Shapitre Wa Katan
Want Ipau wa in Kumwifukwil Yehova
1, 2. (a) Ov Nzamb wayinkisha antu a kusambish want ipau wa mutapu ik? (b) Jimbulap yijil yimwing yadinga ni kutakel mujikit wa Adam ni Ev.
YEHOVA payitangay ikundj ni mband a kusambish, adinga ni want ipau upandakenamu kamu kulemp want ipau win wawonsu ukwetau antu nlel. Chikumbu chau chadinga Paradis, Chir cha Eden chipandakena kuwap. Chadingau ni manangu ni mijimbu yiwanyidina, kwikil mayej ap kusu mamwing mayipisha kusanger kwau mwom. Kwadingap rufu radinga ni kuyichingelang awiy mud kamu rikata kuchingelang muntu ni muntu kudiosh pinipa. Chikwau kand, kadingap antu in kwitiy cha mwitiyil, pakwez, adinga ni chipan chipandakena kuwap cha want ipau wa kutond, ukaliweny wa kwikwatin mipak ayinau. Pakwez chakwel kudandamen kwikal ni want ipau upandakena kuwap mud winou, afanyidina kulimish yijil ya Nzamb.
2 Chilikej, shinshikin yijil yimwing ya uumb yatekay Nzamb. Chakin anch yijil yiney kayifundap mu buku kanang, pakwez Adam ni Ev ayitanga mu mutapu wa kwel anch chadinga chovikena chakin kud awiy kuyiziyil. Maku mau madinga ni kuyijikish kuswir kwa kudia; impu yau, kuswir kwa kuna; kuzwek kwa muten, ni kuswir kwa kulal. Yehova wayinkisha kand mudimu. Mudimu winou wadinga chilik chimwing mud chijil, mulong wafanyidina kutakel yisalijok yau. Ela kuval an, kuyikel milad yivud ya mwom ya panap pansh, ni kutanduril pakemp pakemp mimbu ya Paradis kushik ni pakusankenay pa divu pawonsu. (Disambishil 1:28; 2:15) Chadinga chijil chiwamp ni cha ukwash mud ik! Chijil chinech chayinkisha mudimu umwing wa kuyisangaresh mu chom ni chom, ni kuyitwishish kusadil mu chilik chimwing chijim ukaliweny wau mu mitapu yimwing ya ukwash. Chikwau kand, adinga ni want ipau ujim wa kwikwatin mipak piur pa mutapu wa kuwanyish mudimu wau. Ov chom ik kand chelau kwikal nich kuswir?
3. Ov mutapu ik welau kwilej Adam ni Ev kusadil nich manangu want ipau wau wa kukwat mipak?
3 Mwawiy, Adam ni Ev payinkishau chisend cha kwikwatin mipak, chinech kicharumburikap anch mupak win wawonsu ukutwishau kukwat ukwikal ni yibudikin yiwamp. Afanyidina kusadil want ipau wau wa kwikwatin mipak mukach mwa mimbu ya yijil ni yijidik ya Nzamb. Ov mutapu ik welau kwilej yijil ni yijidik yiney? Kusutin kumutesh Sakatang wau ni kushinshikin midimu yend. Nzamb wayinkisha Adam ni Ev manangu mafanyidina mulong wa kusadil yadingau ni kwilej. Chayitangau awanyidina, chibachikin chau cha chivadik chela kwikal cha kumekesh ngikadil ya Nzamb pakwatinau mipak. Mwamu lel mwelau kusal anch adinga chakin ni kujingunin nich kujikitish mulong wa yom yayisadilay Nzamb ni kusot kumusangaresh ndiy.—Disambishil 1:26, 27; Yohan 8:29.
4. (a) Ov chijil chayinkishau Adam ni Ev cha kulik kudia dibuj dia mutond umwing chadinga ni kuyikish want ipau? (b) Ov mulong wak chadinga chijil chimwing chifanyidina?
