Tuyikwashany Apumbukina Ku Chisak

“Tusangarany ni yamam, mulong namutan kal mukoku wam washadikina.” —LUKA 15:6.

1. Mutapu ik wimekeshay Yesu kwikal kafung mwin rukat?

YESU KRISTU mwan kapokal wa Yehova, amutazukining anch: “Kafung mujim wa amikoku.” (Heb. 13:20) Mifund yasambela kwisambin piur pa kwez kwend, ni yalejana anch ndiy wadinga Kafung wa pakampwil wadinga ni kuyikimb “amikoku . . . ashadikina” a Isarel. (Mat. 2:1-6; 15:24) Chikwau, mudi mukatay kafung wakin kupan mwom wend mulong wa kuyichidij amikoku end, Yesu wafa mudi mulambu wa difut mulong wa antu adia mudi amikoku akutwisha kwisakin ayinau mulambu wend.—Yoh. 10:11, 15; 1 Yoh. 2:1, 2.

2. Chom ik chikutwisha kuyishikij in Kristu amwing ku kulik kusal mudimu?

² Cha ushon, antu amwing amekana anch asangaredin mulambu wa Yesu ni ipana kudiay Nzamb kadingap kand yid ya chikumangen cha Ukristu. Kusul ku muchim, kuyelol ku mujimbu, ap yom yikwau yikutwish yaziyish mushiku wau ni kuyishikij ku kulik kusal mudimu. Pakwez, mudi chichidiau yid ya chisak cha Nzamb akutwish asanger kushakam zoong ni musangar wisambidinay David mu Kuseng wa 23. Chilakej, ndiy wawanga anch: “[Yehova, NW] Ndiy kafung wam. Kinikusotip kwam chom.” (Kus. 23:1) Antu adia mu chisak cha Nzamb kaburedinap chom ap chimwing muspiritu, pakwez kichidingap mwamu ku mutambu wa amikoku apumbukina. Ov, nany ukutwisha kuyikwash? Ov, mutapu ik chitwishikina kuyikwash? Chakin kamu, chom ik chifanyidina kusal chakwel kuyikwash achirik kand ku chisak?

Nany Ukutwisha Kuyikwash?

3. Mutapu ik wamekeshay Yesu yom yiswiridikina chakwel kuyichirish amikoku ashadikina ku madil ma Nzamb?

³ Chitining usu ukash chakwel kuyichirish amikoku ashadikina ku madil ma Nzamb. (Kus. 100:3) Yesu waleta chifanikesh cha chom chinech palonday anch: “Muntu anch ukwet chitot cha amikoku, ni umwing wa pakach pau anch wapumbuk mwindj, komb kakushap makum chidivu ni chidivu ni kuya mu mikandu ni kusot wapumbukina washadik? Anch mwamu, pakumutanay, chakin kamu nakulejany anch, ndiy ukumuzangijadil chipandikenamu makum chidivu ni chidivu akad kupumbuk. Mwamu kand mudia rukat ra Tatukwen udia mwiur, kasotilip umwing wa mu an akemp ang ajiya.” (Mat. 18:12-14) Ov, nany ukutwisha kuyikwash antu inay adia mudi amikoku apumbukina ku chisak?

4, 5. Ngikadil ik yifanyidinau kwikal nich amakurump pantaliken nau amikoku a Nzamb?

⁴ Anch amakurump in Kristu asotil kuyikwash amikoku apumbukina, chiyifanyidin kwijik anch chisak cha Nzamb chidi chikumangen cha antu ipana kal kudiay Yehova—inge, ‘amikoku awamp a mu madil ma Nzamb.’ (Kus. 79:13) Amikoku inay aswirikedin kuyilam nich ranaken, ni chirumburikin anch atufung in rukat afanyidin kuyisanger umwing ni umwing wau. Kuya kuyendilang kwa urund kukutwish kwasong mabuj mawamp. Dikasikesh dia rukat diyinkishinau kudi kafung dikutwish diayikasikesh muspiritu ni kulangwish maku mau ma kuchirikin ku chisak.—1 Kor. 8:1.

