Sangarin Mwom Wa Dijuku
Ov majuku makusangar chakin?
Chitwishikin nchik?
Sangarin Mwom wa Dijuku
Ov wijaku majuku mamwing madia mu uumwing ni musangar mutapu umena mu trakt winou? Majuku ndond yin yawonsu mashikedining kuwupuk. Kulikijan, kuburenang mudimu wa kashinsh, matat ma nvaj ipend (wilidila aan amwinend), milawu—yawonsu yiney yikat kuwejiniku twinvundangesh. Ngang-a-mwom wa dijuku umwing winana anch: “Katat, yawonsu yalondangau piur pa kufa kwa dijuku yijiken kud muntu ni muntu.”
Mulong wak nlel majuku madi masidinau matat malimina mudi minam? Tukutwish nchik kusangarin mwom wa dijuku?
Mutapu Wasambisha Dijuku
Chakwel kwakul yipul yiney, tuswiridin kwijik disambishil dia uruu ni dia dijuku. Mulong ang yiney yikwet Sakasambish—Sakatang—yid ya dijuku yifanyidin kutal kuday ndiy mulong wa wintakel, pakwijikang anch ndiy ukutwish chakin chakin konganyin nawamp kusut mutapu tukutwisha kusangarin sens mwom wa dijuku.
Chishimokishina, avud itiyijin anch dirijek dia dijuku dikwetap Sakatang. Encyclopedia Americana ulondil anch: “Angang-a-mikand kanang engamidin kulejan disambishil dia uruu kudiokal ku marijek ma annam kusot kwikal aad aad kwinyim kwa muntu.” Ap mwamu, Yesu Kristu walondila ya kutang kw’ikundj ni mband. Wachirikina mud mazu ma mwin usu rusangu ra pa budid ra Baibel ni kulond anch: “Chawiy chabombekeshay kal Nzamb pikil muntu wachauril.”—Mateu 19:4-6.
Yesu Kristu uyingin. Nzamb mwin manangu wayitanga anaantu aad a kusambish ni wayitenchikina mwom wa dijuku wa musangar. Nzamb wayachikisha antu aad a kusambish pamwing mu uruu ni walonda anch ikundj “ufanyidin kulamat kudiay mukajend, ni awiy aad akwikal mujimbu umwing.” (Disambishil 2:22-24) Ov chikutwish kwikal, chad lel, anch matat ma dijuku milel madiokiling ku kulondulang milad ya mwom yakadinga kulimish yany yatekay Sakatang mu Dizu diend, Baibel?
Yisu Njil ya Kusangarin?
Mud muwija nawamp, mangand ma katat makasikeshidin antu kwitongang ayinau ni ku kwisadilang yawonsu ayinau. “Ris ridi riwamp,” mwamu mwayilejay mwin kwisak umwing asand a kalas ka nsudiel ka kolej mu États-Unis. “Ukutwish kwikal mwin ris ni kudandamen kand kwiyov nawamp amwiney.” Pakwez kusurubang rupit ra mujimbu kushikijinap ku musangar. Rukat ra rupit, chakin, ridi rijim nakash ra yom ya ubaj piur pa mwom wa dijuku mulong rikat kwandamin mwi njil ya urund wa ukauntu ni kushadishin antu chisu ni nfalang. Chinyim nich, shinshikin kusu mutapu jitukwashina etu jinswir jaad kusu ja Baibel kuman yidia ya usey ku musangar..
“Chisutin kuwap kudia mayij pamwing ni antu ukatina piur pa kudia mbij jiwamp nakash kwi ndond kudiaku rukis.”
“Chisutin kuwap kudia chikunku cha dibot chiumina piur pa kwikal nich musambu mu chikumbu chizwila sens ni kanvundangesh.” Jinswir 15:17; 17:1, “Today’s English Version.”
Jikash, ov kimwauyap? Tongijokinap bil mutapu mangand melanga kushaljan ang dijuku ni dijuku dialamatina yom yiney ya kusambish! Baibel udimukidin wintakel piur pa yid ya dijuku yifanyidina kusadil muntu ni muntu nend. Talap bil yikemp ya yiyul yipaninay.
