Disudiel Dikwez Chisu ik? Yom Yalonday Yesu

SHINSHIKIN YOM YAAD YALONDAY YESU PIUR PA DISUDIEL:

“Chawiy, babalany, mulong kiwijanyap dichuku ap chisu chikwezay Mwan a Muntu.”​—MATEU 25:13.

“Babalany, chishany ku mes, mulong kiwijanyap chisu chikushika yom yiney.”​—MARKO 13:33.

Chawiy, kwikil muntu ap umwing wija kamu nawamp chisu chikweza disudiel dia mangand minam mayimp. Pakwez Nzamb watekin kal “chisu”​—charumburik anch “dichuku . . . [ni] chisu”—​dikushika nsudiel yiney. (Mateu 24:36) Ov, chinech chirumburikin anch tukutwishap kamu kwijik ap pakemp anch disudiel diasej kal piswimp? Bwat. Yesu wayileja in kwilejend kushinshikin yinship kushalijan yikumekesha anch disudiel did piswimp.

CHIJINGIDIJ

Yinship yiney yawiy yafanyina kwikal chijingidij cha “disudiel dia mangand.” Yesu walonda anch: “Muchid ukez karish ni muchid ukwau, want ukez karish ni want ukwau. Kukez kikal kamungun ni kunyikek kwa ngand ku jindond jivud.” (Mateu 24:3, 7) Walonda kand anch kukez kikal “yipupu” (Luka 21:11) Ov, umen kuwanyin kwa mazu ma uprofet malonday Yesu?

Nlel unou antu amen mar mulong wa njit, kamungun, kunyikek kwa divu, ni mayej mayila mu kwiwej. Chilakej, mu muvu wa 2004, kunyikek kukash kwa divu kwasadika mu Karung wa Inde kwaletisha rinkind mukash utazukinau anch tsunami, wajipa antu piswimp 225 000. Kwasut kal muvu umwing ni kusut, chipupu cha COVID-19 chajipin antu piswimp amiliyon 2,6 pa mangand mawonsu. Yesu walonda anch yom mud yiney yikumekesh anch disudiel dia mangand minam did piswimp.

“MACHUKU MA KWISUDIEL”

Bibil utazukin chirung cha piswimp ni kwinsudiel anch “machuku ma kwisudiel.” (2 Pita 3:3, 4) 2 Timote 3:1-5 ulejen anch mu machuku ma kwinsudiel antu akwikal ni mashakamin mijondila. (Tal mushet ulondina anch “Chisu Chikemp Kurutu kwa Disudiel dia Mangand.”) Ov, nlel unou umen anch antu ikatin ayinau, ad in ris, in kwitutul, ni akad kwikal ni rukat? Winou ud uman ukwau umekeshina patok anch disudiel dia mangand did piswimp nakash.

Machuku ma nsudiel makwikal ni kulep ik? Kukwatijan ni yom yilondinay Bibil makwikal kwau ‘miswimp.’ Kupwa, Nzamb ukushesh antu awonsu “akata kushesh mangand!”​—Kujingunik 11:15-18; 12:12.

PISWIMP AP DIVU DIKWIKAL PARADIS!

Nzamb watekin kal dichuku ni chisu chikusheshay mangand minam mayimp. (Mateu 24:36) Pakwez, kud rusangu ruwamp​—Nzamb “kasotilap muntu ap umwing kusheshik.” (2 Pita 3:9) Uyinkishin antu chisu cha kukarumuk ni kushakam kukwatijan ni mbil jend. Mulong wak? Mulong Nzamb ukatin anch tupanda ku disudiel dia mangand minam ni twikala mwi ngand yisu, chisu chikwikala divu paradis.

Nzamb watenchikin kal program wa kuyifundish antu pa mangand mawonsu chakwel ijika yom yifanyidinau kusal chakwel andama mwi ngand yisu yikutakelau kud Want wend. Yesu walonda anch rusangu ruwamp ra Want wa Nzamb akez kurilejan “ku mangand mawonsu.” (Mateu 24:14) Mu muvu wa 2019, pa mangand mawonsu, Atuman a Yehova asutishin a saa mamiliyar 2 ni kusut mulong wa kuyifundish antu ni kuyilej uruu wa Bibil uletina ruchingej. Yesu walonda anch mudimu winou wa kulejan ukez kasadik pa mangand mawonsu kurutu disudiel dishika.

Kuyikel kwa antu kud piswimp ni kupwa. Pakwez, rusangu ruwamp rid anch ukutwish kupand ku disudiel dia mangand ni kushakam mu Paradis panap pa divu mud mwakanay Nzamb. Mutu wa mulong wambakedinap wisambidin yom ufanyidina kusal chakwel ushakama mwi ngand yiney yisu.