⁵ Atufung a chisak cha Nzamb akwet mujikit wa kuyikimb amikoku apumbuka kal ni kupakish kuyikwash. Kambuy Paul wayivurisha amakurump in Kristu adinga mu Efes pasak piur pa mudimu wau wa ukafung pa chisu chalonday anch: “Babalany ayinen, ni kudi chisak chawonsu cha amikoku mwakuswanishilanyau en atufung a kulam kudi [spiritu utumbila], kuyidish in chikumbu cha Mwant chalanday nich mash” ma Mwanend. (Mid. 20:28) Chawiy chimwing, kambuy Pita niyend wayinkisha amakundj amakurump azizidilau many nkand yiney anch: “Lamany amikoku a Nzamb adia mukach mwen, kangal mudi kuyikadish, salany mu rusot ra Nzamb; kangal mulong wa kusot kwa yom, pakwez ni kutakaman; kangal wikalany mudi ant piur pau, pakwez mekeshany chilik chiwamp kudi amikoku.”—1 Pita 5:1-3.

6. Ov, mulong wak nlel amikoku a Nzamb aswiridin ukwash wa atufung?

⁶ Atufung in Kristu aswiridin kumwimburij Yesu, “kafung muwamp.” (Yoh. 10:11) Ndiy wayibangina nakash amikoku a Nzamb ni wakasikeshina usey wa kuyilam pamulejay Simon Pita chakwel ‘ayidisha an a amikoku End.’ (Tang Yohan 21:15-17.) Amikoku aswiridin pakampwil kuyibangin mwi njil yiney nlel, mulong Djabul usadil usu wend nakash chakwel ashesha kushinshaman kwa antu ipana kal kudiay Nzamb. Satan ukat kusadil kuziy kwa mujimbu wa mbij ni kusadil mangand chakwel ayishikija amikoku a Yehova ku kusal yitil. (1 Yoh. 2:15-17; 5:19) Antu alika kal kusal mudimu aswapeling nakash ni chawiy chiswiridinau ukwash chakwel asadila chiyul cha ‘kwendil ku spiritu.’ (Gal. 5:16-21, 25) Chitining kumulembil ni kumuchingejin nakash Nzamb chakwel kuyikwash amikoku inay, umutakel wa spirut wend, kusadil mu mutapu uwamp Dizu diend.—Jinsw. 3:5, 6; Luka 11:13; Heb. 4:12.

7. Chidi cha usey ujim mudi ik kudi amakurump kuyifung antu adia mudi amikoku alaminau?

⁷ Mu Isarel pasak, kafung wadinga ni kusadil mukombu ulemp, ap ka kabobu, mulong wa kuyitakel nich amikoku. Pa chisu chandaminau ap chibudikinau amikoku mu diyind, ‘akusutin mwinshin mwa mukombu’ ni chawiy kafung ukutwish kuyichind. (Lev. 27:32; Mike 2:12; 7:14) Chawiy chimwing, kafung mwin Kristu, uswiridin kwijik nawamp amikoku a Nzamb ni kwijik chidiay umwing ni umwing. (Isikej Jinswir 27:23.) Chawiy lel, ukafung udi umwing wa midimu yijim yikatau kwisambin yisak ya amakurump. Pamwing nich kusal yitenchik chakwel kuyikwash amikoku apumbukina kal. Yehova amwinend walonda anch ukuyikimb amikoku end ni kuyilam mudi muchifanyidina. (Ezek. 34:11) Chawiy Nzamb ukat kusangar nakash pakatau amakurump kusal mwamu mulong wa kusot kuyikwash amikoku apumbuka kudiokal ku chisak.

