Musadina Yehova, Nzamb wa Want Ipau

1, 2. (a) Mulong wak usuk ni want ipau yadinga milong ya usey nakash kudi antu a mu chirung cha Paul? (b) Paul walonda anch nany wadinga Musul wa want ipau wakin?

IN KRISTU a kusambish ading ashicha mu Want wa Rom, mwading antu ading ibazina mulong wa yijil, mutapu wa dirumburish ni want ipau wadingau nich. Pakwez, want winou wa usu wading nau asuk mulong wa kusal mudimu ukash. Mu chisu chimwing, muntu umwing pa antu asatu wading musuk mu Want wa Rom. Chakin kamu, usuk ni want ipau yading milong ya usey nakash kudi antu a mwinshin, pamwing nau in Kristu.

² Kambuy Paul wafunda yisu yivud piur pa want ipau. Pakwez kasalap usu wa kurijek milong ya mangand, mudi mwading musadinau antu avud a pa chisu chinicha. Pakwez, Paul nau in Kristu akwau asala usu wa kuyilej antu akwau rusangu ruwamp piur pa Want wa Nzamb ni kuyikwash kwijik usey ukweta yakupesh ya difut ya Yesu Kristu. Paul wayileja in Kristu akwau ndond yikutwishau kutan Musul wa want ipau wakin. Wafunda anch: ‘Yehova udi Spiritu, ni kwawonsu kudia spiritu wa Yehova, kwawiy kwinikwa kudia want ipau.’—2 Korint 3:17.

3, 4. (a) Yom ik yisambinay Paul mu maverse madia kurutu kwa 2 Korint 3:17? (b) Yom ik tufanyidina kusal mulong wa kwikal ni want ipau udiokila kudi Yehova?

³ Mu mukand wend wa kaad kudi in Korint, Paul warumburila yom yamushikena Moses chisu chashirikay ku Mukandu wa Sinay kupwa kwa kwikal pamwing ni mwangel wa Yehova. Chifu cha Moses chading chikat kulayamijan! In Isarel pamumanau Moses, ova wom nakash, chawiy wibwika chitambal mu chifu. (Kubudik 34:29, 30, 33; 2 Korint 3:7, 13) Paul warumburila anch: “Pakwez anch muntu wakarumuk wez kudi [Yehova], chitambal achidiosh kal.” (2 Korint 3:16) Paul wakimba kulond ik?

⁴ Twilejang mu mutu wa mulong wasutang ou anch Yehova, Sakatang wa yom yawonsu, ndiy kwend Muntu ukweta want ipau wakad mimbu. Chawiy choviken kulond anch kudi want ipau kudiay Yehova ni ‘kwawonsu kudia spiritu wa Yehova.’ Pakwez Paul walonda anch ang tukimbin kwikal ni want ipau winou, tufanyidin kukarumuk kwez kudi Yehova. Chinech chirumburikin anch tufanyidin kwikal ni urund wa piswimp ni ndiy. In Isarel ading mwi mpay amanang kwau yom kukwatijan ni mutapu umenau antu, kadiap kukwatijan ni chitongijok cha Yehova. Chidi mudi ading ayibwikin chitambal mu manangu ni mu michim yau. Ading akatin kusadin want ipau usu mulong wa kusangaresh maku mau.—Hebereu 3:8-10.

5. (a) Spiritu wa Yehova ukat kulet want ipau wa mutapu ik? (b) Mutapu ik twija anch muntu ukutwish kwikal musuk ap mu rukan ni kudandamen kwikal ni want ipau uletinay Yehova? (c) Yipul ik tufanyidina kwakul?

⁵ Want ipau udiokila ku spiritu wa Yehova utwinkishin want ipau ujim kusutamu kukwolik mu usuk. Spiritu winou uyinkishin antu want ipau ujim. Ukutwish kutudiosh mu usuk wa chitil ni rufu ni mu usuk wa difukwil dia makasu ni yishankur yend ni yaku yend. (Rom 6:23; 8:2) Want ipau uwamp mudi ik! Ap muntu udia musuk ap udia mu rukan ukutwish kwikal ni want ipau winou. (Disambishil 39:20-23) Nambaz Nancy Yuen ni Mukadivar Harold King ayikasa awonsu mu rukan mulong wa ritiy rau, pakwez adandamena kwikal ni want ipau mudi winou. Ukutwish kuyitesh palejenau piur pa yom yayishikena pa JW Télédiffusion. (Tal pafundinau anch INTERVIEWS ET TÉMOIGNAGES > L’ENDURANCE DANS L’ÉPREUVE.) Katat el twakulany ku yipul yaad. Mutapu ik tukutwisha kumekesh anch want ipetu udi wa usey nakash kudi etu? Ni mutapu ik tukutwisha kusadin want ipetu kwa manangu?

