Yom Ufanyidina Kusal Mulong wa Kushakam mwi Ngand Yisu

Mitu ya milong yasambelang yalejanang anch Nzamb ukushesh piswimp ap antu ayimp ni ukupwish milong yawonsu yiyimeshina antu mar. Tukwet kashinsh anch yom yiney yikusadik. Mulong wak? Mulong Bibil, Dizu dia Nzamb dilondin anch:

“Mangand mayil ni kujiy.”—1 YOHAN 2:17.

Tukwet kashinsh anch kukwikal antu akupanda mulong verse winou ulondin kand anch:

“Muntu mwawonsu ukata kusal rusot ra Nzamb ukez kapand chikupu.”

Chawiy muntu mwawonsu ukimbina kupand ufanyidin kusal rusot ra Nzamb. Mulong wa kwijik chirumburikina rusot ra Nzamb, tufanyidin chakusambish kwilej kumwijik Nzamb win.

‘ILEJA KUMWIJIK’ NZAMB CHAKWEL UPAND

Tuyipich: 1. Mwingang ushich pansh ku opital, uziyin ni wiyakamishin. 2. Upimin mu restoran ni waman kal mbay nend wa mudimu ukweta musangar ukat kutang gazet. 3. Mbay nend wa mudimu ukat kumutangin Bibil ni wamwinkish kal kart ulejena kapend ka jw.org.

Yesu walonda anch: “Antu akwikal nich mwom wa chikupu anch akwijik ey Nzamb wakin.” (Yohan 17:3) Anch tukimbin kupand ku disudiel dia mangand minam ni kwikal ni mwom wa chikupu, tufanyidin ‘kwilej kumwijik’ Nzamb. Tufanyidinap kusu kwetu kwimen ching pa kwitiyijin anch Nzamb udingaku ap kwijik nsangu jikemp piur pend. Pakwez, tufanyidin kwikal arund nend. Anch tukimbin anch urund wetu ni muntu kanang ukasikan, tukat kusutishang nend chisu chivud. Chilik chimwing kand ni urund wetu ni Nzamb. Tushinshikinany uyakin umwing wa usey udia mu Bibil ukutwisha kutukwash kuta ni kukudish urund wetu ni Nzamb.

Uyakin Twilejina mu Bibil

Twij anch rusot ra Nzamb rading anch tushakama mu Paradis.

Nzamb wayitanga antu akusambish, Adam ni Ev, ni wayiteka mwi ndond yiwamp nakash yatazukau anch chir cha Eden. Antu inay ading awanyidina, ni Nzamb wayinkisha yom yawonsu yading yikwetau nich kuswir chakwel asangera mwom. Afanyina kushakam chikupu. Anch adandamena kwikal mu urund wa piswimp ni Nzamb, ing kafanyinap kufa. Pakwez atonda kubwambwil chijil chiswapela chayinkishau kud Nzamb.

Twij mulong wak tumena mar nlel unou.

Pamubwambwilay Nzamb, Adam muntu wa kusambish washadisha ruchingej radingay nich ra kushakam chikupu, ni wayishadishinar kand antu awonsu. Bibil ulondin anch: “Yitil yandamina mu mangand ku muntu umwing, ndiy kamu Adam, chad yitil yend yaleta rufu. Chawiy rufu riner rashika kudi antu awonsu.” (Rom 5:12) Mud mutapu ukatay muntu kuswan ulim wa anvajend, an a Adam awonsu aswana kuburen kuwanyin kwend. Mud chibudikin, tukat kunanap ni kufa.

Twij yom yasadinay kal Nzamb mulong wa kutukwash.

Bibil ulondin anch: “Nzamb wakata ngand nakash, ndiy wamupana Mwanend kapwokal chakwel muntu mwawonsu ukumwitiyija ndiy kakujiyap, pakwez ukez kikal nich mwom wa chikupu.” (Yohan 3:16) Nzamb wamutuma Yesu pa divu chakwel apana mwom wend mulong wetwetu. Prabhakar udia mwi ngand ya Inde, ukweta mivu 86 ulondin piur pa rukat ra Yehovaa anch: “Chisal chinech chimekeshin anch Yehova winkatin nakash. Kusutil rukat rend nikwet ruchingej ra kushakam chikupu.”

Twij mutapu wa kumujikitish Nzamb mulong wa yom yatusadidinay kal.

Bibil ulondin anch tukutwish kumujikitish Nzamb mulong wa yom yatusadidinay kal anch “twaziyil ku yijil [yend].” (1 Yohan 2:3) Nich rukat, Yehova Nzamb utulejin yom tufanyidina kusal chakwel tusangera mwom katat. (Isay 48:17, 18) Nzamb kakatiningap anch tuman mar. Utukanin anch ang twalondul mbil jend, tukwikalap ching kusu ni musangar katat, pakwez tukutwish kand kushakam chikupu.

TANGANG BIBIL, DIZU DIA NZAMB PICHUKU PICHUKU

Mwingang utadin mwiur kupwa kwa kutang Bibil pa chisu chipiminay pol. — Ukutwish kupand ku disudiel dia mangand anch wamulembil Nzamb chakwel akukwash ni anch wasal rusot rend

Tukat kudia chisu chawonsu mulong wa kwikal ni mwom. Pakwez Yesu walonda anch: “Muntu kakutwishap kwikal mwom mulong wa yakudia kusu, pakwez ukwet kuswir kwa mazu mawonsu makat kulonday Nzamb.”—Mateu 4:4.

Nlel tutanin mazu ma Yehova mu Bibil. Anch wilej mukand winou utumbila, ukujingunin uyakin wa usey nakash piur pa yom yasalay Nzamb pakur, yisadinay katat, ni yikusalay mu machuku ma kurutu.

MULEMBILA NZAMB CHAKWEL AKUKWASH

Yom ik ukutwisha kusal anch ukimbin kumuziyin Nzamb pakwez chikukasikedin kulik yom yikisinay? Kwilej kumwijik Nzamb kukutwish kukukwash nakash.

Shinshikin chilakej cha Sakura, mband umwing wading mukamasandj. Pasambishay kwilej Bibil, wajingunina mbil ya Nzamb yilondina anch “Chinany chitil cha usund.” (1 Korint 6:18) Sakura wamulembila Nzamb chakwel amwinkisha usu wa kulik chaku chend chiyimp. Pakwez udandamedin kurish ni yoziu. Ulondin anch: “Anch yitongijok yiyimp yangez mu manangu, nikat kumulej Yehova patok mu malembil, mulong nij anch nikutwishap kurish amwinam nich yitongijok yiney yiyimp. Malembil makat kwinkwash kwikal piswimp ni Yehova.” Mud Sakura, mamiliyon ma antu akat kwilej kumwijik Nzamb. Nzamb ukat kuyinkish antu inay usu wa kuswimp mashakamin mau chakwel amusangaresha.—Filip 4:13.

Anch wamwijik Nzamb nawamp, niyend ‘ukukwijik’ nawamp nakash ni ukwikal murund nend. (Galatia 4:9; Kuseng 25:14) Anch wasal mwamu ukutwish kwandam mwi ngand yisu ya Nzamb. Chad ngand yisu yikwikal mutapu ik? Mutu wa mulong ulondwilaku ukwakul ku chipul chinech.

a Yehova diawiy dijin dia Nzamb dilejenau mu Bibil.