8. Mutapu ik ukutwisha amakurump kumwinkish mukoku ukwash wa panrend?

⁸ Anch mbay netu muka ritiy uyedil ku mujimbu, kumwendil kudi kafung wa chisak cha Nzamb kukutwish kwikal musul wa musangar ni wa dikasikesh. Mwamu chidinga kand anch muntu uyedila muspiritu amubangin pakampwil. Amakurump akutwish atang mifund, kuchirikin mutu wa mulong kanang, kwisambin manans majim ma yikumangan, kulembil pamwing ni muntu walikina kal kusal mudimu, ni kusal kand yom yikwau. Akutwish amwijikish anch yid ya chikumangan yikusangar nakash anch yamuman wasambish kand kukumangan. (2 Kor. 1:3-7; Jas. 5:13-15) Kumwendil, kumutazuk ku telefon, kumufundin mukand yikutwish yamukwash nakash! Kumukwash panrend mukoku wakad kwikal mu chisak kukutwish nikwawiy kwamuvuvurishin musangar wa riy ra kafung mwin Kristu umukwashina.

Kusadil kwa Pamwing

9, 10. Ov, mulong wak ufanyidina kulond anch kumubangin mukoku wapumbukina kal kuyitadilap ching kusu amakurump?

⁹ Tushich mu yisu yikwatikena nakash ni ya mar makash, chawiy chitwishikin anch tukangany kuman anch mbay netu mwin kuyel uyil ni kupwepuk pakemp-pakemp ku chikumangen. (Heb. 2:1) Chikalap nchik mwamu, amikoku a Yehova akwet usey ku mes kwend. Umwing ni umwing ukwet usey, mudi muchidia chid ni chid cha mujimbu wa muntu. Chawiy lel, etu awonsu tuswiridin kuyibangin akadivar netu ni kumubangin chakin kamu umwing ni mukwau. (1 Kor. 12:25) Ov, mawiy manangu ukweta?

¹⁰ Ap anch amakurump awiy adinga kurutu mu mudimu winou wa kuyikimb ni kuyikwash amikoku apumbuka, pakwez kuyibangin ambay inay akaritiy kuyitadinap ching kusu amakurump in Kristu ayinau. Antu akwau akutwish asadil pamwing nau atufung inay. Tukutwish ni tufanyidin kuyikasikesh ni kuyikwash muspiritu akadivar ni anambaz etu aswiridina ukwash chakwel achirika ku chisak. Ov, mutapu ik chifanyidina kuupan ukwash winou?

11, 12. Ov, mutapu ik ukutwisha kwitapil dilau dia kumukwash muntu uswiridina ukwash muspiritu?

¹¹ Pa yisu yimwing, amakurump akutwish atenchik chakwel in kulejan a Want akweta ronganyin ileja Bibil ni antu alika kusal mudimu asotila kuyikwash. Rutong ra usu winou ridi ra kuvuvurish kand mu antu inay “rukat [radingau] nich pakusambish.” (Kubur. 2:1, 4) Chitwishikin kuyitung ni kuyikasikesh ambay akaritiy inay muspiritu kusutil ku kushinshikin malejan maburedinau padiau pol pa chikumangen.

¹² Anch amakurump akwit wileja ni mbay mwin ritiy uswiridina ukwash kanang muspiritu, mulembila Yehova chakwel atakela ni kuyukish usu wey usadila. Chakin kamu, “shikij mijikit yey kudi [Yehova, NW], ni yitongijok yey yakusal chom yikez kawanyin.” (Jinsw. 16:3) Tongijokin pa maverse ma Bibil ni manans makasikeshina ritiy miukutwisha kusadil mu mambamb pamwing ni aswiridina ukwash muspiritu. Tongijokin pa chilakej chiwamp cha kambuy Paul. (Tang Rome 1:11, 12.) Paul waswiridina nakash kuyiman in Kristu a ku Rome chakwel ayinkishaku yipan kanang ya muspiritu chakwel niyawiy ikala akash. Wachingejina kand anch niyawiy akumukasikesh. Ov, kitufanyidinap niyetu twikal nich manangu ma chilik chimwing pa chisu tusotila kumukwash mukoku wapumbuka ku chisak cha Nzamb?

