Tuyikwashany Achirika Swa!

“Tukuya kudi nanyi? Ey yey ukweta mazu ma mwom wa chikupu.”—YOH. 6:68.

1. Chisu chamushau Yesu kudi in kwilej avud, chom ik chalonday Pita?

YESU KRISTU amusha dichuku dimwing kudi in kwilej avud alika malejan mamwing malejanay. Ndiy wayipula atwimbuy end anch: “Ni yen kand usotilany kuya?” Chad Pita wamwakula anch: “Mwant, tukuya kudi nanyi? Ey yey ukweta mazu ma mwom wa chikupu.” (Yoh. 6:51-69) Kwadingap ndond yikwau kwa kuya. Relijon wa Ayuda kadingap nich “mazu ma mwom wa chikupu” chawiy kand, ni nlel unou chitwishikinap kumatan mazu minam mu Babilon Mujim, want wa relijon wa makasu wa pa mangand. Kudi antu avud apumbuka ku chisak cha Nzamb, pakwez asotin kumusangaresh Yehova, “ijikany kand anch muten wen wa kulank mu tul wez kal” ni chirikany ku chisak.—Rome 13:11.

2. Ov, chom ik chiufanyidina kwijik mu manangu piur pa mulong wa dirumburish ap wa ujindj?

² Yehova wayibangina nakash amikoku a Isarel ashadika. (Tang Ezekiel 34:15, 16.) Chawiy chimwing, amakurump in Kristu akwet impu ni mujikit wa kumukwash muntu udia mudi mukoku wapumbukina kal ku chisak. Anch amwit mwin kulejan ileja ni muntu walikina kal kusal mudimu usotila ukwash, ov, chom ik chifanyidinay kusal anch muntu utakedila dilejan dined wajingunin anch muntu winou wasala chitil chijim? Pa ndond pa kumwinkish yiyul piur pa dirumburish ap pa mulong wa ujindj, mwin kulejan ukutwish wamulej anch aya akayileja amakurump. Anch kayilejinap amakurump, chad mwin kulejan amwinend ukuyilej amakurump.—Lev. 5:1; Gal. 6:1.

3. Chom ik chasalay muntu wadinga ni amikoku 100, pamanay anch umwing washadika?

³ Mu mutu wa mulong wasuta kal ou, wisambinang pa chilakej cha Yesu cha muntu wadinga nich amikoku 100. Pamanay anch umwing uburedin mu chisak, wayisha in 99 ni waya kumukimb win umwing washadika wang. Muntu winou wasangara nakash pamumanay! (Luka 15:4-7) Niyetu tukat kusangar chilik chimwing anch mukoku umwing wa Nzamb wadia uburedina mu chisak wachirik. Pamwingap amakurump ni yid yikwau ya chikumangen yikweta rukat yamwendila muntu winou wakad kusalang mudimu. Niyawiy adi asotil amumana muntu winou wachirik ku chisak chakwel isakina kand diking dia Nzamb, kumulam ni yiyukish yend. (Kuv. 33:27; Kus. 91:14; Jinsw. 10:22) Anch ikal nich mutapu wa kukwash pa mulong winou, ov, chom ik chikusalau?

4. Chom ik chifanyidina kujingunin kusutil ku Galatia 6:2, 5?

⁴ Pamwingap akutwish amukasikesh muntu chakwel achirika mu chikumangen ni kumwijikish nich riy anch Yehova uyikatin amikoku End ni witin ching yin yitukutwisha etu kusal. Mudi kwilej Mifund, kukumangan ku yikumangan ya Ukristu, ni kulejan rusangu ruwamp ra Want. Chikwikal chiwamp kutang Galatia 6:2, 5 ni kulond anch in Kristu akutwish akwashijan muntu ni mukwau, pakwez “muntu wawonsu ukez kasend chisend chend amwinend” cha muspiritu. Kwikil muntu ukutwisha kwikal ushinshamena kudi Nzamb mulong wetwetu.

Ov, “Yakamish ya Mwom” Yiyiziyishin?

