Kingdom News No. 36

Milenyum Musu yom ik yikulamidina machuku ma kurutu?

Milenyum Musu ov kudi kusasimuk kwa chirung chisu?

MUKACH MWA UCHUKU wa Kachirikin 31, 1999, mivu chitot ya 20 yashikena kwisudiel.a Chadinga chirung chimwing chamena twinvundangesh tuvud. Pakwez chidi kand chirung chamana kusasimuk kwa ukaliweny usu, kuya kurutu nakash kwa umwingang, kuvulijan kwa mitapu ya kutum ni kupalangesh jinsangu, ni kukul swa swa kwa ekonomi wa mangand. Milenyum musu amwakin lel kud antu avud mud chijingidij cha ruchingej ni kukarumuk kwa yom. Ov chitwishikin anch milenyum winou amana kupwa kwa njit, uzweny, kuyipish kwa chipepil ni ndond ya kushakam, ni mayej?

Mwamu muchingejinau avud. Ov chidi chakin anch milenyum musu ukez kulet yikarumok yikutwisha kukukwash—yikarumok yikuchidija mwom wey ni wa dijuku diey? Shinshikinap bil yikemp kusu ya mu milong yijim yitukweta.

Kuyipish kwa Chipepil ni Ndond

Ngand jikweta yapu yivud yivud “jikat kushesh mashakamin pa mangand mawonsu ni kuyipish chipepil, divu ni mem ni kurumbangesh yitangil.” Anch adandamen kusal mwamu, “ndond yatangau yikusheshik kamu nakash.”—“Avenir de l’environnement mondial—2000,” Programme des Nations unies pour l’environnement.

Mayej

“Mu muvu wa 2020, tuchingejin kuman mayej makad kusamburik makutwisha kujip antu sambwad pa dikum mwi ngand jiyila mu kukul, anch kwisikej nich mwishin mwa chikunku cha kuvul kwa antu afila nlel unou.” —“Mangand masidinau nich mayej,” Harvard University Press, 1996 (Ingl.).

Ankaliweny amwing alondil anch “mu 2010, ngand 23 mudia yipupu yipandakena ya [SIDA ] yikushadish antu miliyon piswimp 66.”— “Face au sida: la situation dans les pays en développement,” rapor wa Commission européenne et de la Banque mondiale.

Uzweny

“Piswimp antu miliyar 1,3 ashich pakad ap kuman dolar umwing ku dichuku, ni piswimp miliyar umwing wa antu akangeny kuman ap yakudia yifanyidina.”—“Rapport mondial sur le développement humain 1999,” rapor wa Programme des Nations unies pour le développement.”

Njit

“Chisum mwi [ngand kushalijan] chikutwish kushiken pa chilik chakad kufanikan ni chikwau. Kudiokal ku [kutembijan] kwa muchid, kabil, ni relijon, . . . chisum mud chinech chikez kwikal . . . mulad umwing wijikena nakash wa matend mu chikunku cha kanying cha mivu chitot yikulondula . . . , ni kujip yitot ya tunan twa antu muvu ni muvu.”—“À l’aube d’un nouveau monde: La sécurité des États-Unis au XXI ^e siècle,” Commission américaine d’étude sur la sécurité nationale au XXI ^e siècle.

Kubul jimpel ni kuzangam mulong wa milenyum musu kubwikin mes pa mulong wa kwel anch kuyipish kwa chipepil ni ndond, mayej, uzweny, ni njit yimeken nakash katat kupandakan pasak. Chishin cha milong yiney yidi ris, kuburen ruchingej, ni choy—yaku yakaday siyans, winchij, ap kusu maprogram ma chipolitik kutwish kupwish.

Milenyum ukeza kuyukish antu

Mwin kufund umwing wa pasak walonda anch: “Njil ya muntu udiokila ku rufunfut yidiap kudiay ndiy. Chidap kud muntu ukata kwend kutakel rizau rend.” (Jeremiy 10:23, New World Translation) Muntu kaburedinap kusu ukaliweny pakwez uburedin kand mbil ya kuyikel divu. Sakatang wetu, Yehova Nzamb, ndiy kusu ukweta mbil ni ndiy kwend wija mutapu wa kupwish milong ya antu.—Rom 11:33-36; Kujingunik 4:11.

Pakwez chisu ik chikuchisalay? Ni mutapu ik ukuyipwishay? Uman wa kwel anch twashiken kal piswimp ni disudiel dia “machuku ma kwisudiel” umeken kamu patok. Buril amboku Baibel wey, ni tang 2 Timote 3:1-5. Mufund winou urumburil kamu patok yaku yikumekeshau antu pa chirung chinech cha “mar.” Mateu 24:3-14 ni Luka 21:10, 11 arumburil kand “machuku ma kwisudiel.” Mu mifund yiney atekin kashony pa yijingidij yimekena yasambisha kushiken kudiosh kamu mu 1914, mud njit ya mangand, yipupu, ni tumungun ndond yawonsu.