4 Chakin kamu, kupwa, Nzamb watonda kupak kwipan kwau kud ndiy mud Mwin Kupan Mwom wau ni rusot rau ra kushal alimishina mimbu yayitekinay. Yehova wamwinkisha Adam chijil chinech anch: “Ukutwish kudia kwey mabuj ma mitond yawonsu ya mu chir. Pakwez dibuj dia mutond ou wa ronganyin ra kuwap ni kuyip kangal kudidia. Mulong dichuku diukeza kudidia, chakin ukez kufa.” (Disambishil 2:16, 17) Kupwa kwa kumutang Ev, ni ndiy amwijikisha chijil chinech. (Disambishil 3:2, 3) Ov chijidik chinech chadinga ni kuyikish want ipau? Chakin anch bwat! Adinga ni yakudia yivud yisangareshina ya mitapu ni mitapu ya kudia wakad kubangaku dibuj dia mutond winiwa umwing. (Disambishil 2:8, 9) Chadinga kwau chifanyidin kujingunin anch divu didi diayen dia Nzamb, mulong ndiy waditanga. Chawiy lel ndiy ukwet mbil ya kutek yijil yifanyidina ku rutong rend ni ya kuyikwash antu. —Kuseng 24:1, 10.
5. (a) Ov mutapu ik washadishau Adam ni Ev want ipau wau wa uyaj wadingau nich? (b) Ov chom ik chashikena want ipau wadingau nich Adam ni Ev, ni mutapu ik chezina kwikal ni usu padi etu?
5 Pakwez chom ik chabudikinaku? Chadingay ni yitongijok ya choy, mwangel umwing wasadila nayimp want ipau wend wa kwitondin ni kwikalang kamu Satan, dizu dirumburikina “Mukarupompat.” Wamudimba Ev nich kumulej nich kashinsh kawonsu chom chimwing chakad kwambatan nich rusot ra Nzamb. (Disambishil 3:4, 5) Adam wamulondula Ev mu kujip chijil cha Nzamb. Chasendau chom chadinga chayen, ashadisha want ipau wau wa uyaj. Chitil chikala ni usu padi awiy, ni mud kamu mwayibabeshay Nzamb, kupwa rufu ralondulap. Ayishila anau uswan wa chitil—chimekedina ku chibachikin cha chivadik cha kusal yom yiyimp. Chitil chaleta kand kuziok kukata kulet mayej, kunanap, ni rufu. Chibachikin cha kusal yom yiyimp, kuwejinaku ni usu wa Satan, yawonsu yabudisha chisak chimwing cha muntu chizwila rusangu ra kukisijan, ubaj, kuzengol, ni jinjit jajipina mamiliyon mavud ma antu. Udi want ipau ushalijadina kamu kulemp mud ik nich wayinkishau antu kud Nzamb ku disambishil! —Kuvurik Yijil 32:4, 5; Job 14:1, 2, NW; Rom 5:12; Kujingunik 12:9.
Ndond Tukutwisha Kuman Want Ipau
6. (a) Ov ndond ik tukutwisha kuman want ipau wa kashinsh? (b) Ov Yesu wisambina want ipau wa mutapu ik?
6 Pa kuman mikadil yiyimp yidia ndond yawonsu nlel, chishimokishinap anch antu akat kukimb want ipau ujim. Pakwez ndond ik tukutwisha kuman want ipau wa kashinsh? Yesu walonda anch: “Anch en waziyilany malejan mam, en udiany in kwilejam chakin. Ukez kwijikany uyakin, chad uyakin ukez kukukwolany.” (Yohan 8:31, 32) Want ipau winou udiap mud ukatau kuchingejin antu pakatau kudiosh nyikel kanang ap mutapu kanang wa winyikel mulong wa kutekap mukwau. Pakwez, want ipau winou ukwet yibudikin kamu pa dishin dia milong ya ukamuntu. Want ipau wadingay ni kwisambin Yesu wadinga want ipau wa kukwolik ku uswik wa chitil. (Yohan 8:24, 34-36) Chawiy lel, ang muntu wikal mwin kwilej wakin wa Yesu Kristu, ukat kuman kukarumuk kujim mu mwom wend, kukwolik mu uswik!
