Sadilany Matrakt Mulong wa Kupalangesh Rusangu Ruwamp
1. Ov, mutapu ik antu a Nzamb asadidina matrakt?
1 Atuman a Yehova asadila matrakt mengamidina pa Bibil pasutin kal mivu yivud mulong wa kupalangesh rusangu ruwamp. Mu muvu wa 1880, mukadivar C. T. Russell ni arund nend a mudimu asambisha kubudish Tracts des Étudiants de la Bible ni matrakt minam amapananga kudi in kutang Chinong cha Kalam chakwel amapalangesha kudi antu. Matrakt mading ni usey ukash mu muvu wa 1884 chisu chafundishay mukadivar C. T. Russell chapu kurutu kwa mburamatad nich rutong ra kukasikesh yisakin ya Want, dizu “trakt” adiwejina ku dijin dia Zion’s Watch Tower Tract Society, ditazukinau katat anch Watch Tower Bible and Tract Society of Pennsylvania. Mu muvu wa 1918, in Kwilej Bibil apalangesha mamiliyon 300 ma matrakt ni kusut. Matrakt madandamedina kwikal yom ya mudimu yikwet usu wa kupan nich uman.
2. Ov, mulong wak matrakt madia ma ukwash?
2 Mulong Wak Madi ma Ukwash: Matrakt makweting ulomb wa ufun ni masangareshining kumatal. Makwet uruu wa mu wiswimp uswapela kutang ni wa usey. Mayisangareshining in chikumbu ovilinga wom wa kutambul gazet ap buku. Maswapeling ku mapan ap kudi in kulejan asu ni an. Chikwau kand, maliminingap ni matuswapediling kumasend.
3. Lond uman wey amwiney ap uman wafundau umekeshina usey wa matrakt.
3 Antu avud ileja kapamp ka kusambish uyakin kusutil ku trakt. Chilakej, mband umwing wa mu Haïti wamana umwing wa matrakt metu mu balibal. Wamunona, wamutanga ni walonda anch: “Natana kal uyakin!” Kupwa, waya ku Chot cha Want, wasambisha kwilej Bibil ni watambula dibabatish—chamushikija ku yom yiney yawonsu chading mulong wa usu wa Dizu dia Nzamb diatanay mu trakt.
4. Ov, chisu tupanininga matrakt pa ngond, rutong retu ridi ik?
4 Ku Chikumbu ni Chikumbu: Mulong matrakt madi yom ya mudimu ya ukwash ya kupan nich uman, akez kumapan pa ngond chisu ni chisu, kusambishin pa Kalang. Rutong retu ridiap ching kusu ra kupan matrakt pakwez ridi ra kusadil matrakt chakwel tusambisha minsamb. Anch muntu wamekesh musangar kapamp ka kumanijan nend ap ka kumuchirikin, tukutwish kumekesh mutapu usadikininga dilejan dia Bibil kusutil ku sadil buku Chifundishinay Bibil ap mukand ukwau wa kwilej nich. Ov, mutapu ik tukutwisha kupan matrakt ku chikumbu ni chikumbu? Trakt win wawonsu ushalijadining ni mukwau, chawiy lel tuswiridin kwijikijan ni matrakt mitupanininga.