WANT IPAU ULETINAY NZAMB UDI WA USEY NAKASH

6. Mutapu ik wamekeshau in Isarel anch kajikitishap mulong wa want ipau wayinkishau kudi Yehova?

⁶ Anch twatambul chipan cha usey nakash, tukat kujikitishang mulong wa chipan chinech. Pakwez in Isarel kajikitishap mulong wa want ipau wayinkishau kudi Yehova. Mbing kwau jikemp kupwa kwa Yehova kuyikwol mu Idjibit, asambisha kutong yakudia ni ya kuna yashau kwinakwa. Alonda nayimp piur pa mana, chakudia chayinkau kudi Yehova. Akimba ni kuchirik mu Idjibit! Kudi awiy, ‘ansh, yibat, sausau, sabol wa mitapu ni mitapu ni sabol wa didjimb dikash’ yading ya usey nakash kusutamu want ipau wayinkishau kudi Yehova mulong wa kumwifukwil. Chawiy Yehova wajimana nakash mulong wa awiy. (Kuchind Michid 11:5, 6, 10; 14:3, 4) Yom yiney yitufundishin dilejan dia usey.

7. Mutapu ik wasadinay Paul amwinend chiyul chidia mu 2 Korint 6:1, ni mutapu ik niyetu tukutwisha kusal mwamu?

⁷ Paul wayibabesha in Kristu awonsu anch kangal ikal akad kujikitish mulong wa want ipau wayinkishau kudi Yehova kusutin Mwanend, Yesu Kristu. (Tang 2 Korint 6:1.) Paul wading muntu wakad kuwanyin, musuk wa chitil ni rufu ni chinech chasala anch iyova nayimp nakash. Pakwez walonda anch: “Am namujikitish Nzamb [kusutil] Yesu Kristu Nsalejetu!” Mulong wak walonda mwamu? Paul wayirumburila in Kristu akwau anch: “Mulong yijil ya spiritu wa kupand mu Yesu Kristu [yakukwola] ku yijil ya chitil ni ya rufu.” (Rom 7:24, 25; 8:2, TMK) Mudi Paul, tufanyidinap kuvuramen anch Yehova watukwola mu usuk wa chitil ni wa rufu. Difut ditukwashin kumusadin Nzamb wetu ni kom kadia zwang ni chinech chikat kutwinkish musangar wakin.—Kuseng 40:8.

8, 9. (a) Kubabesh ik kwapanay Kambuy Pita piur pa mutapu wa kusadin want ipetu? (b) Mutapu ik ukutwishay muntu kusadin nayimp want ipend?

⁸ Tufanyidinap kwetu kulond anch tumujikitishin Yehova, pakwez tufanyidin kamu kubabal nakash mulong kangal tusadina want ipau mu mutapu uyimp. Chilakej, kambuy Pita watubabesha anch tufanyidinap kusadin want ipau mudi chitambal cha kujindjik nich mulong wa kusal yom yiyimp. (Tang 1 Pita 2:16.) Kubabesh kwinoku kutuvurishin yom yayishikena in Isarel mwi mpay. Nlel unou tukwet kuswir nakash kwa kubabesh kwinoku kusutamu pakur. Satan ni mangand mend maletin yom yivud yisangareshina ya kudjal, ya kudia, ya kuna ni ya kwipuwangesh nich. In kusal ma piblisite akweta ukaliweny akat kusadin antu awamp mulong wa kusal tutong anch tufanyidin kuland yom ap anch tuyikwetap nich kuswir. Chikutwish kwikal chiswapela kwikal adimbinau kudi mangand mu kusadin want ipau wetu mu mutapu uyimp.

⁹ Tukutwish kand kusadin chiyul cha Pita mu milong yijim ya mwom wetu, mudi shikol ap mudimu tukutonda. Chilakej, ansand avud nlel ayibachikin kusal mudimu nakash chakwel atwisha kuyitiy ku ma universite mawamp. Antu avud akat kuyilej anch ang ilej shikol ya piur, akwikal ni midimu yiwamp, akwikal ni nfalang jivud ni akuyilimish. Antu inay akutwish kuyilej jinsangu jimwing jimekeshina anch kwikal ni diplom dia ku universite mujim kukusal anch ikala ni nfalang jivud kusutamu antu ilejina shikol yikemp. Kwilej shikol yijim kukutwish kwikal chitongijok chiwamp kudi ansand chisu chikimbinau kukwat mipak yikutwisha kwikal ni yibudikin mu machuku mawonsu ma mwom yau. Pakwez asand inay nau anvajau afanyidin kuvurik yom ik?