Katat kamu ak “machuku ma kwisudiel” makupwa. Mud mulondilay Daniel 2:44 anch: “Nzamb wa mwiur ukez kukasikesh want ukwau wakad kwez kwikal nich disudiel chikupu. . . . Ukez kushesh mant makwau mawonsu [ma pa divu], chad wawiy ukez kushakam chikupu.” Chawiy lel atakela kulond anch Nzamb ukez kutek Want, ap winyikel, chakwel uyikela divu. Kulondwish ni Kujingunik 20:4, winyikel winou uyikedil mivu kanan—milenyum umwing! Tushinshikinap kusu milad yimwing ya mutapu wa kushakam yikezau kuyirijekin antu awonsu pa chirung cha Milenyum winou wa uyaj:

Milong ya Kwisak. “Akez katung chakin yikumbu ni kushakamamu; ni akez chakin kukun yir ya nviny ni kudia ya mabuj mau. Kakez kutungap chakwel muntu windjing ashakamamu; kakez kakunap chakwel muntu windjing adia.” —Isay 65:21, 22, NW.

Ukash wa Mujimbu. “Mu chin chisu-cha mes ma amputames makez kaburik, ni matu ma atujikamatu makez kajikuk. Mu chin chisu-cha chibid ukez kamatik kwiur mud nsefu, ni rudim ra kamam rikez kakarik nich musangar.” “Kwikil muntu ap umwing ukeza kulond anch: ‘Niyedil.’ ”—Isay 33:24, NW; Isay 35:5, 6, NW.

Ndond. Nzamb ukez “kuyishesh awonsu akata kushesh mangand.”—Kujingunik 11:18.

Urund wa Antu. “Kakez kumeshijanap mar ap pakemp ap kushesh chom ap chimwing ku mukandu wam utumbila; mulong divu dikez kwizul chakin nich ronganyin ra Yehova.” —Isay 11:9, NW.

Tunan twa antu itiyidin kushilamu kwinoku kwa Baibel ni ikadil chad lel ni chitongijok chimwing chiwamp piur pa machuku ma kurutu. Mud chibudikin, adi antu amwing atwishina kurish nich yipwichik ni milong ya mwom. Ov Baibel ukutwish nchik kwikal ni usu mu mwom wey?

Ronganyin ritwadila ku mwom!

Siyans ni winchij wa in manangu yikutwish yisu yimwing kwikal ni usu ujim nakash! Pakwez, ronganyin ra muntu kand kal richidijap ni kusangaresh mwom wa antu avud. Ronganyin rimwing kusu rikutwisha kusal chinech arirumburil mu Baibel mu Yohan 17:3, ulondila anch: “Kupand kwin kwa chikupu kwawiy oku, chakwel akwijika ey Nzamb wakin, ni watuma ey, ndiy kamu Yesu Kristu.”

Ronganyin mud riner ridi mu Baibel. Ap anch avud amekeshining yitongijok yau ayinau piur pa buku winou utumbila, kudi kusu akemp amutangap kal ayinau. Ing ey? Mwaning, kutang Baibel kwitining kwikasikesh nakash. Pakwez chidi chom chimwing chifanyidina. Baibel ndiy kwend buku ‘upepidilau kud Nzamb chakwel kulejan nich, ni kukand nich, kupup nich, ni kuyilej nich antu mu kutentam.’—2 Timote 3:16.

Ov mutapu ik lel ukutwisha kusambish kwiyijidish amwiney nich Baibel? Ov mulong wak ukutwishap kwitiy ukwash wa Atuman’a Yehova? Akat kuyifundishang tunan twa antu kwol kwau, pakad kufutish. Chakwel kukukwash pa chinech, akat kusadil mikand kushalijan ya pa dishin dia Baibel, mud broshir Nzamb Witin Etu Tusal Ik? Broshir winou upanin yakul yifanyidina ku yipul yivud ukutwisha kwiyipul piur pa Baibel, mud: Nzamb udi Nany? Ov rusot ik rikwetay Nzamb mulong wa divu? Want wa Nzamb chom ik? Ov Baibel ukutwish nchik kurijek mwom wey wa dijuku?

Anch usotil anch umwing wa Atuman’a Yehova eza ni kukwendil kwol kwey, izwish amboku kupon udia kwishin oku. Ukusangar nakash kukulej jinsangu jikwau piur pa Winyikel wa Milenyum wa uyaj wa Want wa Nzamb!

[Footnote]