“Milenyum musu—yom ik yikulamidina machuku ma kurutu?”
1 Chipul chinech chiding mu yitongijok ya antu ku mitambu yawonsu pa divu. Ap anch antu ashikedin ku kusal yom yivud mu yitot ya mivu yasutina, antu ayidimbin mulong wa milong yijim yiyimeshina mar kudiosh mu tunan twa mivu ni katat yichidi kwaku. (Yob 14:1, NW; Kus. 90:10) Ov kwisu kukutwishau antu kuman ukwash?
2 Mwi ngond wa Mwinkind ni wa Kalang, tukwikal ni chisu cha pakampwil cha kuyikwash amutej netu kuman chakul ku chipul chinech. Mutapu ik? Kusutin ku kwangan Rusangu ra Want No. 36. Rikwet mutu wa mulong “Milenyum Musu—Yom ik Yikulamidina Machuku ma Kurutu?” Mu chikunku cha kusambish cha Mwinkind, tukupan magazet Tour de Garde ni Réveillez-vous! Kupwa kudiosh Diamond, Mwinkind 16, kushik Diakatan, Kalang 17, tukwipan mu kwangan kujim kwa Rusangu ra Want No. 36. Pa chisu cha kampany winou, tukukungin usu wetu ku kwangan kwa Rusangu ra Want No. 36 mu machuku ma rubing. Mu machuku ma kwisudiel kwa rubing, tukwangan Rusangu ra Want pamwing nich magazet madiaku.
3 Ov ukuusal sens? Amakurump, ankwash’a midimu, ni ayibol afanyidin kutakel mu kampany winou, mulong adi pa ndond ya kusambish mu mudimu. In kulejan avud akutwish kukarumun yisu yau chakwel kwikal chibol nkwash mwi ngond umwing ap angond aad a kwangan (kwa trakt). Akwau irijekin chakwel kusutish chisu chivud kupandakan machuku mawonsu mu mudimu wa kulejan.
4 Antakel a Dilejan dia Buku dia Chikumangen akutwish kwikal in kumukasikesh muntu ni muntu mu chisak chau chakwel kubudikin sens mu kwangan kwa Rusangu ra Want No. 36. Kukutwish kwikal in kulejan amwing akad kand kusalang mudimu wa kulejan. Amakurump afanyidin kuyendil in kulejan inay chakwel kutal mutapu ukutwishau kusal mulong wa kuyikwash. Chitwishikin akwata yitenchik chakwel mwin kulejan umwing ukweta ukaliweny amubachikijaku muntu ni muntu wakad kand kusalang mudimu wa kulejan mu chingand mu angond inay. Chakwel kuvuvurish kand impu ya kulejan ya in kulejan inay chifanyidin kusadil mutapu umwing uswapela wa kupan Rusangu ra Want No. 36.
5 Chinech chikwikal kand chisu chiwamp kud in kwilej a Baibel adia piswimp ni kupwish buku Connaissance ni awanyishina yitinau chakwel kwikal in kulejan akad kubatishau chakwel kusambish kubudikin mu mudimu wa kulejan. Ap ansand akutwish kusal nawamp mudimu winou usangareshina.
6 Chifanyidin kamu kusadil mutapu umwing wa kupan uswapela. Ukutwish kulond anch:
◼ “Nitekidin kwa kwikatin chisu cham chakwel kukwash kwangan rusangu riner ra usey nakash ku dijuku ni dijuku mu [jimbul dijin dia musumb ap ngand]. Kopi wey ou kamu ou. Mutanga amboku.” Chikwikalap cha ukwash kwikal ni sakosh wetu wa mudimu pa chisu twangena Rusangu ra Want No. 36.
7 Rijekany nawamp yikumangan ya mudimu wa chingand: Amakurump afanyidin kutal anch yitenchik yikwatinau yiwanyidin ni yifanyidin. Kalam’a midimu ufanyidin kushinshikin nawamp nakash anch chikumbu ni chikumbu ni teritwar mudinga midimu ya kwisak yidi tayad chakwel muntu mwawonsu ukutwish kubudikin sens mu mudimu. Kwawonsu chitwishikina, yikumangan ya mudimu wa chingand afanyidin kuyirijek dichuku ni dichuku mu rubing, mu machuku ma kwisudiel kwa rubing, ni urel. Akutwish kusal yitenchik chakwel kubudikin mu mudimu kupwa kwa muten kuzwek mulong wa kuyikwash an a shikol, in kusal mudimu wa kuswimpijan, ni antu akwau.
8 Tukusal nchik piur pa antu aburedina ku yikumbu: Rutong retu ridi ra kwambamb ni antu avud mu majuku mud kamu chitwishikina. Anch ku chikumbu kwikil muntu ap umwing chisu uyendidina, fund adres ni chirikinaku chisu chikwau cha dichuku. Anch pa rubing ra nsudiel ra kampany utwishinap kwambamb ni majuku minam, ukutwish kuyishil kopi wa Rusangu ra Want No. 36 pa ndond yiswapela kuman anch muntu wasutinap. Amakurump a chikumangen akutwish kulejan ku chikumangen chany cha kuyishil antu aburedina ku yikumbu yau kopi wa Rusangu ra Want No. 36 pendidilau kapamp ka kusambish ndond ya ku makunku ni ndond yidia materitwar mavud makad kutwish kupwish pa chisu cha kampany.
9 Tukwatikanany nich mudimu! Yikumangen yifanyidin kusal usu wa kupwish teritwar wau kurutu kwa kampany kupwa pa Kalang 17. Anch teritwar wen udi mujim nakash, in kulejan amwing akutwish kusal mudimu ayinau mwi ndond chitwishikina kusal chinech ni yakad chak. Ditenchik dined dikuswapej nakash kuyishiken antu avud mud kamu chitwishikina. Tal nawamp anch ufundin nawamp antu awonsu ukutana amekeshina kusanger.
10 Amakurump afanyidin kusambel kutongin magazet minch ma kuwejin maswiridina chikumangen ni kwit mud muchifanyidina. Chiswiridinap kwau kusal komand wa Rusangu ra Want No. 36, mulong atumin makopi ku chikumangen ni chikumangen. Ayibol a pakampwil, ayibol a rawonsu ni ayibol ankwash akutambul muntu ni muntu matrakt 200 ma kwangan, pakwez in kulejan akwau a mu chikumangen akuyangen muntu ni muntu matrakt 50. Ov udi tayad ni usotin kamu kwikal ukwatikena nich mujikit winou wa pakampwil? Didi dilau twitapidila mud ik dia kuyitwishish amutej netu awonsu kwijik yikaninay Nzamb mulong wa machuku ma kurutu madia mu kwez!