13. Ov, yom ik ufanyidina kwisambinany pamwing ni muntu walika kal kusal mudimu?

¹³ Pa chisu chiwisambinany, ukutwish wamwipul anch: “Mutapu ik wileja uyakin?” Mukwasha avurika musangar wovay pasak, mukasikesha muntu walika kusal alonda yom yisangareshina yamanay ku yikumangan, mu mudimu wa kulejan, ni ku yitentam. Isambina pa yisu ya musangar yiwasutishanya pamwing mu mudimu wa Yehova. Isambina pa musangar wovila pa kumushejin kwey Yehova piswimp. (Yak. 4:8) Mekesh kujikitish kwey mulong wa yom yitenchikinay Nzamb mulong wetwetu antu end—pakampwil mulong wa kutwongoj ni kutwinkish ruchingej mu mar metu.—Rome 15:4; 2 Kor. 1:3, 4.

14, 15. Yiyukish ik ya usey yasangaredinau pasak antu alika kal kusal mudimu chifanyidina kuyivurish?

¹⁴ Chishimokishina, chikwikal cha ukwash kumuvurish muntu walika kal kusal mudimu yiyukish yimwing yadingay nich mudi chibudikin cha kwikal kwend mu uumwing nich chikumangen. Chilakej, chadinga chiyukish cha kwikal nich ronganyin ra Dizu dia Nzamb ni jintong jend. (Jinsw. 4:18) Padingay ni ‘kwendil ku spiritu,’ chadinga chimuswapedil kamu kujijamen ku yoziu ya chitil. (Gal. 5:22-26) Chikwau, kom kishitwila kamukwasha kumushejin Yehova mu malembil ni kusanger ‘chisambu cha Nzamb chisutila ronganyin rawonsu chilamina michim yetu ni yitongijok yetu.’ (Filip. 4:6, 7) Lam manans minam mu manangu, musangera chakin kamu, ni mu yawonsu mukasikesha mukadivar ney ap nambaz ney wa muspiritu chakwel achirika mu chisak.—Tang Filipoi 2:4.

¹⁵ Tulonda anch udi mukurump, usadil ukafung. Ukutwish wayikasikesh ambay atijadina alika kal kusal mudimu atongijokina pa chisu chilejau pa kusambish uyakin udia mu Dizu dia Nzamb. Uyakin wadinga wamushena mudi ik, wovikena kurumburik, usangareshina, ni wayikola muspiritu! (Yoh. 8:32) Michim yau yizulijana too nich kujikitish mudi ik mulong wa yom yilejau piur pa Yehova, rukat rend, ni jintong jend jamushena! (Isikej Luka 24:32.) Yivurisha urund wa piswimp wadingau nich ni Yehova ni dilau ditapidilau dia kutesh malembil madingau ni kulembil in Kristu ipana kal. Yikasikesha chakin kamu antu alika kal kusal mudimu itiyija kand “rusangu ruwamp ra uyaj wa Nzamb,” Yehova.—1 Tim. 1:11.

Dandamenany Kuyikat

16. Jimbul chilakej chilejena anch usu wa kupan ukwash wa muspiritu chakin kamu usongin mabuj.

¹⁶ Ov, yiyul yiney yisadiling chakin kamu? Inge. Chilakej, nsand umwing wikala mwin kulejan wa Want padingay ni mivu 12, walika kusal mudimu pawanyishay mivu 15. Kupwa weza kand kusambish kusal mudimu, ni wasala mudimu wa chisu chawonsu mu mivu 30 ni kusut. Kulank kwend muspiritu kwadiokala nakash-nakash ku ukwash wamwinkishau kudi mukurump mwin Kristu. Wawusangera ukwash winou wa muspiritu mudi ik!