5, 6. (a) Ov, mulong wak chidia cha usey ujim anch tuyitesha nawamp ambay alika kal kusal mudimu palondilau? (b) Ov, ukutwish nchik kuyikwash antu alika kal kusal mudimu chakwel atesha anch kulik kwinung ni antu a Nzamb kukat kuyishesh?

⁵ Chakwel kushinshikin mutapu wa kuyikwash ambay netu akaritiy alika kal kusal mudimu wa kulejan, amakurump ni in kulejan akwau aswila afanyidin kuyitesh nawamp win kamu palondilau antu inay. Tulonda anch udi mukurump, wayang kwendil ambay atijadina akad kwezang kand ku chikumangen mulong “yakamish ya mwom” yiyiziyishin. (Luka 21:34, Manswik Masu) Milong ya nfalang ap kuvul kwa yisend ya dijuku kukutwish kwayitwal pakemp-pakemp ku kulik mujikit wau wa muspiritu. Akutwish aswiriken ukwash, pakwez ufanyidin kuyilej patok anch kwiyauril kukutwishap kwayikwash. (Tang Jinswir 18:1.) Ukutwish wipul nich manangu anch: “Ov, usangerany kudiosh pawalikinanya kukumangan? Ov, mwom wa dijuku dien wapandakan kal kuwap? Ov, musangar wa Yehova uchidi ni katat musul wa usu wen?”—Neh. 8:10.

⁶ Kutongijokin pa yipul mudi yiney kukutwish kwayikwash antu alika kal kusal mudimu amana anch mulong wa kuburen urund wau ni chikumangen, mwikadil wau wa muspiritu ni musangar wau yakepin kal. (Mat. 5:3; Heb. 10:24, 25) Chikutwish kuyikwash ijika anch kukangany kwau kulejan rusangu ruwamp kwawiy kwayishikija ku kuburen musangar. (Mat. 28:19, 20) Chawiy lel, chom ik cha manangu chiyiwapidila kusal?

7. Tukuyikasikesh antu apumbuka ku chisak asala ik?

⁷ Yesu walonda anch: “Babalany, kangal michim yen yachinchik mulong wa kwifund kudia, ap kukwachik maar, ap mulong wa yakamish ya mwom . . . Chishany ku mes, lembilany yisu yawonsu chakwel wez urezikanyaku ku yom yiney yawonsu piyikumekana.” (Luka 21:34-36, MM) Antu apumbuka ku chisak pakwez asotil ikala kand nich musangar wadingau nich pasak akutwish ayikasikesh alembila chakwel atambula mwiku utumbila ni ukwash wa Nzamb, ni asala kukwatijan nich malembil mau.—Luka 11:13.

Kwisu Kwipwakalau?

8, 9. Ov, mutapu ik ukutwisha mukurump kutongijokin pamwing ni muntu wipwakala?

⁸ Antu adi akad kuwanyin, kukutwish kwikal kulik kwovijan, ni chom chinech chikutwish chamupwakesh muntu kanang. Antu amwing ipwakala pamumanau muntu kanang ulimishinau mu chikumangen wasal chom chidia chinyim nich yijidik yidia mu Bibil. Anch muntu walika kal kusal mudimu mulong wa chimwing cha yom yiney, mukurump umwendidila ukutwish wamulej patok anch Yehova kakatap kumupwakesh muntu ap umwing. Ov, mulong wak lel chimufanyidin achidija urund wend nenday Nzamb ni antu End? Ov, chimufanyidin muntu alika kumusadil Nzamb, oku wij nich kashinsh anch “nkalansambu wa mangand” wij yisadikinaku ni anch ndiy ukez kuyipwish pa chisu chau? (Dis. 18:25; Kol. 3:23-25) Anch muntu wipwakal ni wawa ku mujimbu, kakutwishap washal ulel pansh wakad kusot kutumbuk.

