Tusambishany Malejan Nich Broshir Nzamb Witin
1 Marapor kudiokal mu mangand mawonsu malejen anch broshir Nzamb Witin Etu Tusal Ik? chidi chom cha mudimu chikweta usu chakwel kuyifundish antu uyakin. Rubing ni rubing akat kusambish tunan ni tunan twa malejan ma Baibel nich broshir winou. Ov watwishinap kal kusambish ni kwendish malejan ma Baibel nich broshir winou?
2 Anch chiyiswapedil amwing kupan broshir, amwing chiyikasikedin kwijik ya kulond chakwel kusambish dilejan. Mutapu ik ukatau kusal amwing chakwel kusambish malejan ma Baibel nich broshir Nzamb Witin? Yiyul yilondwila yikutwish kwikal ya ukwash.
3 Tulejanany Mutapu wa Kwilej: Pitwendidila muntu kapamp ka kusambish ap pitusadila kuchirikinimu kusu, pa ndond ya kumwit kusu mwin kwisamb netu kusambish dilejan dia Baibel, tukutwish kumulej mutapu tukata kwilej Baibel. Chinech chikutwish kudiosh kuburen kwovijan ni wom ukata kuvuvurish kud avud dizu “dilejan.” Anch twilej kamu mutapu wa kuchisal, tukez kuman anch nich mazu ma kufungul maswapela, tukutwish kusambish kapamp kamwing dilejan.
4 Kwirijek Kupandiken Usey: Mushiku wetu wa kusambish malejan ma Baibel wambaten nakash ni mutapu wetu wa kwirijek nawamp. Kwirijek kurutu kwa muten kukutukwash kupandikan chikak chawonsu tukutwisha kwikal nich pa kusambish ni pa kwendish malejan ma Baibel. Tuchirikinany tupamp tuvud mutapu wetu wa kupan uman, chinech chikutukwash kulond mutapu uwamp (tukuburenap ya kulond), tukutwish ayinetu kulond mutapu uwamp ni mu mazu metu ayinetu. Chinech chikutukwash, chidap kusu kwiswedish pakwez mwin kwisamb netu ukwiyov nawamp.
5 Pituchirikidinamu, chiwapil kwitekiliku chisu cha kumulej utwisambina nend chakwel ijika aminit inch tukusala pitumulejina mutapu wa kwilej. Kwinyim kwa kulangwishijan, mukadivar umwing ulondil anch: “Nisotin kukulej mutapu tukata kwilej Baibel. Chinech chitin kusu aminit atan. Ov, ukutwish kwinshilaku aminit atan nikuleja?” Difundish 1 dia broshir Nzamb Witin tukutwish kudilejan piswimp mu aminit atan. Chakin, tukutwish kutang ching kusu maverse matondinau, pakwez pa kupwish difundish dia kusambish mu aminit akemp kusu, mwin kwisamb netu ukwikal ni dilejan diend dia kusambish. Chad lel, tumwijikisha chisu tukuchirika ni kwez kwilej difundish 2, tukez kusal kusu aminit 15.
6 Mutapu wa kupan ulondwila ou wimekeshin wa mabuj:
◼ “Nisotin kukulej mutapu uswapela, wa kwilej Baibel nich ukwash wa broshir unou Nzamb Witin Etu Tusal Ik? Avud amen anch mu aminit akemp kusu 15 ku rubing mwi mbing 16, akutwish kuman yakul yisangarishina ya Mifund ku yipul yiney yijim ya Baibel.” Mu wiswimp tumuleja yidiamu. Tutala difunfish 1, ni kulond anch: “Anch ukutwish kutwinkishaku aminit atan, tusotin kukulej mutapu utukata kusal. Difundish 1 dikwet mutu wa mulong ‘Mutapu Ukutwisha Kuman Yitinay Nzamb.’ ” Kupwa tutanga yipul yisatu, ni kurumburil manimero madia mu jinkwat. Tutanga paragraf 1, ni kumulej mwin kwisamb netu mutapu wa kuman chakul. Tukutwish kumwit kutang paragraf 2. Chad lel tukutwish kulond anch: “Kulondulijan ni rusangu riner, mutapu ik ukwakula ku chipul chinech? [Tutanga kand chipul, ni tumwita mwin kwisamb netu kulond.] Tumen anch paragraf ni paragraf amulamakeshil nich maverse. Chidi mulong wa kupwitin yitongijok yetu ku chakul cha Baibel. Chilikej, tutanga 2 Timoteu 3:16, 17 ni kuman anch maverse minam makasikeshidin chakul chiwaletanga piur pa Sakatang wa Baibel.” Kwinyim kwa kutang paragraf 3, chipul, ni kutang Yohan 17:3, tupwitina yitongijok ya mwin kwisamb netu ku yilejinay kusutin kuchirikin Difundish 1. Anch twashiken pinap tukutwish kuya ku Difundish 2 ni kutang chipul cha nsudel anch: “Jisu njil jaad ja kumwilejin Nzamb?” Kupwa tumwipula anch: “Chisu ik tukutwisha kwikal ni aminit piswimp 15 chakwel twileja Difundish 2 ni kuman chakul?”
7 Chidi cha usey kwikal ni misamb yipipela ni kumujikitish mwin kwisamb netu pichitwishikina. Pitutenchikina kuchirikinimu kukwau, pa ndond ya kumwipul anch usotin kudandamen, tumukasikesha kushinshikin chilik chimwing difundish dikwambakenap. Tumwijikisha anch tusotin nakash kuchirik kapamp kakwau. Antwarubil amwing ipanin kwilejin ku telefon anch program wa kumanijan wakasikan. Tukutwish kand kumukasikesh muntu twilejina nend kulam nawamp broshir, kumutek ndond yimwing yifanyidina chakwel kumusadil pitukweza ni kumwendil.
8 Twikalany Ajijamena: Anch kwirijek kudi kwa usey, chitufanyidin kand kujijaman kulondul dilejan. Kufundish dilejan dimwing mu aminit akemp kukutwish kukasikan, chawiy lel tujijamany kuchirikin mulad wa kwilej tupamp tuvud mud kamu chiswiridikina chakwel kwendish mutapu uswapela dilejan. Tuchisalany nau antu awonsu itwinkishina uman, ku chis ni chis, uman wa kukashimun, ap wa ku telefon. Anch chitukasikedin kusambish dilejan dia Baibel, pikil twachirikin kwinyim bwat. Kutwish kwikal ni malejan ma Baibel kwitining kujijaman ni rusot ra kashinsh ra kupan uyakin kud akwau.—Gal. 6:9.
9 Anch twasadil yiyul yiney, ni yetu tukutwish kwitapil dilau dia kukwash muntu kanang mwi njil ya mwom, kusutin kusambish ni kwendish dilejan dia Baibel mu broshir Nzamb Witin.—Mat. 7:14.