Amakundj: ‘Mukata[nga, NW] mukajey mud mujimbu wey amwiney.’—Efesus 5:28-30.
Chipipela, pakwez cha kusalik nakash! Baibel umwedil kand ikundj ‘Apana kud mukajend kalimish.’ (1 Pita 3:7) Ukuchisal mu kumulamang kwa pa kampwil, kuchindinimu ni riy, kuteshang, ni kumukasikeshang. Ufanyidin kand kuman yitongijok yend mud ya usey ni kumuteshang. (Isikej Disambishil 21:12.) Ov witiyidinap anch dijuku ap disu dikez kayuk ang ikundj umusadidil mukajend nich kumutongijokinang, mud mukusotay amwinend amusadila?—Mateu 7:12.
Amband: “Amulimisha mfumwend.”—Efesus 5:33.
Mband uwejin musangar wa dijuku diend mu kukwashang mfumwend kwizwish yisend yend yilimina. Chawiy chinech chom chatonginay Nzamb, pamudimukinay ikundj mband kwikal “mukwash wend, mud chakumuwanish chend ndiy.” (Disambishil 2:18, NW) Ov ukutwish kutongijokin chiyukish ku mwom wa dijuku chisu chikulimishay mband mfumwend mu kumusendishang yiyul yend ni kusadilang pamwing nend kuwanish ntong ja dijuku?
Angatan ni Angachik: “Amakundj nau amband afanyidin kwikal ashinshamena umwing kud mukwau.”—Hebreu 13:4, TEV.
Pakatau kwishinshamen, mwom wa dijuku uding wa kwisakin chakin. Yisu yivud makaj makat kujipang dijuku. (Jinswir 6:27-29, 32) Chad lel, Baibel upanin chiyul cha manangu: “Sanger pamwing ni mukajey ni man musangar pamwing ni changadim ey wata . . . Mulong wak ufanyidina ey kupan rukat rey kuday mband mukwau?”—Jinswir 5:18-20, TEV.
Anvaj: “[Afumbilany aanen] mwi njil yiwapidil[au] kuya.”—Jinswir 22:6.
Pakatau anvaj kutal ni kusutish chisu pamwing ni aanau, mwom wa dijuku ukat kuwap. Chad lel, Baibel uswakejin anvaj kufundish aanau mbil jitentamina ‘chisu chashichau mu chikumbu chau ni chisu chikatau kwend mwi njil ni chisu cha kulal ni chisu chikulankau.’ (Kusutirik 11:19, NW) Baibel ulondil kand anch anvaj afanyidin kumekesh anch ayikatin aanau mu kuyipupang.—Efesus 6:4.
Aan: “En aan, ziyilany anvaj en mu Mwant.”—Efesus 6:1.
Chakin, mu mangand minam maburedina yijil, chiswakelap machuku mawonsu kuziyil kudau anvaj en. Ap mwamu, ov umenanyip anch chidi cha manangu kusal yitulejinay Sakasambish wa dijuku? Wonganyidin nawamp yisutila kuwap ya kusadil mwom wetu wa dijuku wikala wa musangar. Chawiy lel sal usu wey wawonsu chakwel uziyilang anvaj en. Ikalany ajijamena kudjibwil kulemp yoziu ya mangand ya kusal yiyimp.—Jinswir 1:10-19.
Mu chilik chikusadila chid ni chid wa dijuku chiyul cha Baibel, mwom wa dijuku ukez kisakin. Kadap kusu anch dijuku dikez kasangarin mwom uwamp kupandikan katat pakwez dikez kwikal ni ruchingej ruwamp ra kurutu mwi ngand yisu yishilamishilay Nzamb. (2 Pita 3:13; Kuburik 21:3, 4) Chawiy chisalany chikala chaku cha dijuku kwilejang Baibel pamwing! Mamiliyon ma majuku kunyingumuk mangand mawonsu mamening usey wa chiyul chipaninau mu buku muwamp utazukinau Le secret du bonheur familial.
[Caption on page 6]
Ching anch ayilejen, mifund ya Baibel yidiamu yidiokil mu Mukand wa Nzamb wa Uruund.