Yakul ku yipul yen

◼ Ov mutapu ik ukutwishau kumukwash mwin kulejan wakad kulet rapor mu chirung cha angond avud chakwel awanyish kand yifanyidina mud mwin kulejan wa rusangu ruwamp?

Anch muntu udia mwin kulejan wakad kupanang rapor wamekesh rusot ra kashinsh ra kumusadil Yehova, chinech chidi chom cha musangar. (Luka 15:​4-6) Chakin anch, walikidil rupompat ap mikadil yikash ya mwom, yimukangesha kwilej kwa amwinend Baibel, kukumangan, ni kubudikin mu mudimu wa chingand. Ov mutapu ik ukutwishau kumukwash chakwel aya kurutu muspiritu?

Etu awonsu tufanyidin kukwat chiyul cha kumumekeshin muntu mwinou rukat retu ra kashinsh ra Ukristu. Amakurump akwikal tayad kujingunin nawamp nswir jend ja muspiritu. (Jak. 5:​14, 15) Anch kuburen kwend kupan rapor kwalabin chirung chimwing chiswimp, ukwash wa mwin kulejan umwing chifuvu ukutwish kwikal chom chiswiridinau chakwel kuvuvuril muntu mwinou mu mudimu wa chingand. Pakwez, anch kadingap ni kukumangan chisu chilemp, chakin anch ukwikal kuswir ni ukwash umwing ujim. Chakwel kukasikesh ritiy rend ni kujikitish kwend, chiwapidil kuchirikin kwilej nend Baibel mu buku umwing ufanyidina. Pa chinech, kalam a midimu ukumwit mwin kulejan umwing chifuvu atakela dilejan. (Heb. 5:​12-14; tal Yakul ku Yipul Yen mu Mudimu Wetu wa Want wa Kalang 1998.) Anch wij muntu umwing ukweta kuswir kwa ukwash mud winou, ambamb ni kalam a mudimu mu chikumangen chen.

Kurutu kwa kumwit muntu wakad kupanang rapor chisu chilemp kwez kubudikin kand mu mudimu wa kulejan, chiwapin anch amakurump aad amwendila chakwel kutal anch uwanyishin yitinau chakwel kwikal mwin kulejan wa Want. Akulondul mutapu wa kusal wa chilik chimwing ni ukatau kusal anch muntu musu usadina usu wa kuwanyish yitinau chakwel kwikal mwin kulejan wa rusangu ruwamp. (Tal Tour de Garde wa Kalang 15, 1988, paj 17.) Muntu wakad kupanang rapor ufanyidin kwikal ni rusot ra kashinsh ra kulejan rusangu ruwamp nau akwau. Ufanyidin kand kuwanyish yitinau mu buku Notre Ministère paj 99 ni kukumangan pakad kujing ku yikumangan ya chikumangen.

Kwikal ni yaku yiwamp ya muspiritu kukumukwash muntu uchirikina kukasikan ni kulam urund wend wa usey nend Yehova ni kudandamen kwendil mwi njil ya mwom wa chikupu. (Mat. 7:14; Heb. 10:​23-25) Anch wasal ‘usu wend wawonsu’ ni kukudish ngikadil ya Ukristu chakwel kujijaman chinech chikumukangesh kwikal kand ‘mwin usweral, ap wakad kusong mabuj’ mud mwin kwilej Mukristu.​—⁠2 Pita 1:​5-8.