Kampany wa pa Kampwil wa Kupan Trakt Kusambishin pa Mwinkind 20–Kalang 16!
1 Kusambish Diakaj Kamwing, Mwinkind 20, ni kudandamen mbing jinying, tukez kasal kupan kwa pakampwil kwa trakt musu ukweta mutu wa mulong anch Ov, Usotil Wijika Uyakin? Tuchingejin anch kampany winou ukusadika mangand mawonsu ukez kulangwish kusanger kutesh musul umwing kusu wa uyakin.—Yoh. 17:17.
2 Trakt winou ukwet yakul ya Bibil piur pa yipul musamban ya usey: “Ov, chakin kamu Nzamb utubangidin?” “Ov, njit ni mar yikez kapwa?” “Chom ik chikata kutushiken pitufilinga?” “Ov, kudi ruchingej kanang piur pa afu?” “Mutapu ik nifanyidina kulembil chakwel Nzamb antesha?”
ni “Mutapu ik nikutwisha kushiken ku kutan musangar mu mwom?” Maegliz ma Kristendom kimakezap kulet yakul yiwamp ku yipul yiney. Ap antu avud alondila anch kadiap kwau in Kristu atonginap kal pa milong mud yiney, pakwez kakutwishap ijik yakul yiney ya zwang anch yidi mu Bibil. Chawiy lel, uruu winou ukuyisangaresh antu avud.
3 Lejan mu Teritwar Wey Mwawonsu: Sal usu wey ulejana ku chikumbu ni chikumbu anch chitwishikin chidia mu teritwar wey. Anch ukwet teritwar mujim, amakurump akukukasikesh chakwel usha kopi wa trakt ku yikumbu kwakad kwikal antu kapamp key ka kusambish kwez. Vurik kuyinkish amutej ney, anamakwey, antu wijikijadina nau ku mudimu ap ku shikol kopi umwing wa trakt, ni antu akwau ukata kwambambang nau. Pamwingap ukutwish watenchik yom yey chakwel usala mudimu wa chibol nkwash pa Mwinkind ap pa Kalang. Ov, ukwet mwan ap muntu wilejina nend Bibil uyila nawamp kurutu muspiritu ni ukutwisha kuwanyish yitinau ni ukutwisha kwinung netu mu kusal kampany winou mud mwin kulejan wakad kubabatishiu? Anch mwawiy, yileja amakurump.
4 Yiukulonda: Chakwel anch uyileja antu avud uruu winou, chiwapin wiswipisha mazu mey ma kusambish nich mambamb. Ipula adia ku yikumbu chimwing cha yipul musamban yidia pa chibur ni yangany kapamp kamwing ku chakul chidia mu trakt. Winou wawiy mutapu ukuyitwishisha in kulejan ambatinisha mazu mau ma kusambish nich mambamb ni maswir ma teritwar. Anch wasanger, fund ni muchirikina. Kwinsudiel kwa rubing, chitwishikin kumupan trakt pamwing ni magazet masu. Anch kampany wapwa pa Kalang 16, tukez kupan buku Chifundishinay Bibil. Matrakt mawonsu makeza kushalap akumasadin mudi matrakt mawonsu madiaku.
5 Sambish Dilejan dia Bibil: Trakt winou amurijekin chakwel atukwasha kusambish malejan ma Bibil. Chisu umuchirikidina muntu wasangaredina, ukutwish wamwipul anch uyakin udia mu Bibil wakwongojina? Muleja paj wansudiel ulejena mutapu wetu wa kwilej Bibil, ni mwinkisha buku Chifundishinay Bibil. Anch chitwishikin, isambany nend paragraf umwing ap maad madia mu shapitre wisambidina piur pa mutu wa mulong watondangay.
6 Yehova uyikimbin antu akumwifukwila ndiy ‘mu spiritu ni uyakin.’ (Yoh. 4:23) El etu awonsu tusalany kampany mulong wa kuyikwash antu ezang ku uyakin!