7. (a) Ov mwi njil ik tukutwisha kwikal ni want ipetu kudiokal ku chitil katat? (b) Ov chom ik tufanyidina kusal chakwel twikala ni want ipau winou?
7 Chinech chirumburikinap anch katat in Kristu akin kakatap kwov yibudikin ya chibachikin cha chivadik pantaliken ni ngikadil ya chitil. Mulong aswana chitil, arishin nakash mulong wach ni katat. (Rom 7:21-25) Chakin kamu, ang muntu ushich kwambatan nich mafundish ma Yesu, kakez kwikalap muswik wa chitil. Ni chitil chikez kwikalap kud ndiy mud mwin kumushindil umwinkina mbil yifanyidinay kuziyil mud mputames. Kakez kwikalap mu mulad umwing wa mwom uburedina rutong ni ukumushila kom kamwing kayimp. Ukez kusanger kom katok kurutu kwa Nzamb mulong yitil yend ya pasak ayilikishina kal pa dishin dia ritiy rend mu yakupesh ya Kristu. Yibachikin ya chitil yikutwish kupakish kumekan patok, pakwez ang walik kuyisadil mulong uvurikin mafundish mishitwila ma Kristu, ukat kumekesh anch chitil chidiap mwant wend.—Rom 6:12-17.
8. (a) Want ipau ik utwinkishina Ukristu wakin? (b) Ov mutapu ik ufanyidina kwikal mwikadil wetu pantaliken nau anyikel a mangand?
8 Tushinshikinany want ipau tukweta etu in Kristu. Atukwola ku usu wa mafundish ma makasu, ku uswik wa wom udiokila ku kuburen kwijik, ni ku uswik wa chitil. Mauyakin mapandakena kuwap piur pa mwikadil wa afu ni divumbuk matukwodil ku wom wa afu wakad mwi njil. Kwijik anch maguvernema makad kuwanyin ma antu akumaswinkan katat kamu ak nich Want wa Nzamb kukat kutukol ku kuburen ruchingej. (Daniel 2:44; Mateu 6:10) Pakwez, want ipau mud winou umekeshinap chakin anch tulika kulimish in kutakel a winyikel ni yijil yau.—Titus 3:1, 2; 1 Pita 2:16, 17.
9. (a) Ov Yehova utukwashin nchik nich rukat kusanger want ipetu ujim nakash utwishikina katat kud antu? (b) Ov mutapu ik tukutwisha kukwat yiyul ya manangu?
9 Yehova kakatap kutulik twikimbina ayinetu kusutin yoziu ni yilim mutapu wa kushakam upandakena kuwap. Wij mutapu watusalay, wij yikata kutuletin musangar wa kashinsh, ni yikutuletina kuwap kwa chikupu. Wij nawamp yitongijok ni ngikadil yikutwisha kuyipish urund wa muntu nend Ndiy ni akwau antu, pamwing ap kumukangesh muntu winiwa kwandam mu mangand masu. Nich rukat, Yehova ukat kutwijikish yom yawonsu yiney kusutil ku Baibel ni dirijek diend dimekena. (Marko 13:10; Galatia 5:19-23; 1 Timote 1:12, 13) Chawiy lel, chidi chisend chetu cha kusadil want ipau wa kwitondin utwinkinay Nzamb chakwel kukwat mupak wa mutapu tukusala. Chinyim ni Adam, anch twalam mu muchim yitulejinay Baibel, tukez kukwat mipak ya manangu. Tukez kumekesh anch rutong retu ra kusambish mu mwom udi urund wetu uwamp nend Yehova.