5. Ov, mutapu ik tupanininga matrakt ku chikumbu ni ku chikumbu?
5 Matrakt tupanininga mafanyidin kwambatan nich maswir ma teritwar. Tukutwish kusambish misamb ni mwin chikumbu kusutil ku kumwinkish trakt. Paj wa kusambish ukwet yom yiwamp yikutwisha kulangwish musangar wend. Ap tukutwish kumekesh matrakt kushalijan ni kumulej mwin chikumbu atonda matrakt ik mamusangareshina. Chisu tusadininga mu teritwar mudia antu idjidjekininga kwazuril yis yau, tukutwish twalam trakt ku makas chakwel mwin chikumbu amumana, ap tukutwish kumwit chakwel tuteka trakt kwishin kwa chis ni kumwipul aleta chitongijok chend. Anch mutu wa mulong wa trakt udi chipul, tukutwish twamwipul kand amekesha chitongijok chend pa chipul chinech. Ap tukutwish kusadil chipul cha ayinetu chikutwisha kulangwish musangar wend ni kusambish minsamb. Pakwez tukutwish kutang chikunku cha yom yidia mu trakt pamwing ni mwin chikumbu, kushinshikin pa yipul yidia mu mufund ni kumwit mwin chikumbu aleta chitongijok chend. Maverse ma usey mafanyidin kumatang mu Bibil. Kupwa kwa kushinshikin yom kanang, tukutwish kupwish minsamb ni kutenchik program pakat kulab chakwel tumuchirikina muntu umekeshina musangar. Yisu yivud anch chikumangen chipaniningap mikand ku chikumbu ni chikumbu, tukutwish twasha trakt anch mwin chikumbu kadiapaku.
6. Ov, mutapu ik ukutwishau kusadil matrakt mu kupan uman wa mu balibal?
6 Kupan Uman wa mu Balibal: Ov, wasadinap kal matrakt mulong wa kupan uman wa mu balibal? In kusut mwi njil amwing ayiling mau-mau ni kasotiningap kuyimik chakwel twisamba nau. Chikwikal chikasikena kujingunin mutapu udia musangar wau. Pa ndond pa kuyinkish magazet masu pakad kwijik anch akez kumatang, ov, mulong wak chiwapin kuyinkish matrakt? Mulong paj wa kusambish usangareshining ni ukwetining uruu wa mu wiswimp, kusot kwijik kukutwish kwayibachik antu kutang matrakt pakwetau maminit makemp. Chawiy lel, anch in kusut kayilap mau-mau, tukutwish kwisambin pamwing nau yom yimwing yidia mu trakt.
7. Lond uman umekeshina mutapu wa kusadil matrakt chisu cha kupan uman wa kukashimwish.
7 Uman wa Kukashimwish: Chiswapeling kupan uman wa kukashimwish nich matrakt. Mukadivar umwing utekining matrakt makemp mu dibeng diend padiokilay ku chikumbu. Patanijadiningay ni muntu kanang, mudi mwin makashing, ndiy wamulej mu wiswimp anch nikwet chom kanang cha kutang ni wamwinkish trakt. Chisu chayau ambay a uruw amwing ku Musumb wa New York chakwel anyingumokaku, awiy atonga anch akutwish kutanijan ni antu adiokila mu mangand kushalijan. Chawiy, asenda kabuku Une bonne nouvelle ni matrakt mavud mu jindim kushalijan. Kupwa, pateshau muntu kanang wading ulondina rudim ra wingendj walandishanga yom pansh ap wading ushicha piswimp nau mu park ap mu restoran, awiy amwinkisha trakt mu rudim rend ra chivadik.
8. Mu mutapu ik matrakt madi mudi jimbut?
8 “Kunany Jimbut Jen”: Matrakt makutwish kwikal mudi jimbut. Ndim ukunyining jimbut jend pakad choy mulong kijap jisu jimwing jikeza kukul ni kusong. Mulej 11:6 ulondining anch: “Kunany jimbut jen mu chisu cha pamanch, kunany kand jikwau chisu cha urel, mulong en kiwijanyap anch mbut ja pamanch ap ja urel jawiy jikusonga nawamp.” Chawiy lel, tukutwish “kupalangesh ronganyin” kusutil ku yom yiney ya mudimu yikweta ukwash nakash ya kupan nich uman.—Jinsw. 15:7.
[Wazo la fungu kwenye ukurasa 3]
Mulong matrakt madi yom ya mudimu ya ukwash ya kupan nich uman, akez kumapan pa ngond chisu ni chisu, kusambishin pa Kalang