Mutapu ik Ukutwisha Dijuku Diey Kwikal ni Musangar?​—Chikunku cha 1

Antu adiokidinap pa kwatijan achingejining anch musangar ukwetingau pa dichuku diau dia uruw udandamen chikupu. Ni chitwishikin. In Kristu akweta mivu yivud mu uruw ni ikasikeshina kusadin mbil ja Bibil ij anch chitwishidikin.

1. Yiyul ik yipaninay Bibil kud angatan?

Yehova wamwinkishin kal ikundj chisend cha kutakel dijuku. (Tang Efes 5:23.) Uchingejin anch akwata mipak yiwamp yikutwisha kukwash dijuku diend. Bibil uyiyudin angatan anch: ‘Dandamenany kuyikat akajen.’ (Efes 5:25) Chirumburikin ik? Ikundj umukatina mukajend ukat kumumekeshin rukat, ikala kwol kwau ap padiau ni antu akwau. Ukat kumuchidij, kumukwash kwikal ni musangar ni kumuwanyishin maswir mend. (1 Timote 5:8) Cha usey nakash, ukat kumuwanyishin maswir ma mu spiritu. (Mateu 4:4) Chilakej, ukutwish kulembil ni kutang Bibil pamwing ni mukajend. Anch ikundj wamubangin mukajend nich rukat, ukat kulam urund wend ni Yehova.​—Tang 1 Pita 3:7.

2. Yiyul ik yipaninay Bibil kud amband?

Dizu dia Nzamb dilondin anch: “Chifanyidin niyend ngachik mwawonsu kumulimish nfumwend.” (Efes 5:33) Mutapu ik ukutwishay kusal mwamu? Ufanyidin kutongijokin pa mikadil yiwamp ya nfumwend ni usu usadinay mulong wa kumulam ndiy ni anau. Ukutwish kand kumulimish nfumwend kusutil kunung chikas ku mipak yikwatinay, kwambamb nend nawamp ni kulond yom yiwamp piur pend ap anch kadiap Kaman.

3. Mutapu ik ukutwishau ambay a uruw kukasikesh uruw wau?

Bibil ulondin piur pa ambay a uruw anch: “Awiy aad akwikal mujimbu umwing.” (Mateu 19:5) Chinech chirumburikin anch afanyidin kusal usu nakash chakwel kangal chom ap chimwing chayauril. Akutwish kusal mwamu kusutil kwikal ni chaku cha kusutishang chisu pamwing ni kulejijan patok, mu mutapu wa rukat yitongijok ni yovil yau. Kafanyidinap kulikidin chom ap muntu win mwawonsu​—kumudioshaku Yehova​—ikala wa usey nakash kusutamu mbay nend wa uruw. Ikundj ap mband ufanyidin kubabal nakash chakwel kangal wakudish urund wa piswimp nakash ni muntu wakad kwikal mbay nend wa uruw.

ILEJA CHIKURIKINA

4. Ikundj​—mukata ni mubangina mukajey

VIDEO: Ikundj, Mukata Mukajey Mud Muwikatina Amwiney (9:53)

• Mu mitapu ik mukutwishay ikundj kumekesh anch umukatin mukajend ni umubangidin?

Tang Kolosay 3:12, kupwa isambinany chipul ech:

• Mutapu ik ukutwishay ikundj kumekesh mikadil yiney mu uruw wend?

5. Mband​—mukata nfumwey ni mulimisha

Bibil umukasikeshin mband kumulimish nfumwend ap anch kamusadidinap Yehova. Tang 1 Pita 3:1, 2, kupwa isambinany yipul ey:

• Anch nfumwey kadiap Kaman, chakin kamu ukatin anch niyend amwifukwila Yehova. Ov, utongin anch yom ik yidia yiwamp nakash​—kumulej chisu chawonsu yilondinay Bibil, anch kumekesh mikadil yiwamp ni kumulimish? Mulong wak?

Ikundj ni mband akutwish kukwat mipak yiwamp anch ayisambin pamwing. Pakwez, yisu yimwing mipak ya ikundj yikutwishap kumusangaresh mband. Anch yashiken mwamu, mband ufanyidin kumulej nfumwend yom yitonginay kwa matul nich kalimish, pakwez ufanyidin kuvurik anch Yehova wamwinkishin kal ikundj chisend cha kukwat mipak yimenay anch yikutwish kukwash dijuku. Ufanyidin kusal usu wa kunung chikas ku mipak ya nfumwend. Anch wasal mwamu, ukuletish musangar mu dijuku diau. Tang 1 Pita 3:3-5, kupwa isambinany chipul ech:

• Mutapu ik ukatay kwiyov Yehova anch mband wamulimish nfumwend?

6. Ukutwish kupandakan milong mu uruw wey

VIDEO: Mutapu wa Kukasikesh Moj wa Uruw (5:44)

• Mu video winou, yom ik yimekeshina anch ambay a uruw inay ad asambish kal kwaurik?

• Yom ik yasalangau mulong wa kukasikesh kand uruw wau?

Tang 1 Korint 10:24 ni Kolosay 3:13. Kupwa kwa kutang mukand ni mukand, isambinany chipul ech:

• Kusadin chiyul chinech kukutwish mutapu ik kukasikesh uruw?

Bibil ulondin anch tufanyidin kulimishijan umwing ni mukwau. Kumulimish muntu kurumburikin kand kumumekeshin rukat mu yom tusadina. Tang Rom 12:10, kupwa isambinany yipul ey:

• Ov, ikundj ap mband ufanyidin kuchingel anch mukwau amulimish bil ndiy? Mulong wak?

YOM TWILEJA KAL

Ikundj ni mband akutwish kwikal ni musangar anch akatijan, alimishijan umwing ni mukwau ni anch asadin mbil ja Bibil.

Ov, uvurikin?

• Mutapu ik ukutwishay ikundj kuvudish musangar mu uruw wend?

• Mutapu ik ukutwishay mband kuvudish musangar mu uruw wend?

• Anch ud mu uruw, mbil ik ja Bibil jikutwisha kukukwash kukasikesh uruw wey?

JINGUNIN KAND

Jingunin yiyul yikutwisha kukukwash kwikal ni musangar mu dijuku.

Dijuku Diey Dikutwish Kwikal Nich Musangar (broshir)

Tal video umekeshina yiyukish ya kusadin yiyul ya Nzamb mu uruw.

Nikukatin Nakash (4:26)

Tal chirumburikina kuziyin wintakel wa ikundj.

“Amband, Mulong Wak Kuziyil ku Umutu?” (Chinong cha Kalam cha 1 Ngond wa 5, 2010)

Tal mutapu ukutwisha mbil ja Bibil kuyikwash ambay a uruw.

Bibil Wapandisha Uruw Wetu (7:12)