⁹ Pa kutal usu usadilay mulong wa kuyikwash muspiritu, mukurump ufanyidin kwisambin anch, nich kusut kwa chisu, antu avud amening anch, chom chayipwakesha kichidiap kand cha usey ujim. Chakin kamu, chom chayipwakesha chikutwish kwikal kichidikwap kand. Anch muntu wipwakala mulong anch amupupa, kulembil nakash ni kutongijokin kukutwish kwamushikij ku kutesh anch niyend amwinend warumbukaku mwi njil yimwing ap yikwau ni kafanyidinap alika dipup dined dimupwakesha.—Kus. 119:165; Heb. 12:5-13.

Ov, Chadinga Mulong wa Malejan?

10, 11. Ov, chitongijok ik chikutwisha kwikal cha ukwash mu kusot kumukwash muntu uteshina mutapu windjing malejan ma Bibil?

¹⁰ Antu amwing adiokala mu chisak cha Nzamb mulong kitiyijap malejan mamwing madia mu Mifund. In Isarel akolau mu usuk mu Idjibit “avuramen kand midimu [ya Nzamb]” yayisadilay ni ‘kachingejinap mu chiyul chend.’ (Kus. 106:13) Chikutwish chikal cha ukwash nakash kumuvurish muntu walika kal kusal mudimu anch “kashalapol ushishamena ni kubabal” uletin chakudia chiwamp cha muspiritu. (Mat. 24:45) Wawiy mutapu wilejay muntu uyakin. Ov, mulong wak ulikinay kukwat mupak wa kwendin mu uyakin kakwau?—2 Yoh. 4.

¹¹ Pa chisu cha kusal usu mulong wa kuyikwash antu apumbuka mu chisak cha Nzamb, mukurump ufanyidin kwisambin piur pa in kwilej amusha Yesu mulong alika malejan mend mamwing. (Yoh. 6:53, 66) Ku kukatul urund wau ni Kristu pamwing ni in kwilej end ashinshamena, ashadisha kusanger kwau yom ya muspiritu ni musangar wau. Ov, antu akatula urund wau nich chikumangen cha Ukristu atana kal ndond yikwau kudia yakudia yivud ya muspiritu? Bwat, kiyadiakwap!

Ov, Chadinga Mulong wa Chitil?

12, 13. Anch muntu wapumbuka ku chisak witiyij anch wasala chitil chijim, chitwishikin kumukwash mutapu ik?

¹² Antu amwing alika kulejan ni kukumangan ku yikumangan mulong asala chitil chijim. Akutwish atong anch, anch ayilej amakurump chitil chau, akutwish ayopat. Pakwez kakutwishap ayopat mu chikumangen anch alika chisal chifishinau nich mu Mifund ni anch it chakin kamu dilikishin. (2 Kor. 7:10, 11) Pakwez, akez kuyak kand, ni amakurump akez kuyinkish ukwash uswiridinau.

¹³ Anch udi mwin kulejan uswila witinau chakwel umukwasha muntu walika kal kusal mudimu, ov, chom ik ukusala anch wakulej anch wasala chitil chijim? Mudi mutwisambina kwiur oku, pa ndond peyey kwiyandjik mu mulong winou, muleja isamba ni amakurump. Pakwez anch kasotilap kusal mwamu, ukutwish wamekesh kubangin kwey pa dijin dia Yehova ni ukash wa muspiritu wa chikumangen ku kusal kwey kukwatijan nich umutakel wa Nzamb pa milong yiney. (Tang In Levi 5:1.) Amakurump akwijik mutapu wa kumukwash muntu winou usotila kuchirik chakwel ashakama kukwatijan nich rusot ra Nzamb. Chisu chimwing kukwit dipup dia rukat. (Heb. 12:7-11) Anch muntu witiyij anch wamusadidil Nzamb chitil, anch walika kal kusal chitil chinech, ni chakin kamu wit dilikishin, amakurump akumukwash, ni Yehova ukutwish wamulikishin.—Isay 1:18; 55:7; Yak. 5:13-16.