Kusot Mutapu Ukwau wa Want Ipau
10. Want ipau wa mutapu ik ukatau kukimb antu amwing adia Atuman’a Yehova?
10 Yisu yimwing, ansand amwing adia Atuman’a Yehova—ni amakurump akwau adia Atuman’a Yehova—akutwish kuman anch aswiridin mutapu ukwau wa want ipau. Mangand makutwish kumekan ku mes mau mud mapwitina ni kusangaresh nakash, ni mukutonginau nakash yom yiney, maku mau ma kusal yom yakad kwambatan ni Ukristu yisadilau antu avud mu mangand makwikal ni usu nakash. Antu mud inay chitwishikin kakutonginap kusadil mon yilewishina (mud damb), kwikal ayina maar, ap kusal masandj. Pakwez akusambish kwibomb nau arund amwing akad kwikal in Kristu akin, ni kusot kwitiyik kwau. Akutwish ap kusambish kwilikej mutapu wau wa kulond ni ngikadil yau. —3 Yohan 11.
11. Ov kwisu kukata kudiokal yisu yimwing chibachikin cha kusal yom yiyimp?
11 Yisu yimwing, chibachikin cha kulondul ngikadil yidia chinyim ni ya Ukristu chikat kudiokal kud antu amwing afila mu kan anch akat kumusadil Yehova. Mwamu kamu chayishikena in Kristu amwing a pasak ni chikutwish kand chilik chimwing kushiken mu chirung chetu. Antu a mutapu winou asotining kusal yom yikatau kutong anch yikutwish kuyisangaresh, pakwez yom yiney yidi chinyim nich yijil ya Nzamb. Akat kuyibachik akwau kumenamu “maswimbu” kanang. Akat “kushilamu kuyinkish want ipau, pakwez ayinau adi aswik a yaku yijondila.” —2 Pita 2:19.
12. Ov yibudikin ik yiyimp ya ngikadil yidia chinyim nich yijil ni yijidik ya Nzamb?
12 Mabuj ma want ipau mud winou wa mu kan mading chisu chin chawonsu mayimp, mulong makat kurumburik kulik kuziyil yijil ya Nzamb. Chilikej, kwijikijan kwa ikundj ni mband kudia chinyim ni chijil kukutwish kubudish yakamish ya muchim, misong, rufu, madikaj ma pansh, ni ap kand kujip kwa uruu. (1 Korint 6:18; 1 Tesalonik 4:3-8) Kusadil nayimp mon ya kulewish (mud damb) kukutwish kulet ujim swa, kusarumun kuyobakan mu kulond, kwa mutapu wa kuman, kwa mutapu wa kupim, ap kand rinzwizu, kwirumbin kuman yom ya makasu, ni rufu. Kukutwish kumwikadish muntu muswik, chom chikutwisha kamu kumushikij ku ubaj mulong wa kusangaresh chaku chend. Yibudikin ya chilik chimwing yikat kubudikin kand mu kunawol maar kwakad kupep pa chopu. (Jinswir 23:29-35) Antu akweta ngikadil ya mutapu winou akutwish kutong anch akwet want ipau, ni kupwa akat kujingunin kwinyim anch ikadil kal aswik a chitil. Ni chitil chidi nyikel umwing ukweta chisum mud ik! Anch twatongin yawonsu yiney katat chikutwish kutukwash kwilam ku yom mud yiney. —Galatia 6:7, 8.
Kukata Kusambishin Milong
13. (a) Ov mutapu ik ukata kusambish chisu chivud maku makata kusarumun milong? (b) Chakwel kujingunin “arund ayimp,” ov chitongijok cha nany tukweta nich kuswir? (c) Chiwakwila ku yipul yidia mu paragraf wa 13, kasikeshin chitongijok cha Yehova.
