Yik Yitiyijinau Atuman’a Yehova?

“Pakwez etu tusotil kutesh muukata kutong ey; pakwez ya mulong winou chijiken kal kwau anch akat kukuupipej mitambu yawonsu.” (Midimu 28:22) Antakel a chisak inang mu Rome wa mu mivu chitot ya kusambish asha chilikej chiwamp. Asota kwiteshil ku musul, chinyim cha kutesh kusu kuchiril kwa antu indjing.

Chilik chimwing, Atuman’a Yehova nlel akat kuyipipej, ni chikwikal chilim kuchingel kwilej uyakin piur pau kudiok ku misul ya kasolikany. Chawiy tusangerin kukurumburil ey yimwing ya yitiyij yetu ya dishin.

Baibel, Yesu Kristu, ni Nzamb

Twitiyijin anch “Mufund wawonsu udi upepidilau kud Nzamb ni ukwashila.” (2 Timoteu 3:​16, New World Translation) Ni ap nchik akwau eza kulondang anch tudap chakin kamu Akristu, chinech chidap kwau chakin. Twitiyidin sens patok uman wa mupostol Pita utadina Yesu Kristu: “Kwikil kand dijin dikwau mwishin mwa diur dipanyinau pakach pa antu mutukwipandishila etu.”—Midimu 4:12.

Pakwez, mulong Yesu walonda anch udi “Mwan a Nzamb” ni anch “Tatuku mwom chantumay am,” Atuman’a Yehova itiyijin anch Nzamb upandikenimu Yesu kujimb. (Yohan 10:36; 6:57) Yesu amwinend witiyija anch: “Tatuku wimpandikenumu am.” (Yohan 14:28; 8:28) Chad lel, kitukatap kwitiyij anch Yesu udi wisikena ni Tatuku, mud mulondila mafundish ma Usatu. Chinyim, twitiyijin anch amutanga kuday Nzamb ni udi mwishin Mwend.—Kolosai 1:15; 1 Korint 11:3.

Dijin dia Nzamb didi Yehova. Baibel ulondil anch: “Ijika anch, Yey kamu ukweta dijin dia Yehova, udi upandikena kuzambuk piur pa divu diawonsu.” (Kuseng 83:18, Mukanda Usandu wa Zambi Chokwe) Kulondulijan ni dizu dined, Yesu wateka dinans (dishinshik) dijim piur pa dijin dia Nzamb, kufundishang in kumulondul end kulembil: “Tatukwetu udia mwiur, dijin diey aditumbish.” Ni ndiy amwinend walembila kud Nzamb anch: “Namekesh kal dijin diey kud antu wangikisha.”—Mateu 6:9; Yohan 17:6.

Atuman’a Yehova itiyijin anch afanyidin kumwilikej Yesu mu kwijikishang dijin dia Nzamb ni jitong jend kud akwau. Komb tweza kutond dijin Atuman’a Yehova mulong tumwilikejin Yesu, “Kaman ushinshamena.” (Kuburik 1:5; 3:14) Chiwapidila, Isaya 43:​10, (NW) ulondil kud aruu a Nzamb anch: “ ‘Udiany atuman am,’ kulond kwa Yehova, ‘ap kashalapol wam natonda.’”

Want wa Nzamb

Yesu wafundisha in kumulondul end kulembil, “Want wey weza,” ni wasadina Want win-wa kwikal mutu wa mulong ujim wa mafundish mend. (Mateu 6:10; Luka 4:43) Atuman’a Yehova itiyijin anch Want udi guvernement wa kashinsh kudiok mwiur, ukeza kayikel piur pa divu diawonsu, ni anch Yesu Kristu udi Mwant wayikejau wau wakadinga kumekan. “Guvernement ukez kikal piur pa chikij chend,” mulondilay Baibel. “Ku kuvul kwa guvernement wend ni ku chisambu kukez kikalap nsudiel.”—Isaya 9:6, 7, King James Version.

Pakwez, Yesu Kristu kakez kikalap kusu mwant amwinend wa guvernement wa Nzamb. Ukez kikal ni anyikel nend mwiur. “Ang twisum,” mwafunday mupostol Paul, “tukez kaswan kand nend.” (2 Timoteu 2:12) Baibel ulejen anch anaantu inang avumbwilau mulong wa kuyikel nend Kristu mwiur adi ilikena “katikit ni tutu tunying ni tunan tunying [144 000] awiy kamu inang atondinau kal kuyidiosh pansh.”—Kuburik 14:1, 3.

Chakin, guvernement ap wisu ufanyidin kwikal ni anangand, nau Atuman’a Yehova itiyijin anch tutikit twa antu akwau pamwing ni anyikel inang a mwiur akez katambul mwom wa chikupu. Kwipwishil kamu divu, dikarumwinau kwikal paradis muwamp kusut, akez kadizwish sens anangand inay afanyidina a Want wa Nzamb, awonsu in kuziyil winyikel wa Kristu ni anyikel nend. Komb Atuman’a Yehova itiyijin ni muchim umwing anch divu kakez kadisheshap ap pakemp ni anch kushilimu kwa Baibel kukez kashiken: “Mwin kutentam ukez kaswan ngand, ukez kashakamimu chikupu.”—Kuseng 37:29; 104:5.

