Dilejan dia 14

Mutapu Atuman’a Yehova Adi Irijekina

Chisu ik chasambishau Atuman’a Yehova a katat? (1)

Yikumangen ayitakedin mutapu ik ku Chot cha Want? (2)

Nfalang akat kujifutin nchik? (3)

Nnany ukata kutakel chikumangen ni chikumangen? (4)

Yikumangen yisu yijim yisadiningau muvu ni muvu? (5)

Mudimu wisu usadiningau ku biro wau mujim ni mu mabiro ma mitiy? (6)

1. Atuman’a Yehova a katat eza kusambish mu mivu ya 1870. Asambela kuyitazuk anch In kwilej a Baibel. Pakwez mu 1931 akwata dijin dia Mifund [ya Nzamb] dia Atuman’a Yehova. (Isaya 43:​10, NW) Kudiok masambishil makemp dirijek dikat kukul djat ku mamiliyon ma Atuman, inang ipanin nakash mu kutwang rubil mu mangand kusut 230.

2. Yikumangan yivudi ya Atuman’a Yehova yikwet yikumangen tupamp tusatu pa rubing. Ezaku mwan ku yimwing ya yikumangen ey. (Hebreu 10:​24, 25) Baibel udi dishin dia malejan. Yikumangen akat kuyifungul ni kuyifung nich malembil. “Miminy ya muspiritu” ya kulet chirungul mu muchim akat kuyiwangang mu yikumangen yivud. (Efesus 5:​18, 29, NW) Kwandam kudi kwamwamu, ni kwikil kwit musapu.​—⁠Mateu 10:8

3. Yikumangan yivud yisadil yikumangen mu Chot cha Want. Yot ya Want yidiap mudi matempel pakwez yikumbu yitungilau Atuman ipanina ayinau. Kiukumanap yifwatul, misalab, ap yom mud yiney mu Chot cha Want. Nfalang ja kufutin midimu jidiokil ku yipan yakad kwit. Mulong wa awonsu ina asotina kulet chakupan, kud mushet wa mulambu.​—⁠2 Korint 9:⁠7.

4. Mu chikumangen chawonsu, adiku amakurump, ap atulam. Akat kutakel mu mafundish mu chikumangan. (1 Timoteu 3:​1-7; 5:17) Ayikwashin kudi ankwash’a minister. (1 Timoteu 3:​8-10, 12, 13, NW) Amakundj inang kayitekinap piur pa antu akwau a mu chikumangen. (2 Korint 1:24) Kakwetap majin ma want. (Mateu 23:​8-10) Kadjadinap yidjal yishaljadina ni ya antu akwau. Ap kapamp kamwing kakatap kuyifut mulong wa mudimu wau. Kwa kukat ayinau amakurump akat kutadil nswir ja muspiritu ja chikumangen. Akutwish kulet rwongoj ni kutakel mu yisu ya kanvundangesh.​—⁠Yakob 5:​14-16; 1 Pita 5:​2, 3.

5. Atuman’a Yehova akat kusal kand yikumangan yijim ap yikunguril muvu ni muvu. Pa yisu yiney yikumangen yivud yikat kwezang pamwing mulong wa program wa pakampwil wa malejan ma Baibel. Dibabatish dia in kwilej asu didi chikunku cha chisu chawonsu cha program wa chikunguril chawonsu.​—⁠Mateu 3:​13-17; 28:​19, 20.

6. Biro mujim wa mangand mawonsu wa Atuman’a Yehova udi mu New York. Kwawiy kudia Kolej Wantakel, chisak cha amakurump akudila mu spiritu akata kutal chikumangen cha mangand mawonsu. Kudi kand mabiro kusut 100 ma mitiy kunyingumuk mangand. Mu jindond jinej, in kwipan ayinau akat kukwash kuchap mikand ya Baibel. Aletin kand wintakel wa kurijek mudimu wa kulejanang. Mulong ik ukurijekap kuya kutal biro wa mutiy wa piswimp ney?