Dilejan dia 10
Yisaljok Yikisinay Nzamb
Ufanyidin kwiyov nchik piur pa yom yilondinay Nzamb anch yiyipin? (1)
Mitapu yisu ya yaku ya amakundj ni amband yiyipina? (2)
Mukristu ufanyidin kuman nchik makasu? (3) kusengen nfalang? (3) wij? (3) ubaj (4) ritiyin aspiritu? (5) kukwachik maruvu (6)
Muntu ukutwish nchik kudiokal mu yisaljok yiyimp? (7)
1. Atushalapol a Nzamb akatin yiwamp. Pakwez afanyidin kand kwilej kukis yiyimp. (Kuseng 97:10) Chirumburikin kwipuk yisaljok yimwing yikisinay Nzamb. Yawiy yisu yimwing ya yisaljok yin-ya?
2. Masandj: Kulaljan kurutu kwa uruu, makaj, muntu kulal nend nnam, nau antu a divumu dimwing ap mash mamwing, ni utun yidi yitil yilimina nakash kurutu kwa Nzamb. (In Levi 18:6, NW; Rome 1:26, 27; 1 Korint 6:9, 10) Ang ikundj ni mband akad kwatijan pakwez ashiching pamwing, afanyidin kwaurik ap kufundishijan ku buku wa Leta.—Hebreu 13:4.
3. Kulondang makasu, Kusengenang Nfalang, Kwiyang: Yehova kakulondangap makasu. (Titus 1:2) Antu asotina chiyukish chend afanyidin kwipuk kulondang makasu. (Jinswir 6:16-19; Kolosai 3:9, 10) Mutapu umwing umwing wa kusengen nfalang dishin diau ris. Komb Akristu kafanyidinap kwandam mu mutapu ap umwing wa kusengen nfalang, mud loterie, kubambel kwa atubar, ni bingo. (Efesus 5:3-5) Nau Akristu kafanyidinap kwiy. Kakatap kuland rupit rijau nawamp anch rid ra wij ap kusend yom yakadau kuyink.—Kubudik 20:15; Efesus 4:28.
4. Kupandikesh Ujim, Ubaj: Ujim usutina yipim ukutwish kulet ku yisal ya ubaj. (Disambishil 4:5-8) Muntu wa ubaj kakwikalap murund wa Nzamb. (Kuseng 11:5; Jinswir 22:24, 25) Chiyipin kufundakesh ap kuchirishin uyimp mulong wa yom yiyimp akwetu atusadila.—Jinswir 24:29; Rome 12:17-21.
5. Mazu ma Maji ni Ritiyin Aspiritu: Antu amwing akat kwit usu wa aspiritu mulong wa kupim kuyeril mayej. Akwau akat kulond mazu piur pa akankuny nau chakwel aayelish ap kand ayijipa. Usu udia kwinyim kwa yisaljok yiney yawonsu ndiy Satan. Komb Akristu kafanyidinap kwikalamu mu yom yiney. (Kuvurik Yijil 18:9-13, NW) Kwikalang piswimp nend Yehova diawiy dilam disutina kuwap mulong wa mazu mayimp makutwishau antu akwau kutulondil.—Jinswir 18:10.
6. Kukwachik Maruvu: Kichiyipinap kuna mvinyu pakemp, maruvu ap mar makwau maswejina. (Kuseng 104:15; 1 Timoteu 5:23) Pakwez kusutish chipim ni kukwachik maruvu kuyipin kurutu kwa Nzamb. (1 Korint 5:11-13; 1 Timoteu 3:8) Kunang nakash kukutwish kuyipish ukash wa mujimbu wey ni kurumbangesh dijuku diey. Kukutwish kand kukutwal swa mu yoziw yikwau. —Jinswir 23:20, 21, 29-35.
7. Antu akata kusal yom yilondinay Nzamb anch yiyipin “kakez kaswanap want wa Nzamb.” (Galatia 5:19-21) Ang umukatin chakin chakin Nzamb ni usotin kumusangaresh, ufanyidin kudjibwil kulemp yisaljok yiney. (1 Yohan 5:3) Ilejap kukis yilondilay Nzamb anch yiyipin. (Rome 12:9) Ambatanap nau antu akweta yaku ya winzamb. (Jinswir 13:20) Ambay’ey Akristu akudila akutwish kumekesh patok anch adi musul wa ukwash. (Yakob 5:14) Piur pa yawonsu, engamin ukwash wa Nzamb kusutin malembil.—Filipoi 4:6, 7, 13.
[Caption on page 20]
Nzamb ukisin kukwachik maruvu, kwiyang, kusengenang nfalang, ni yisal ya ubaj