakwez widjidjekin kusal mwamu, ukutwish kuman anch chiswapel anch wasambish kumulejamu murund ney wa piswimp yom yikemp piur pa yovil yey.

• Antu amwing akat kuman anch kudil kukat kuyikwash kurish ni runeng, pakwez chimeken anch antu akwau akat kurish kwau nich nawamp ap anch kadidinap nakash.

MBIL: “Muchim wij kusansan kwau awinau.”—Jinswir 14:10.

5: IPUK YAKU YIKUTWISHA KUSHESH MUJIMBU WEY

• 

  Antu amwing afishina akat kupakish kukepish runeng rau mu kuna maar nakash ap yom yilewishena. Mutapu winou wa “kukepish” runeng ud uyimp nakash. Ap anch ukat kudutish runeng mu ka chisu kakemp, pakwez ukat kulet yibudikin yiyimp mu kusut kwa chisu. Kimb mitapu yiwamp ya kudutish yakamish yey.

MBIL: “Chifanyidin etu kwishitwish ku yom yawonsu yikata kuyipish mujimbu.”—2 Korint 7:1.

6: ITEKINA CHISU CHA KUSAL YOM YIKWAU

• Antu avud amen anch chid cha ukwash kusal yom yikwau yikutwisha kuyikwash kuvuramenaku rufu ra mukatish nau ni chinech chikat kuyikwash kukepish runeng rau.

• Ukutwish kwiyovaku nawamp anch wakasikesh urund wey ni antu akwau, wikal ni arund asu, wilej kusal yom yisu, ap wipuwangejaku.

• Mu kusut kwa chisu, chimeken kamu anch maswir mey makuswimp. Ukutwish kuman anch yisu ya kwiswedish yikwikal yilemp ni yikuvul—riner rid rizau riwamp mulong wa kuyerik.

MBIL: “Chom ni chom chikwet chisu chau, . . . Kudi chisu chimwing cha kudil, kudi chisu chikwau cha kusip. Kudi chisu chimwing cha kwov ushon, kudi chisu chikwau cha kuja maj.”—Mulej 3:1, 4.

7: IKAL NI PROGRAM MUWAMP

• 

  Anch chidil chapwa, ikasikesha kuchirikin yom wasalang pakur.

• Anch walimish chisu cha kulal, cha kusal mudimu, ni yom yikwau, ukwiyov kamu anch yom yasambish kal kuchirik mutapu uyading.

• Kudandamen kwikal ukwatikena mu kusal yom yiwamp kukutwish kukukwash kukepish yovil yey ya runeng.

MBIL: ‘Ndiy kakuvurikap kand kukep kwa machuku ma mwom wend, mulong Nzamb wakin umwinkishin ya kusal nich musangar wa muchim wend.’—Mulej 5:20.

8: LIK KUKWAT MIPAK YIJIM MAU MAU

• Antu avud anenganen mulong akwata mipak yijim mau mau kupwa kwa rufu ra mukatish nau.

• Anch chitwishikin, chingelaku chisu kanang kurutu kwa kushemunik, kuswimp mudimu, ap kurutu kwa kuman mutapu wa kusal yom yashangay mukatish ney.

MBIL: “Yitongijok ya mwin mushiku ya kusal yom, yishikin ku kupit, pakwez kudi ndiy ukusala swa, ukushik ku kuburen.”—Jinswir 21:5.

9: MUVURIKA MUKATISH NEY

• 

  Antu avud afishina akat kuman anch chid cha ukwash kusal yom yikutwisha kuyikwash kumuvurik mukatish nau wafila.

• Ukutwish kuman anch chongojin kukumangej yipich ap yom ya kumuvurikinaku, kufund jinsangu ap kand yom usotina kuvurik.

• Lam yom yikutwisha kukukwash kuvurik yisu yiwamp wasutishanya, ni ukutwish kuyital anch wiyov nawamp.

MBIL: “Vurikany machuku . . . ma pakur.”—Kuvurik Yijil 32:7.

10: LIK KUSAL YOM YIMWING PA YIMWING

• Anch chiswapel, budikaku uya ndond yindj.

• Anch ukwetap mutapu wa kuyaku mu weny, pamwing ap ukutwish kusend dichuku dimwing ap maad mulong wa kusal yom yikusangareshina mud kwisay, kuya kutalolaku ndond jiwamp, ap kwendanganaku ni nking, moto ap motak.

• Anch waswimpaku yom, ap mu chisu chikemp, chinech chikutwish kukukwash kurish ni runeng.

MBIL: “El tuyany kwi ndond ya ayinetu chakwel tukiswedishaku.”—Marko 6:31.

11: YIKWASHA ANTU AKWAU

• 

  Vurik anch chisu chin chawonsu ukusutisha mulong wa kuyikwash antu akwau chikutwish kukukwash ey kwiyov nawamp.

• Ukutwish kusambish mu kuyikwash antu anenganena niyau mulong wa rufu ra mukatish ney, mud anamakwey ap arund ney akweta kuswir kwa muntu ukutwisha kuyitesh nawamp.

• Kuyikwash ni kuyongoj antu akwau kukutwish kukukwash kwikal kand ni musangar mu mwom.

MBIL: “Chiyukish cha mwin kupan chipandakenamu cha mwin kutambul.”—Midimu 20:35.

12: SHINSHIKIN YOM UTEKINA PA NDOND YAKUSAMBISH

• Chidil chikutwish kumukwash muntu kwijik yom yidia kamu ya usey mu mwom.

• Sadin chisu chinech mulong wa kushinshikin yom usadina mu mwom wey.

• Anch chid cha usey, swimp yom utekina pa ndond yakusambish.

MBIL: “Chiwapil kuya mu chikumbu cha chidil kupandakan mu chikumbu cha musambu, chakwel antu aom avurik anch, rufu rutuchingedil etu awonsu.”—Mulej 7:2.

Mu win yakin, kwikil kamu chom chikutwisha kujimwangesh ushon wovila. Pakwez antu avud afishina kal akutwish kukulej anch kusadin yiyul mud yilejenau mu mutu wa mulong winou kwayikwasha kutan rongoj. Kud mitapu yikwau yivud ukutwisha kusadin mulong wa kukepish ap kudutish runeng rey. Pakwez anch wikasikesh kusadin yiyul yimwing twisambina kal ey, ukutwish kwiyovaku nawamp.