Yakul ku Yipul Yinying Piur pa Disudiel

YESU KRISTU wasambela kulejan anch mu machuku ma kurutu, ‘disudiel . . . dikez kwez.’ Palejanay piur pa chisu chinicha, ndiy walonda anch: “Mulong mar ma machuku minam makez kikal mayimp, kupandakan mar mamanau antu kudiokal ku disambishil dia mangand kushik ni katat. Kukez kikalap kand mar ma mutapu winou chikupu.”​—Mateu 24:14, 21.

Mazu ma Yesu piur pa disudiel, pamwing nich maverse makwau ma Bibil piur pa mulong winou, malangwishin yipul yivud ya usey. Ov, mulong wak ukutwishap kuburil Bibil wey ni kutang yilondinay mulong wa kwakul ku yipul yiney?

1 Ov, Chom ik Chikeza Kusul?

Bibil kalejenap anch divu tumena ni mes dikez kusheshik. Nfund a Kuseng wafunda anch: “[Nzamb] warijeka ngand kudiokal mutambu djat ni mutambu ukwau, chakwel kiyikushemunikap chikupu.” (Kuseng 104:5) Bibil kafundishinap kand anch mwom wawonsu ukez kasheshik mu kasu. (Isay 45:18) Yesu amwinend walejana anch antu amwing akez kupand pa dichuku dia nsudiel. (Mateu 24:21, 22) Ov, chom ik chilejenay Bibil anch chikez kwikal ni nsudiel?

Winyikel wa antu wakanganya kal ukez kupwa. Nzamb wamupepidila muprofet Daniel chakwel afunda anch: “Nzamb wa mwiur ukez kakasikesh want ukwau wakad kez kikal nich disudiel chikupu. Kakez kaukwatap want winou, pakwez ukez kashesh mant makwau mawonsu, chad wawiy ukez kashakam chikupu.”​—Daniel 2:44.

Njit ni kuyipish kwa chipepil yikez kupwa. Palejenay piur pa yikezay Nzamb kusal, Kuseng 46:9, TMK ulondin anch: “Ndiy ukat kukatwish njit ni kwisudiel kwa mangand, ndiy ukat kubukon mat, ukat kukatwol mirumbu yikunku yikunku, ukat kwosh matemb mu kasu.” Bibil ulejen kand anch Nzamb ukez “kuyishesh awonsu akata kushesh mangand.”​—Kujingunik 11:18.

Chisum ni kasolikany yikez kupwa. Dizu dia Nzamb dikat kushilamu anch: “Antu atentamina akuswan ngand, ni antu akashinsh akushakamamu, pakwez antu ayimp akez kayidiosh mu mangand, ni in rubabek akez kayidioshamu.”​—Jinswir 2:21, 22.

2 Ov, Chisu ik Chikeza Kwez Disudiel?

Yehova Nzamb watenchikin kal “chisu” chikezay kudiosh uyimp ni kutek winyikel wa Want wend. (Marko 13:33) Pakwez Bibil ulejen patok anch tukutwishap kuchind dichuku ap dimwing dia kwez kwa disudiel. Yesu walonda anch: “Kwikil muntu wija kushik kwa dichuku dinidia ap kwa chisu chinicha. Aruu a mwiur kijap, ap Mwan, ching kusu Tatuku ndiy wija amwinend.” (Mateu 24:36) Pakwez Yesu ni inkwilej end asambela kulejan mutapu yikezakwikal mikadil pa divu kurutu kwa Nzamb kulet disudiel. Disudiel didi piswimp mulong yom yawonsu yilondwilaku yikat kushiken pa chisu chimwing ni mu mangand mawonsu.

Kukarumuk kukash mu milong ya chipolitik, ya mwikadil, ni ya mashakamin kushikedin mu mutapu umwing kandikal kushikenap mu mangand. Payakulay in kwilej ku chipul chamwipulau piur pa nsudiel, Yesu walonda anch: “Muchid ukez karish ni muchid ukwau, want ukez karish ni want ukwau. Kukez kikal kunyikek kwa ngand ku jindond jivud. Kukez kikal kand kamungun. Yom yiney yawonsu yidi disambishil dia mar.” (Marko 13:8) Kambuy Paul wafunda anch: “Mu machuku ma kwinsudiel makez kikal ma mar nakash. Antu akez kikal in kwikat ayinau, in kukat nfalang, in kwibaz, in kwishimek, in kumusaal Nzamb masaal, in kuyibwambwil anvajau. Akez kikal kand akad kujikitishang, akad kulimish yom yitumbila. Akwikal in michim yichinchikina akad kwitiy jinkand, in matungu akad kwikal ayinau, in chisum, in kukis yom yiwamp. Akez kikal in kutungijan matungu, akad kubangaku antu akwau, in kwitutul, in kukat yom ya kwisangaresh ayinau kupandakan kumukat Nzamb.”​—2 Timote 3:1-5.

Kampany wa kulejan mu mangand mawonsu, mu jindim jivud uyil kurutu. Yesu walonda anch: “Chifanyidin Rusangu Ruwamp ra want wa Nzamb ez arulejana bil mu mangand mawonsu ni kwikal uman kudi antu a michid yawonsu, chad lel disudiel dia mangand dieza.”—Mateu 24:14.