Kuchirik kwa Mwan Kuletina Musangar

14. Shimunin chishimu cha Yesu cha mwan washadika mu mazu mey.

¹⁴ Pa chisu cha kusot kumukwash mukoku wapumbuka, muntu utondinau chakwel amukwash ufanyidin kuvurik chishimu cha Yesu chidia mu Luka 15:11-24. Mu chishimu chinech, nsand umwing washadisha uswan wend mu masandj. Kupwa weza kukis nakash mwom wa kwimik dis wadingay nich. Wafa nzal, wayiburena anvaj ni anamakwend, chawiy wakwata mupak—wachirika kwol kwau! Padingay uchidi kulemp, tatukwend wamumana, waya mau wakamuwil mwi nshing, wamususu cha rukat, ni wizulijana nich musangar. Kutongijok pa chishimu chinech kukutwish kwamukasikesh muntu wapumbuka chakwel achirika mu diyind. Mulong ditenchik dined dia yom dikusul piswimp kamu ap, chimufanyidina ‘achirika kwolikwau’ pakad kulabijok.

15. Ov, mulong wak ukatau antu amwing kupumbuk ku chikumangen?

¹⁵ Antu avud apumbuka ku chikumangen kadiap kamu mudi mwan washadika. Kudi amwing, apumbukining pakemp-pakemp, mudi muukata waat kupumbuk nich kupempam pakemp-pakemp kudiokal ku chikum. Antu amwing akwachikining nakash nich yakamish mu chilik cha kushadish kuman yom mwi njil ya muspiritu. Akwau niyawiy akat kwipwakesh ayinau kudi muntu umwing udia mu chikumangen, ap adiokiling kwau mulong kitiyijinap malejan kanang madia mu Mifund. Akwau niyawiy akat kuwil mu chitil. Pakwez, yiyul yisambidinau kukwatijan nich milong yiney umwing ni umwing yikutwish yakukwash mutapu wa kuyikwash antu adiokala mu chisak mulong wa mayingishin minam ap makwau chakwel achirika pikuchidia chisu ap.

“Mwanam, Wachirik kal Kolikwen!”

16-18. (a) Mutapu ik mukurump umwing mwamukwashay mukadivar umwing wadinga walika kal kusal mudimu mu mivu? (b) Ov, mulong wak mukadivar winou walika kusal mudimu, mutapu ik wamukwashau, ni mutapu ik wamwakau mu chikumangen?

¹⁶ Mukurump umwing mwin Kristu walonda anch: “Chisak chetu cha amakurump chisangaredining nakash kuyendil antu alika kal kusal mudimu. Natongina piur pa mukadivar nileja nend ni nakwasha chakwel eza ku ronganyin ra uyakin. Walika kusal mudimu pasutil kal mivu 25 ni wadinga mu mwikadil umwing ukash, chawiy nayirumburila anch kusadil yijidik ya muspiritu yidia mu Bibil kukutwish kwamukwash. Kupwa kwa kusut kwa chisu kanang, wasambisha kwez ku Chot cha Want ni witiyija ilejirila kand Bibil chakwel kumukwasha kukasikesh mupak wend wa kuchirik kand ku chisak.”

¹⁷ Ov, mulong wak mukadivar winou walika kusal mudimu? Ndiy ulondil anch: “Nasambisha kubangin nakash milong ya mangand kupandakanamu pa milong ya muspiritu. Kupwa nalika kwilej, nalika kulejan, ni nalika kukumangan ku yikumangan. Chom cha kaad chinijika, chadinga anch kinidiap kand chidi cha chikumangen cha Ukristu. Pakwez kwinbangin kwa pakampwil kwanbanginau kudi amakurump kwankwasha chakwel nichirika.” Milong yiney yadingay nich mukadivar yasambisha kumekan pitiyijay kwilejiril kand Bibil. Ndiy ulondil anch: “Najingunin kal anch nadi niburedin mu mwom wam rukat ni umutakel wa Yehova ni dirijek diend.”