Pakwez mutapu ik ukeza kwez Want wa Nzamb? Ov chidi kusutin kuziyilang kwa kwikatin kwa antu awonsu winyikel wa Nzamb? Chinyim nich, Baibel umekeshin yom mud muyidia anch kwezang kwa Want kwitin Nzamb kwandamin mu milong ya divu: “Nzamb wa mwiur ukez kimik want winiwa kakezap ap pakemp kuulet ku kujiy. Ni want iwinau . . . ukez kapuchol ni kutek nsudiel ku mant mawonsu minam, nau iwinau ukez kiman djat ku yisu yakad kuchindik.”—Daniel 2:​44, NW.

Chisu ik Want wa Nzamb ukeza kez? Piur pa mauprofet ma Baibel madia kushikenang katat, Atuman’a Yehova itiyijin anch ukez kez mu chisu chikemp kamu. Tukwitin ey kushinshikin mauprofet mamwing matakela kulejanang yijingidij ya “machuku ma nsudiel” ma ditenchik dined diyimp dia yom. Amafundin mu Mateu 24:3-14; Luka 21:7-13, 25-31; ni 2 Timoteu 3:1-5.

Mulong ‘tumukatin [Yehova] Nzamb wetu nich muchim wetu wawonsu, mupim, manangu, ni usu ni mukwetu mudi ayinetu,’ kitudap aurikina mulong wa wanangand, ulomb wa chikit, ni mashakamin. (Mako 12:30, 31) Twijiken nakash mulong wa rukat ritukatijadina mukach mwa akadivar Akristu a michid yawonsu. (Yohan 13:35; 1 Yohan 3:10-12) Chawiy tulamining kuburen kwikalimu mu milong ya politik ya mangand ya michid yin-ya. Tukat kupim kwikal mud in kwilej a Yesu a budid, alondinay anch: “Kadip a mangand, mudi kand am kinidip wa mangand.” (Yohan 17:16) Twitiyijin anch kwikal akadinga ku mutambu wa mangand kurumburikin kulik ngikadil wijondila wijikena nakash nlel, kuchindinimu kudimbanang, kwiyang, kusotan, makaj, utum, kusadil kuyimp kwa mash, difukwil akish, ni yom yikwau yikandila Baibel.​—1 Korint 6:9-11; Efesus 5:3-5; Midimu 15:28, 29.

Ruchingej ra Kurutu

Atuman’a Yehova itiyijin anch yawonsu kiyimanyidinap kusu piur pa mwom udaku katat. Twitiyijin anch Yehova watuma Kristu pa divu kwichil mash ma mwom mend mud difut chakwel anaantu akutwish kwikal ni kwimanang kutentamina kurutu kwa Nzamb ni kutambul mwom wa chikupu mu ditenchik disu dia yom. Mud mwalonday mupostol umwing wa Yesu anch: “Twayingil kal ku mash mend.” (Rome 5:9; Mateu 20:28) Atuman’a Yehova adi akweta kujikitish kumwing kujim kud Nzamb ni Mwanend mulong wa didimukin dia difut ditwishishina mwom wa kurutu.

Atuman’a Yehova akwet ruchingej ra kabuj mu mwom wa kurutu, utekidina dishin pa disanguk dia afu mwishin mwa Want wa Nzamb. Twitiyijin mudi mufundishina Baibel, anch pakufangay muntu ukat kwikaliku kwend kukat kupwa chakin, chad lel “ni pa dichuku dined kamu manangu mau makupwa.” (Kuseng 146:3, 4; Ezekiel 18:​4, NW; Ecclesiaste 9:⁠5, NW) Inge, mwom wa kurutu wa afu utekidin dishin pa Nzamb kuvurik antu inay mu disanguk.—Yohan 5:28, 29.

Pakwez, Atuman’a Yehova itiyijin nich kashinsh kawonsu anch avud achidia aom katat akez kasut aom Want wa Nzamb piukez kajiyish maguvernement mawonsu madap katat ni, mud Noa ni dijuku diend chasutau aom ku mabeb, akez kashakam ni kusangarin mwom chikupu pa divu ditokishinau. (Mateu 24:36-39; 2 Pita 3:5-7, 13) Chad twitiyidin anch kusut aom kwinoku kulamatidin piur pa kulamang yitinay Yehova, mud mulondila Baibel anch: “Mangand makat kusutang . . . , pakwez ndiy ukata kusal rusot ra Nzamb ushich chikupu.”—1 Yohan 2:​17, NW; Kuseng 37:11; Kuburik 7:9, 13-15; 21:1-5.

Choviken, chitwishikinap kupan pinap yitiyij yawonsu ya Atuman’a Yehova, pakwez tukwitin kutambul jinsangu jivud piur pau.

[Caption on page 6]

Ching anch ayilejen, mifund ya Baibel yidiamu yidiokil mu Mukand wa Nzamb wa Uruund.