3 Ov, Chom ik Chikeza Kusadik Kupwa Kwa Disudiel?

Bibil kalejenap anch antu awonsu awamp akez kuyidiosh pa divu ni kuyitwal mwiur akashakama chikupu bwat. Pakwez, Yesu walejana anch rusot ra Nzamb kudiosh kwinsambishin piur pa antu rikez kuwanyin. Ndiy walonda anch: “Ayuk kwau antu itudishina. Nzamb ukez kayinkish yom yawonsu yayishilayimu!” (Mateu 5:5; 6:9, 10) Piur pa antu afila kurutu kwa disudiel, Bibil uletin kushilamu kwa kuvumbuk mu machuku ma kurutu. (Job 14:14, 15; Yohan 5:28, 29) Ov, chom ik chikwikalaku kupwa kwa disudiel?

Mwiur, Yesu ukez kutakel mudi Mwant wa Want wa Nzamb. Muprofet Daniel wafunda anch: “Mu chishimushimu cham cha uchuku, namana chom chifanakena mudi mwan a muntu wezila kudi am, ading amwombilamu kudi madj. Mwan a muntu [Yesu wavumbulau] waya kudi Umwing wading ukwet mwom kudiokal pakur wakad disambishil [Yehova Nzamb], chad amushikija kudi ndiy. Amwinkisha [Yesu] usu wa kuyikel, ni uyaj, ni usu wa want, chakwel antu a michid yawonsu, ni a mitapu yawonsu, ni jindim jawonsu amusadil ndiy. Kuyikel kwend kikukez kapwap, ni want wend ukez kikal wa mivu ni minang.”​—Daniel 7:13, 14; Luka 1:31, 32; Yohan 3:13-16.

Antu akeza kushakam mu Want wa Nzamb akez kwikal nich ukash wa mujimbu uwanyidina, diking dikash, ni mwom wa chikupu. Muprofet Isay wafunda anch: “Awiy akez katung yikumbu ni kushakamamu ayinau. Akez kadim yir ya mitond ya nviny ni kudia mabuj mau. Awiy kakez katungap chakwel muntu mukwau ashakamamu, ap kakez kadimap chakwel muntu mukwau adia.” (Isay 65:21-23) Kambuy Yohan wafunda piur pa chisu chinicha anch: “Katat ndond ya kushakam ya Nzamb yidi pakach pa antu! Ndiy ukez kashakam nau pamwing, niyau akwikal antwend. Nzamb amwinend ukez kashakam nau pamwing, chad ukwikal Nzamb wau. Ndiy ukez kayikuswol mansoj mawonsu ku mes mau. Kukez kikalap kand rufu, ap madil, ap kwishikokin, ap kusansan, mulong yom yikur kiyamekanap kand.”—Kujingunik 21:3, 4.

4 Ov, Chom ik Ufanyidina Kusal Chakwel Upanda Dichuku dia Disudiel?

Kambuy Pita wijika anch antu amwing pakach pa antu akeza kwikal aom mu machuku ma nsudiel akez kusip piur pa chitongijok chakwel anch Nzamb ukez kapwish milong ya antu ni kudiosh uyimp pa divu. (2 Pita 3:3, 4) Chikalap mwamu, Pita uyikasikeshin antu awonsu nlel unou asala yom yilondwilaku.

Ilejany kusutil yom yasadika pasak. Pita wafunda anch: “Nzamb kayovilap antu a pakur riy, pasheshay mangand ma in kumubwambwil nich mabeb ma mem, pakwez ndiy wamupandisha Nowa mwin kurumburil yom yitentamina, pamwing nau antu akwau sambwad.” (2 Pita 2:5) Piur pa antu akata kudiwol, Pita walonda anch: “Awiy akatil kuvuramen anch, pakur ku dizu dia Nzamb maur mamekana, ni divu adidiosha ku mem, adiumba kand nich mem. Ku mem kand, ku mabeb majim, mawiy majiyisha mangand ma pakur. Chawiy maur ni divu, manganda ma katat, ayilamidin kand ku dizu dia Nzamb chakwel yez yasheshik nich kasu. Ayilamin mulong wa kuchingel dichuku dikurumburishay Nzamb, ni kuyishesh antu amubwambwidila ndiy.”—2 Pita 3:5-7.

Shakamany kwambatan ni yany yishitwila ya Nzamb. Pita wafunda anch antu awonsu asotila kupand kwi nsudiel akez kusal “yom yiwamp ni yom yawonsu yitumbila.” (2 Pita 3:11, TMK) Ijik anch Pita ukasikeshidin piur pa “yom yiwamp” ni “yom yawonsu yitumbila.” Pakwez, chifanyidin kand yom yikwau, pa ndond pa kwimen ching kusu pa kulond anch tukwet ritiy ap pa kusal usu mu ka chisu kakemp yom yiwamp ku mes kwa Nzamb mulong wa kupand.

Ov, yisal ik ya pakampwil ni midimu yitiyijinay Nzamb? Ov, mulong wak ukutwishap kwisikesh yom wija nich yifundishinay Bibil pa mulong winou? Atuman a Yehova akez kwikal ni musangar wa kukukwash. Yita chakwel akuleja mu Bibil wey pimedina yakul yau. Kusal mwamu kukez kakukwash chakwel urisha nich mushiku ni ruchingej nich yom yikeza kukushiken kurutu, chikalap nchik yom yakamishina ni yitunyingumukina nlel unou.

[Mazu madia kwishin kwa paj]

[Dizu dirumburila chipich chidia pa paj wa 7]

Divu dikezap kusheshik, pakwez antu adiyipishina awiy akezau kashesh