Tukudishany kusanger kwavuvurishina Rusangu ra Want No. 36
1 Ov wapwishin kal kwangan chikunku chey cha Rusangu ra Want No. 36? Trakt winou wipwil chipul chimwing cha katat chifanyidinau antu awonsu kutongin: “Milenyum Musu—Yom ik Yikulamidina Machuku ma Kurutu?” Muvu wa 2000 chiwadia ni kushej piswimp, milenyum musu wading ni kuvuvurish yichingej ya mutapu ni mutapu. Rusangu ra Want No. 36 rishinshikidin yimwing ya yichingej yiney ni kutuvurish anch mikadil ya mangand yipaninap dishin dia kuchingejin chibudikin chiwamp. Milenyum umwing kusu ukuleta chisambu ni diking yisotinau antu avud udi Winyikel wa Mivu Kanan wa Kristu Yesu. Ruchingej retu mu ukinakin wa Want wend rawiy ratubachikina kwangan Rusangu ra Want No. 36 kud muntu mwin mwawonsu tukutwisha.
2 Yakul ku Rusangu ra Want: Kwangan kwasambela kwa Rusangu ra Want kwading chibachikin chimwing chiwamp kud etu mu mudimu wetu. Mutiy wa Canada wafundin piur pa Rusangu ra Want No. 35, anch: “Kampany winou wa pakampwil amukwatikeshin nich mushiku kud in kulejan ni ayibol, ni amen milong yivud yikasikeshina.” Chakin kamu anch wangen nich mushiku wa chilik chimwing Rusangu ra Want No. 36.
3 Kampany winou wa Rusangu ra Want amurijekin chakwel apwa pa Kalang 17, 2000. Ov wapwishinany kal teritwar mwawonsu wa chikumangen chen? Anch bwat, amakurump akutwish kukwitany kudandamen nich kampany kushik ni kwisudiel kwa Kalang.
4 Ov mutapu ik wakwilau antu ni katat ku kwangan kwa Rusangu ra Want No. 36 mu ul wen? Antu kanang akwizwish kupon ni kwit broshir Nzamb Witin ap dilejan dia Baibel. Pakwez, avud pakach pa antu amekeshina kusanger kapamp ka kusambish piur pa mutu wa mulong wa milenyum kakutwishap kusal chom ap chimwing ching kamu anch Kaman wa Yehova wez ni kuyital. Antu awonsu amekeshina kusanger afanyidin kand kuya ni kuyital. Ov chisu ik chikwikala chiwamp chakwel kusal chinech? Chifanyidin kamu kuya ni kuyital pakad kulab.
5 Talany milong yabudikina payau ni kuyichirikin antu itiya Rusangu ra Want No. 35. Nambaz umwing chibol mu Irland wamushila mwin chikumbu cha kulandishin yakudia (restaurant) Rusangu ra Want. Mband winou wasangera uruu ni wamwita nambaz kumwendil kand. Nambaz wachirika kupwa kwa machuku maad, ni asambisha kwilej Baibel. Mu Danemark, asha Rusangu ra Want ku chikumbu chimwing kwadinga kwikil muntu. Dichuku dinidia kamu, mband wadinga mwin chikumbu watuma kupon ku biro wa mutiy, ni biro wa mutiy watuma kupon ku chikumangen cha ndond yadingay. Kurutu kwa rubing kupwa, anambaz aad amwendila, asambish kwilej Baibel, ni mband winou wakumangana kapamp kend ka kusambish ku Chot cha Want!
6 Yom ik ukulonda piukuchirika? Chiswapel kamu kusal kuchirikinamu kusu mwi ndond washila Rusangu ra Want ni chinech chidi chikunku chimwing chisangareshina cha mudimu wetu. Chisu usadina kuchirikinamu kusu, chiwapil kusend Rusangu ra Want No. 36, mulong mwin chikumbu ukutwish kwikal uburedina trakt wend. Ukutwish kupakish yiyul yiney.
7 Kupwa kwa kumuvurish mwin chikumbu anch udi nany, ukutwish kulond:
◼ “Nakushidin trakt ukweta mutu wa mulong ‘Milenyum Musu—Yom ik Yikulamidina Machuku ma Kurutu?’ Ov chadingap chikasikeshina kutang anch Winyikel wa Mivu Kanan wa Kristu Yesu ukusambish katat kamu kurutu oku, ni kulet mashakamin ma Paradis pa divu? [Lejan yifwatul ya Paradis mu Rusangu ra Want No. 36.] Pa paj wa kwisudiel, akwitin kwit broshir Nzamb Witin Etu Tusal Ik?” Lejan broshir, buril pa difundish dia 5, tang chipul cha kusambish ni paragraf wa 1 ni wa 2, ni kumwit mwin chikumbu kulejan yitonginay. Tang ni kwisambin mufund umwing ap yaad. Anch chitwishikin, shinshikin chipul chikwau ni paragraf, kupwa ovijanany chakwel kuchirik ni kudandamen nich misamb.
8 Mulong mikand ya kupan mu Kalang yikwikal broshir “Nzamb Witin” ap buku “Connaissance,” ukutwish kulond:
◼ “Pinezina ni kukwendil, nakushidin trakt ‘Milenyum Musu—Yom ik Yikulamidina Machuku ma Kurutu?’ Upanin chiyul cha kwit dilejan dia Baibel. Nezang mulong wa kukulej yitukata kusadil chakwel kutukwash kwilej. [Lejan Broshir, Nzamb Witin ni kuburil pa paj wa nsudiel; ap buku Connaissance, ni kuburil paj 188-189.] Milenyum wisambidinau mu Baibel ukulet mashakamin miumena pa chifwatul chinech. Chakwel kushakam mu Paradis, chitufanyidin kutambul ronganyin rakin ra Nzamb. Nisotin kukulej mu wiswimp mutapu tukata kwilej Baibel.”
9 Kwangan kwa Rusangu ra Want No. 36 kwatubachikin kuwejin nakash mudimu wetu wa kulejan, chom chapanina uman umwing ujim. Chakin anch chinech chavuvurishin kusanger kwa antu avud mu teritwar. Anch twakungin usu wetu pamwing chakwel kukudish kusanger kwinoku, nich ukwash wa Yehova, tukwikal ni musangar wa kuman antu avud afanakena ni amikoku.—Mat. 10:11; Midimu 13:48, 49, 52.