17, 18. Ngikadil ik yikukukwasha chakwel umukwasha muntu wapumbuka ku chisak cha Nzamb?

¹⁷ Rukat rawiy rikata kuyibachik in Kristu ayikwasha atu alika kal kusal mudimu chakwel achirika kand mu chikumangen. Yesu walonda piur pa in kwilej end anch: “Napan kal chijidik chisu kudi en, chakwel en ukatijanany; mudi chinakukatanya en ni yen ukatijanany kand muntu ni mukwau. Ku chinech kwawiy kukwijikinau antu awonsu anch en udiany in kwilej amam anch wakatijanany.” (Yoh. 13:34, 35) Inge, rukat ridi chijiken cha in Kristu akin. Ov, kichifanyidinap kuyikat in Kristu ababatishau kal pakwez ikadila kal akad kusal mudimu? Chakin kamu chifanyidin kuyikat! Pakwez, pakwel anch tuyikwasha chikwit kusadil ngikadil yikwau kushalijan ya Nzamb.

¹⁸ Anch akwit kumukwash muntu kanang wapumbuka ku chisak cha Nzamb, ov, ngikadil ik yiufanyidina kusadil? Kuwejin pa rukat, ukutwish waswiriken kwikal nich ranaken, riy, kushimpish, ni kwitudish. Kukwatijan nich mikadil ya muntu, ukutwish kand waswiriken kwikal mwin kalimish. Paul wafunda anch: “Djalany mudi kanitondilanyau kudi Nzamb, atumbila ni akatijadina, ni michim ya kwovijan, ni kudimuk, kwikepish ni kwitudish, ni kushimpish michim; kangal wajimanijadinany muntu ni mukwau, likishijadinany anch kudi muntu ukweta mulong ni mukwau; mudi Mwant chakulikishilanyay en ni yen salany kand mwamu. Ni piur pa yom yiney yawonsu djalany rukat, wawiy mwoj uwanyidina ukasila yawonsu pamwing mu kwovijan.”—Kol. 3:12-14.

19. Ov, mulong wak chidia cha usey kusal usu wa kuyikwash antu adia mudi amikoku chakwel achirika mu chisak cha Ukristu?

¹⁹ Mutu wa mulong wa kwilej ulondwilaku ou ukwisambin mayingishin makata kuyishikij antu amwing ku kupumbuk ku chisak cha Nzamb. Ukwisambin kand mutapu uchingejidinau kuyak antu achirikina. Piwilejina mutu wa mulong wa kwilej winou, tongijokin pa muntu mudi winou, ikal nich kashinsh anch usu win wawonsu ukusala nich ruchingej ra kuyikwash antu adia mudi amikoku chakwel achirika mu chisak cha Ukristu udi wa usey. Mu ditenchik dined dia yom, antu akutwish asutish mwom wau wawonsu mu kusot mapit, pakwez mwom wa muntu umwing kusu udi wa usey nakash kupandakanamu nfalang jawonsu jidia mu mangand. Yesu wachikasikeshina chom chinech mu chilakej chend cha mukoku washadika. (Mat. 18:12-14) Vurik amboku mu manangu mey dinans dined piusadila usu wakin ni wa swa-swa mulong wa kuyikwash antu adia mudi amikoku akatinay Yehova nakash pakwez apumbuka kal chakwel achirika mu chisak.

Ov, Ukwakul Nchik?

• Chisend ik chikwetau atufung in Kristu pantaliken nau antu adia mudi amikoku pakwez apumbuka kal ku chisak?

• Ov, ukutwish nchik kuyikwash antu akad kwikal katat yid yisadila mudimu wa chikumangen?

• Ngikadil ik yikutwisha kukukwash chakwel uyikwasha antu apumbuka ku chisak?

[Chipich chidia pa paj wa 10]

Atufung in Kristu asadil usu nich rukat mulong wa kuyikwash antu apumbuka ku chisak cha Nzamb