Difundish dia 6

Paradis udi piswimp!

Yom yiyimp yimekena katat pa divu yimekeshin anch Paradis udi piswimp. Baibel walonda anch tukez kuman machuku makash kurutu kamu Paradis ashika. Tushich katat pa machuku minam! Tal yom yimwing yalonday Baibel anch yikwez kushiken:

Jinjit jijim. “Muchid ukez kurish ni muchid ukwau, want ukez kurish ni want ukwau.” (Mateu 24:7) Uprofet winou ukat kushiken. Kudiosh mu muvu wa 1914, kwikadil kal jinjit ja mangand jaad ni jinjit jikwau jivud jikemp jikemp. Mamiliyon ma antu afil mu jinjit jinej.

Yipupu kwawonsu. Kukez kwikal “yipupu kwawonsu.” (Luka 21:11) Ov yom yiney yikat kushiken? Mwawiy. Kanser, misong ya rudung, chimpim, malariya, SIDA, ni mayej makwau majipin kal mamiliyon ma antu.

Kuburen yakudia. Pa divu pawonsu padi antu aburedina yakudia yifanyidina. Mamiliyon ma antu afil mulong wa nzal muvu ni muvu. Chinech chidi chijingidij chikwau chimekeshina anch Paradis ukushik katat kamu ak. Baibel ulondil anch: “Kukez kwikal kand kamungun.”—Marko 13:8.

Kunyikek kwa ngand. “Kukez kwikal . . . kunyikek kwa ngand ku jindond jivud.” (Mateu 24:7) Chinech ni chawiy chikat kushiken pa machuku metu. Kudiosh mu 1914 kwafil kal miliyon umwing ni kusut wa antu mulong wa kunyikek kwa ngand.

Antu ayimp. Antu akez kwikal “in kukat nfalang” ni “in kwikat ayinau.” Akez kwikal “in kukat yom ya kwisangarish ayinau kupandakan kumukat Nzamb.” An akez kwikal “in kuyibwambwil anvajau.” (2 Timote 3:1-5) Ov witiyinap anch nlel kudi antu avud adia mutapu winou? Kamulimishinap Nzamb ap pakemp, ni akat kuyizengol antu apakishina kwilej piur pa Nzamb.

Ubaj. Kukez kwikal kand ‘kuvulijan kwa kuburen kulimish yijil.’ (Mateu 24:12, NW ) Chakin anch ukwitiy anch ubaj wa katat upandaken kuyip nakash kusut ubaj wa mivu ya kwinyim. Ndond yawonsu antu adi mu chak cha kuyiy yom, kuyidimb, ap kuyisal nayimp.

Yom yawonsu yiney yimekeshin anch Want wa Nzamb udi piswimp. Baibel ulondil anch: “Anch wamanany yom [yiney, NW ] yikat kushik, ukez kwijikany anch, Want wa Nzamb udi piswimp ni kushik.” (Luka 21:31) Ov Want wa Nzamb chom ik? Udi winyikel wa Nzamb wa mwiur ukeza kulet Paradis pa divu. Want wa Nzamb ukez kuswinken pa winyikel wa antu.—Daniel 2:44.