Kulejan Nich Broshir Rusangu Ruwamp
1. Mutapu ik wafundau Broshir Rusangu Ruwamp?
1 Mudi mwisambinau mu nimero wa Ngond wa 7 wa Mudimu Wetu wa Want, chom chimwing cha usey chidia mu mushet wetu wa kulejan nich udi broshir Rusangu Ruwamp Ridiokila Kudi Nzamb! Maverse majimbwilau kamarumburilap mu broshir winou chakwel mwin chikumbu asangera kumatang mu Bibil wend. Chawiy lel mikand yetu yivud ya kwilej nich ayifundining mulong wa kumukwash mwin kutang atanga amwinend mu Bibil wend, pakwez broshir winou amufunda chakwel muntu ileja Bibil pamwing ni mwin kulejan. Chad, pitumupanina, tufanyidin kumulej mwin chikumbu mutapu wa kwilej nend chakwel asangera kwilej rusangu ruwamp ridia mu Bibil.—Mat. 13:44.
2. Mutapu ik tukutwisha kusadil broshir Rusangu Ruwamp kapamp ka kusambish?
2 Kapamp Kakusambish: Ukutwish kulond anch: “Nez kal mulong antu avud abangidin pa mutapu uyila mangand minam. Utongin anch mikadil ya mangand minam yikez kukarumuk? [Mulika akula.] Bibil ukwet rusangu ruwamp rikutwisha kutwinkish ruchingej. Pinap padi yipul yimwing yakwilau mu Bibil.” Mwinkisha mwin chikumbu broshir, ni muleja atonda chipul chidia pa chibur cha nsudiel. Kupwa muleja mutapu wa kwilej Bibil mu kusadil paragraf wa kusambish wa dilejan dined. Mutapu ukwau wa kusal udi wa kumwipul mwin chikumbu yipul yisangareshina yimedina pa dilejan utondina, ni kupwa muleja mutapu ukutwisha broshir kumukwash chakwel atana chakul mu Bibil. Anch dilejan dined dikwatijadin nich video udia pa kapend ka jw. Org, in kulejan amwing akumumekesh pambambinau.
3. Rumburil mutapu wa kutakel dilejan mu kusadil broshir Rusangu Ruwamp.
3 Mutapu wa Kutakel Dilejan: (1) Tang yipul yifundinau mu ulombu ujal chakwel umukwasha mwin chikumbu ashinshikina pa dinans dijim. (2) Tang paragraf ulondwilaku. (3) Tang maverse malela, ni mwipula nich manangu chakwel umukwasha mwin chikumbu amana mutapu wakwila maverse ku chipul chinech. (4) Anch kudi paragraf mukwau udia kwishin kwa chipul, chirikin kapamp ka 2 ni ka 3. Anch video ukwatijadin ni mutu wa mulong ni kandikal umumekesha kudi mwin chikumbu, mumekesha piwambambinanya. (5) Kupwa, mwipula mwin chikumbu chakwel wijika anch uteshin nawamp.
4. Chom ik chikutwisha kutukwash kusadil nawamp broshir winou?
4 Ijik nawamp mutapu wa kusadil broshir winou. Musadina pa yisu yawonsu yifanyidina. Kurutu kwa dilejan ni dilejan, tongijokin piur pa mwin kwilej ni mutapu uwamp wa kushinshikin nend, kusadil nawamp maverse madia mu dilejan. (Jinsw. 15:28; Mid. 17:2, 3) Piuyila kurutu mu kwikal nich ukaliweny, ukutwish kuman broshir winou mudi chom chimwing chiwamp cha kusadin mulong wa kuyifundish antu uyakin!