Dilejan dia 8
Kushakam mu Dijuku Kukumusangaresha Nzamb
Yisu ndond y’ikundj mu dijuku? (1)
Ikundj ufanyidin kumusadin mukajend nchik? (2)
Tatuku ufanyidin kwikal ni yisend yisu? (3)
Mudimu wa mband udi wisu mu dijuku? (4)
Yehova witin yom ik kud anvaj ni kud aan? (5)
Baibel umen nchik kwaurik ni kulikijan? (6, 7)
1. Baibel ulondin anch ikundj ndiy mutu wa dijuku diend. (1 Korint 11:3) Ikundj ufanyidin kwikal ni mband umwing kusu. Afanyidin kwatijan chifanyidina ku mes ma yijil [ya Leta].—1 Timoteu 3:2; Titus 3:1.
2. Ikundj ufanyidin kumukat mukajend mud mwikatinay amwinend. Ufanyidin kumusadin mutapu Yesu ukatay kusadin in kumulondul end. (Efesus 5:25, 28, 29, NW) Kafanyidinap ap kamwing kumubul mukajend ap kumuzengol mwi njil ap yimwing. Chinyim, ufanyidin kumwinkish katumb ni kalimish.— Kolosai 3:19; 1 Pita 3:7.
3. Tatuku ufanyidin kusal mudimu nakash alama dijuku diend. Ufanyidin kulet yakudia, yidjal, ni pa kulal mulong wa mukajend ni aanend. Tatuku ufanyidin kand kuwanishin in dijuku diend yom ya muspiritu. (1 Timoteu 5:8) Ukat kutakel mu kukwashang dijuku diend kwilej piur pa Nzamb ni jintong Jend.—Kuvurik Yijil 6:4-9, NW; Efesus 6:4.
4. Mband ufanyidin kwikal mukwash muwamp wa mfumwend. (Disambishil 2:18) Ukutwish kumukwash mfumwend kufundishang ni kufumbang aanawu (Jinswir 1:8) Yehova witin mband kulam dijuku diend ni rukat. (Jinswir 31:10, 15, 26, 27; Titus 2:4, 5) Ufanyidin kwikal ni kalimish kakurikina kudiay mfumwend.—Efesus 5:22, 23, 33, NW.
5. Nzamb witin aan alimishang anvajawu. (Efesus 6:1-3) Uchingedil anvaj afumba ni kukand aanawu. Anvaj aswiridin kusutish chisu pamwing ni aanawu ni kwilej nau Baibel, kuwanishang nswir jau ja muspiritu ni yovil [ya muchim]. (Kuvurik Yijil 11:18, 19, NW; Jinswir 22:6, 15) Anvaj kafanyidinap ap kamwing kupup mu mutapu wa kuswej ap chisum.—Kolosai 3:21.
6. Anch ikundj ni mband aburedin kwovijan, afanyidin kupim kusadil chiyul cha Baibel. Baibel utuswakejin kumekesh rukat ni kwikal in kulikishinang. (Kolosai 3:12-14) Dizu dia Nzamb dikasikeshidinap kwaurik mud njil ya kupwishil matat makemp. Pakwez mband ukwel kutond kwaurik ni mfumwend ang (1) ikundj ulikin ni muchim uyimp kudish dijuku diend, (2) udi mwin ubaj mutapu wa mband kushakam ni mwom wend ukutwish kusheshik, ap (3) rupompat rend rijim nakash rikusalang anch amukangesh kumwifukwil Yehova.—1 Korint 7:12, 13.
7. Ambay mu uruu afanyidin kushinshaman umwing kud mukwau. Makaj madi kumusadil Nzamb ni mbay’a muntu chitil. (Hebreu 13:4) Kulalijan pol pa uruu kwawiy dishin Dimwing kusu dia Mifund mulong wa Kulikijan kukutwishishang kwatan ap kwachik kand. (Mateu 19:6-9; Rome 7:2, 3) Yehova ukisin anch antu alikijan pakaad dishin dia Mifund ni kwatan ap kwachik ni muntu mukwau.—Malaki 2:14-16, NW.
[Captions on page 17]
Nzamb uchingejin anvaj afumb ni kukand aanawu
Tatuku wa rukat ukat kudish dijuku diend ku mujimbu ni muspiritu