¹⁸ Ov, mutapu ik wamwakau mukadivar winou mu chikumangen? Ndiy ulondil anch: “Niyovil mudi mwan washadika wisambidinay Yesu Kristu. Chakin kamu, umwing wa anambaz etu amapal wadinga mu chikumangen chinicha mu mivu 30 ni kusut ni uchidi ni katat mukash wangela anch, ‘Mwanam, wachirik kal kolikwen!’ Chom chinech chankwata ku muchim. Chakin kamu nachirika kwolikwetu. Ni nisotil nilonda patok kusanger kwam rukat, kuzangurok, kushimpish muchim, ni kwinbangin kwamekeshinau kudiay mukurump ni chikumangen chawonsu. Kumukat kwau Yehova ni mukwau muntu chakin kamu kwankwasha nichirika ku chisak.”

Yikasikeshany Akwata Mupak Nlel!

19, 20. Ov, mutapu ik ukutwisha kuyikasikesh antu alika kal kusal mudimu chakwel achirika ku chisak pakad kulabijok ni mutapu ik ukuyilejanya anch Nzamb kayichingejidinap asala yivud?

¹⁹ Tushich mu machuku mansudiel, ni nsudiel ya ditenchik dined dia yom didi piswimp. Chawiy lel, yikasikeshany antu alika kal kusal mudimu chakwel akumangana ku yikumangan ya Ukristu. Yikasikeshany asambisha kamu kukumangan katat. Yilejany anch Satan usadil usu wa kushesh urund wau ni Nzamb kuyishikij ku kutong anch akutwish iswedishaku ku yisend yilimina ya mwom anch alik difukwil diakin. Ukutwish wayinkishany kanshish anch ching kusu kusutil ku kwikal mwin kwilej ushinshamena wa Yesu chawiy chikutwishau kutan kwiswedish kwakin.—Tang Mateu 11:28-30.

²⁰ Yivurishany antu alika kal kusal mudimu anch Nzamb utuchingejin tusala yom yitukutwisha kusal. Chisu chamunyinyitau Mariy mpanyend a Lazar anch mulong wak wamuzizinay Yesu many madinga ma usey nakash kachisu kakemp kurutu kwa rufu rend, ndiy walonda anch: “Mulikany kwend amwinend. . . . Ndiy wasalang mudimu uwamp kudi am.” (Marko 14:6-8) Yesu wamujikitisha mwad-a-mufu wapana kamulambu kakemp ku tempel. Niyend wasala yadinga yitwishinay kusal. (Luka 21:1-4) Avud adia pakach petu akutwish akumangan ku yikumangan ya Ukristu ni kusal mudimu wa kulejan Want. Nich ukwash wa Yehova, antu avud alika kal kusal mudimu akutwish niyawiy kusal mwamu.

21, 22. Ov, kanshish ik kafanyidina kuyinkish antu achirikina kudiay Yehova?

²¹ Anch muntu udia mudi mukoku wapumbuka ku chisak woviling wom wa kuyiman kand akadivar nau, ukutwish wamuvurish musangar wadingaku pa chisu chachirikay mwan washadika kwolikwau. Antu achirikina mu chikumangen adi musul wa musangar mudi winou. Yikasikeshany akwata mupak nlel wa kumulik Djabul chakwel amushejina Nzamb.—Yak. 4:7, 8.

²² Kuyak kwa musangar kuyichingedin antu achirikina kudiay Yehova. (Kud. 3:40) Pakad kwidjidjek, yom yamanau mu mudimu wa Nzamb yayiletina musangar ujim. Dikez dia yiyukish diyichingedin antu achirikina ku chisak pakad kulabijok!

Ov, Ukwakul Nchik?

• Ov, mutapu ik ufanyidina kumukwash mwin Kristu wipwakala ni walika kal kusal mudimu?

• Chitongijok ik chikutwisha kumukwash muntu wadiokala mu chisak cha Nzamb mulong wa kuman kwend piur pa malejan kanang?

• Ov, chitwishikin nchik kumukwash muntu widjidjekina pa kuchirik ku chikumangen?

[Chipich chidia pa paj wa 13]

Tesh nawamp win kamu palondilau ambay akaritiy akad kusalang mudimu yom yidia mu michim yau

[Chipich chidia pa paj wa 15]

Kutongijokin pa chishimu cha Yesu cha mwan washadika kukutwish kwamukasikesh muntu wapumbuka chakwel achirika mu chisak