Dilejan dia 9

Atushalapol a Nzamb Ikala Ishitwila

Mulong wak tufanyidin kwikal ishitwila mwi njil ni njil? (1)

Kurumburikin ik kwikal ishitwila mu spiritu? (2)

mwi ngikadil? (3) mu manangu (4) mu mujimbu? (5)

Mitapu yisu ya mambamb mijondila tufanyidina kwipuk? (6)

1. Yehova Nzamb udi wishitwila ni utumbila. Uchingedin in kumwifukwil’end ikala ishitwila​—⁠mu spiritu, ngikadil, manangu, ni mujimbu. (1 Pita 1:16) Yitin usu wakin kushakam ishitwila ku mes ma Nzamb. Tushich mu mangand mijondila. Etu n’etu tukwet kadiomb ka kutwil yaku ya kusal nayimp. Pakwez kitufanyidinap kuziyil.

2. Kwishitul kwa Muspiritu: Ang tusotin kumusadil Yehova, tufanyidinap kudandamen kulondul ap dimwing dia malejan ap yashankuru ya relijon wa makasu. Tufanyidin kudiokal mu relijon wa makasu ni kulik kumukwash mwi njil ap yimwing. (2 Korint 6:​14-18; Kuburik 18:⁠4) Kapamp kamu tukwileja uyakin piur pa Nzamb, tufanyidin kwilam chakwel pikil atushadish kud antu akata kulejan umakasu.​—⁠2 Yohan 10, 11.

3. Kwishitul kwa mwi Ngikadil: Yehova usotin in kumwifukwil end ashakama nawamp mud Akristu akin mu yisu yawonsu. (1 Pita 2:12) Ukat kuman chom ni chom tukata kusal, ap mu ujindj. (Hebreu 4:13) Tufanyidin kwipuk masandj ni yisalijok yikwau yijondila ya mangand minam.​—⁠1 Korint 6:​9-11.

4. Kwishitul kwa mu Manangu: Ang twizwish manangu metu nich yitongijok yitakatina, yitok, yaku yetu niyau yikwikal yishitwila. (Filipoi 4:⁠8) Pakwez ang twalamin yitongijok pa yom yijondila, yikez kashiken mu yisal yiyimp. (Mateu 15:​18-20) Tufanyidin kwipuk mitapu ya kwipuwangej yikwelanga kuyipish yitongijok yetu. Tukutwish kwizwish manangu metu nich yitongijok yishitwila kwa kwilejang Dizu dia Nzamb.

5. Kwishitul kwa mu Mujimbu: Mulong ad aruu a Nzamb, Akristu afanyidin kulam mijimbu yau ni maswin mau minangina. Tufanyidin kowish makas metu pa kubudik ku musalany, ni kurutu kwa kudia ap kurijek yakudia. Ang ukwetap musalany ufanyidina, uwapidin kujik yiyimp. (Kuvurik Yijil 23:​12, 13, NW) Kulamang kwishitul kwa mu mujimbu kukat kukwash kwipuk mayej. Chikumbu cha Mukristu chifanyidin kwikal zwang ni chinangina mukach mwach mud pol kand. Chifanyidin kumekan mudi chilik chiwamp mu ul.

6. Kwishitul kwa mu Mambamb: Atushalapol a Nzamb afanyidin kulond pichukupichuku uyakin. Akamakasu kakezap kwandam Want wa Nzamb. (Efesus 4:25; Kuburik 21:⁠8) Akristu kafanyidinap kusadin kan kayimp. Kakat kulondangap ap kwov mases ma masal ap jingany jijondila. Imekeshin mud in kushaljan ni antu akwau ku mudimu ap ku shikol ni mwi ndond yishichingau mulong wa mambamb mau mishitwila.​—⁠Efesus 4:​29, 31; 5:⁠3.

[Caption on page 19]

Atushalapol a Nzamb Ikala Ishitwila mu mitapu yawonsu