Dilejan dia 11
Yitiyij ni Yishankuru Yakaday Nzamb Kusanger
Yitiyij ni yishankuru yisu yidia ya makasu? (1)
Ov Akristu afanyidin kwitiyij anch Nzamb udi Usatu? (2)
Mulong wak Akristu akin kakusangerangap Nowel, Pasak ap Machiku ma Kuvadik? (3, 4)
Ov afu akutwish kusal nayimp aom? (5) Ov Yesu wafila pa dikurusu? (6) Kumusangaresh Nzamb kudi kwa usey mutapu ik? (7)
1. Yidiap yitiyij ni yishankuru yawonsu yiyipina. Pakwez Nzamb kakutwishap kuyisanger yimwing yawu ang yadiokala ku relijon wa makasu ap yikat kutadikijan ni mafundish ma Baibel.—Mateu 15:6
2. Usatu: Ov Yehova udi Usatu—antu asatu mwi Nzamb umwing? Bwat! Yehova, Tatuku, udi “Nzamb wakin umwing kusu.” (Yohan 17:3, Mako 12:29) Yesu udi Mwanat Wend, ni udi mwin kumuziyil Nzamb. (1 Korint 11:3) Tatuku udi mujim kusut Mwan. (Yohan 14:28) Spiritu utumbila kadap muntu; udi usu wa kusalish wa Nzamb.—Disambishil 1:2; Midimu 2:18.
3. Nowel ni Pasak: Yesu kavadikap pa Kachirikin Kalang 25. Wavadika piswimp ni pa Mwinkind 1, chirung cha muvu atufung alamanga amikoku awu pol uchiku. (Luka 2:8-12) Yesu kelap ap kapamp kamwing anch Akristu asangerang kuvadik kwend. Chinyim nich, wayileja in kwilej end kuvurikin rufu rend. (Luka 22:19, 20) Nowel ni yishankuru yend yidiokil ku marelijon makuru ma makasu. Chidi kand chakin mulong wa Pasak ni yishankuru yend, mud kusadin may ni atutuy. Akristu a pa budid kasangerangap Nowel ap Pasak, nau Akristu akin i’lel kakusangerangap.
4. Machiku ma Kuvadik: Baibel ulondil ching kusu ya misambu ya kuvadik yaad yasangerau kud antu adinga akad kumwifukwil Yehova. (Disambishil 40:20-22; Mako 6:21, 22, 24-27) Akristu a budidi kasalangap misambu ya kuvadik. Chishankuru cha kusal misambu ya kuvadik chidiokil ku marelijon makuru ma makasu. Akristu akin akat kupan yipan ni akwet yisu yiwamp pamwing pa yirung yikwau ya muvu.
5. Wom wa afu: Afu kakutwishap kusal chom ap chimwing ap kwov. Tukutwishap kuyikwash awiy, nau kakutwishap kutusal nayimp. (Kuseng 146:4; Ecclesiastes 9:5, 10, NW) Mupim ukat kufang; kiudingap mwom kwinyim kwa rufu. (Ezekiel 18:4, NW) Pakwez yisu yikwau angel ayimp, apidilau ademon (ayilembil), akat kurumb kwikal aspiritu a afu. Yishankuru ap yisu ya kwovishin wom ap ya kwifukwilin afu yidi ya makasu.—Isaya 8:19, NW.
6. Dikurusu: Yesu kafilap pa dikurusu. Wafila pa dinguj, ap mutond. Dizu dia ugrek dikarumwinau “dikurusu” mu Mabaibel mavud dirumburikin kwad chikunku chimwing cha mutond [wonikina]. Chinfanikesh cha dikurusu chidiokil ku marelijon makuru ma makasu. Dikurusu kadisadilap ap kudifukwil kud Akristu a budid. Chad, ov utongin anch chiwapidin kusadil dikurusu mu kwifukwil?—Kuvurik Yijil 7:26, NW; 1 Korint 10:14.
7. Chikutwish kukukasiken nakash kudjibul yimwing ya yitiyij ni yishankuru yiney. Akadivar ni arund akutwish kupim kukwitiyijish anch pikil ukarumuna yitiyij yey. Pakwez kumusangaresh Nzamb kudi kwa usey kusut kusangaresh antu.—Jinswir 29:25; Mateu 10:36, 37.
[Caption on page 22]
Nzamb kadap Usatu
[Captions on page 23]
Nowel ni Pasak yidiokil ku marelijon makuru ma makasu
Kwikil diyingish dia kwifukwil afu ap kwov wom wau