Mulong Wak Tukata Kufang?
“Pa misong yawonsu ya mikandu pikuchikin zoong, mu mitond mwawonsu kiukuteship kand rinkind upepila; atujil alel mu mitond: chingel; katat kamu ak niyey ukupim kamu mud awiy.”—JOHANN WOLFGANG VON GOETHE, POET MWIN ALLEMAGNE.
N ZAMB watanga antu nich mak ma kushakam chikupu. Chakin, Baibel ulondil anch wateka “chovil cha uchikupu mu michim yau.” (Ecclesiaste 3:11, Beck) Pakwez Nzamb wasala yivud kupandakan kusu kuyinkish rusot ra kushakam chikupu. Wayinkisha kand ndond ya kushakamin.
2 Anvaj etu a kusambish, Adam ni Ev, ayitanga awanyidina, kadingap ni ditayeng ap dimwing mu manangu ap ku mujimbu. (Kusutirik 32:4, NW) Tongap bil—kwikil misong ni kusansan, kwikil wom ap yakamish ya kajipesh! Chikwau kand, Nzamb wayiteka kwol kwau mu paradis muwamp nakash. Nzamb watonga anch muntu ukushakam chikupu ni pa muten ufanyidina divu dikez kizul nau aan awanyidina. (Disambishil 1:31; 2:15) Chad lel, mulong wak tukata kufang?
Kubwambul Kwalet Rufu
3 Nzamb wamwinkisha Adam mbil anch: “Ukutwish kudia kwey mabuj ma mitond yawonsu ya mu chir. Pakwez dibuj dia mutond ou wa ronganyin ra kuwap ni kuyip kangal kudidia. Mulong dichiku diukeza kadidia, chakin ukez kufa.” (Disambishil 2:16, 17) Chawiy lel mwom wa chikupu kud Adam ni Ev wadinga wa chizwish; washindamena kuziyil kwau kud Nzamb.
4 Pakwez, cha ushon, Adam ni Ev ajirila chijil cha Nzamb. (Disambishil 3:1-6) Mu kusalang mwamu, ikala akayitil, mulong “chitil chidi kujip kwa yijil.” (1 Yohan 3:4) Mud chibudikin, Adam ni Ev ashadisha ruchingej ra mwom wa chikupu. Mulong wak? Mulong “difut dia chitil didi rufu.” (Rome 6:23) Payirumburishay Adam ni Ev, Nzamb walonda lel anch: “Udi kwey rufunfut ra pansh, ukez kachirikin kand kwey ku rufunfut.” Anvaj etu akusambish ayopata chad lel kwol kwau mu Paradis. Kudiosh kamu pa dichuku diasalau chitil, Adam ni Ev asambisha weny wa kufa pakemp pakemp pakwez nich kujijaman.—Disambishil 3:19, 23, 24.
“Rufu Rashika kud Antu Awonsu”
5 Adam ni Ev adinga katat ni chitil chikurikidina mu ruvaj rau. Chawiy lel, kelap kand kuval aan awanyidina, kwikil divu diyimp dikutwisha kuval yom yiwamp. (Yob 14:4, NW) Chakin, kuvadik kwawonsu kwa muntu kwitiyishin anch anvaj etu a kusambish ashadisha ukash wa mujimbu uwanyidina ni mwom wa chikupu wau ayinau ni wa aanau. Mupostol mwin Kristu Paul wafunda anch: “Chawiy mudi chitil chandama mu mangand mulong wa muntu umwing, ni rufu randama mulong wa chitil, chawiy rufu rashika kud antu awonsu mulong antu awonsu asala chitil.”—Rome 5:12; isikej Kuseng 51:5.
6 Nlel in siyans kijap mulong wak ukatau antu kunanap ni kufa. Pakwez, Baibel, urumburidin anch tukat kufang mulong twavadikina mu chitil, twaswana ngikadil wa anvaj etu a kusambish akamuntu. Pakwez yik yikata kutushiken pitukufanga?
[Questions]
1, 2. (a) Antu ayitanga nich rusot ik? (b) Antu aad a kusambish asangera mwom wa mutapu ik?
3. Pisu pashindamena mwom wa chikupu wa Adam ni Ev?
4. Pasalau Adam ni Ev chitil, mulong wak washadishau ruchingej ra kushakam chikupu mu Paradis?
5. Rufu rashika nchik ku muchid wa ukamuntu wawonsu?
6. Mulong wak tukata kufang?