13 Tongin bil kukata kusambishin chisu chivud milong. Baibel ukat kurumburil anch: “Pakwez muntu ni muntu ukat kwiyoz amwinend nich maku mend mayimp, mawiy makata kumubachik, chad mamurumbwish. Chad maku mend mayimp makat kwimish, maval chitil, chawiy chitil anch chakul, chikat kuval rufu.” (Jakobu 1:14, 15) Ov mutapu ik ukata kusambish maku minam? Chidi kusutin yikata kwandam mu manangu. Chisu chivud chidi mulong wa kwikal chisu chawonsu nau antu aburedina chaku cha kusadilang yany ya Baibel. Chakin, etu awonsu twij anch tufanyidin kwipuk “arund ayimp.” (1 Korint 15:33) Ov arund ik adia ayimp? Ov mutapu ik ukatay kuman Yehova mulong winou? Kutongin yipul yilondwila ey ni kukimb mifund yijimbwilau kukutukwash kushiken kuman yakul yifanyidina.
Ov anch antu amwing ameken mud alimishinau, ov chinech chirumburikin anch adi arund awamp? (Disambishil 34:1, 2, 18, 19)
Ov misamb yau, pamwing ap maswimbu mau, yimekeshin anch twikal kal nau mu urund wa piswimp nakash? (Efes 5:3, 4)
Ov mutapu ik ukutwishay kutuman Yehova anch twata urund nau antu akad kumukat ndiy? (2 Jinsangu 19:1, 2, NW)
Ap anch tukutwish kusal mudimu pamwing ap kuya pamwing ku shikol nau antu akad kwikal ni yitiyij yetu, ov mulong wak tufanyidina kubabal? (1 Pita 4:3, 4)
Kutal televizion ni mafilim, kusadil Internet, ni kutang mabuku, magazet, ni majurnal yidi mitapu ya kwibomb ni antu akwau. Ov yom ya mutapu ik yidiokila ku misul mud yiney tufanyidina kubabal nich? (Jinswir 3:31; Isay 8:19, NW; Efes 4:17-19)
Kutond kwetu arund kukat kumulejang Yehova chom ik piur pa mutapu wa antu tudia? (Kuseng 26:1, 4, 5; 97:10)
14. Want ipau ik wa kashinsh uyichingedina antu asadidila yiyul ya Dizu dia Nzamb katat?
14 Mangand masu ma Nzamb madi kamu kurutu kwetu. Kusutil ku winyikel wa Want wa Nzamb wa mwiur, akez kukul ukamuntu ku ulabu wa Satan ni ditenchik dia yom diend diawonsu diakabuj. Pakemp pakemp, yibudikin yawonsu ya chitil yidiokila ku kuburen kuwanyidin kwa manangu ni mujimbu akez kuyidiosh padi antu in kuziyil, chakwel tukutwish kwikal ni mwom wa chikupu mu Paradis. Yitang yawonsu yikez kwikal ni want ipau wambatena kamu sens nich “spiritu wa Yehova.” (2 Korint 3:17, NW) Ov chikwikal cha manangu kusot kushadish yawonsu yiney mulong wa kulik kusu kulondul yiyul ya Dizu dia Nzamb katat? Anch twasadil want ipau wetu wa Ukristu nich manangu nlel, tukumekesh etu awonsu patok anch yitusotina chakin udi “want ipau wa uyaj pamwing nau an a Nzamb.” —Rom 8:21.
Misamb ya Kuchirikin
• Ov antu aad a kusambish adinga ni want ipau wa mutapu ik? Ov mutapu ik ushalijadina nich want ipau ukwetau antu nlel?
• Ov in Kristu akin akwet want ipau wa mutapu ik? Ov ushalijadin nchik nich ukatau kuman mu mangand mud want ipau?
• Ov mulong wak chidi chipandakena usey kwipuk arund ayimp? Chinyim ni Adam, ov yiyul ya nany tukata kwitiy piur pa yidia yiyimp?
[Chipich chidia pa paj wa 46]
Dizu dia Nzamb dibabeshin anch: “Kangal akudimbany. Arund ayimp akat kuyipish yaku yiwamp”