10. Yom ik tufanyidina kuvurik chisu tukwatina mipak piur pa milong yetu?

¹⁰ Antu amwing akutwish kutong anch milong yiney yiyitadin ayinau, afanyidin kwikal ni want ipau wa kutond yom yikatinau, anch kom kau kayifishinap nich. Akutwish kutong mudi mudia mazu ma Paul malondina anch: ‘Mulong wak want ipau wam afanyidin kuurumburish kudi kom ka muntu mukwau?’ (1 Korint 10:29) Ap anch tukwet want ipetu wa kukwat mipak piur pa shikol ni mudimu, tufanyidin kuvurik anch want ipau wetu ukwet mimbu ni anch mipak yawonsu tukwatina yikwet yibudikin. Chawiy chalonday Paul anch: “Yom yawonsu yidi yiwamp, pakwez yom yawonsu kiyikutwishap kutukwash. Yom yawonsu yidi yiwamp, pakwez yom yawonsu kiyawiyip yikutukudisha.” (1 Korint 10:23, TMK) Chawiy ap anch tukwet want ipetu wa kukwat mipak piur pa milong yetu, yom tukatina yidingap kamu yom ya usey nakash.

TUKAT KUSADIN WANT IPETU KWA MANANGU ANCH TWAMUSADIN YEHOVA

11. Diyingishin ik diasala anch Yehova atukwola?

¹¹ Chisu chatubabeshay Pita mulong wa kulik kusadin want ipetu mu mutapu uyimp, walonda anch mutapu uwamp wa kuusadin udi kwikal “atushalapol a Nzamb.” Diyingishin diasala anch Yehova amusadina Yesu mulong wa kutukwol mu usuk wa chitil ni rufu didi mulong wa kusadin mwom wawonsu mulong wa kumusadin ndiy.

12. Chilakej ik chatushilau kudi Nowa ni dijuku diend?

¹² Mutapu uwamp wa kusadin want ipetu udi wa kusadin chisu ni usu wetu mulong wa kumusadin kamu Yehova. Kusal mwamu kukat kutuchidij mulong kangal mipak ya mangand ni maku metu yikala ya usey nakash mu mwom wetu. (Galatia 5:16) Tong piur pa yom yasalay Nowa ni dijuku diend. Ading ashich mu mangand mayimp ni ma chisum. Pakwez kiyandjikap mu mipak ni milong ya antu ading ayinyingumukina. Atonda kushal akwatikena mu kusal mudimu wayinkishau kudi Yehova kusal. Asala waat, akumangeja yakudia mulong wa ayinau ni mulong wa annam ni ayibabesha antu akwau piur pa Mabeb. “Nowa wasala mudi mwamulejinau yom yawonsu kudi Nzamb, ndiy wayisala.” (Disambishil 6:22) Mudi chibudikin, Nowa ni dijuku diend apanda pasheshau mangand minima.—Hebereu 11:7.

13. Yom ik yitwitinay Yehova kusal?

¹³ Yom ik yitwitinay Yehova kusal nlel? Mulong tudi in kwilej a Yesu, twij anch Nzamb utwitin kulejan. (Tang Luka 4:18, 19.) Nlel, Satan wayibwikin kal antu avud pa mes ni kajinguninap kwau anch adi asuk a relijon wa makasu, a yom ya ku mujimbu ni a yom ya politik. (2 Korint 4:4) Mudi Yesu, tukwet chisend cha kuyikwash antu akwau chakwel amwijika ni amwifukwila Yehova, Nzamb wa want ipau. (Mateu 28:19, 20) Kulejan rusangu ruwamp kudi antu akwau chidiap chiswapela. Ku jindond jimwing, antu kasangaredinap kumwijik Nzamb ni amwing akat kujiman nakash anch twayilej rusangu ruwamp. Pakwez mulong Yehova utulejin anch tufanyidin kulejan, tufanyidin kwiyipul anch: ‘Ov, nikutwish kusadin want ipau wam mulong wa kusal yom yivud mu mudimu wa Yehova?’

14, 15. Mupak ik wakwatinau antu avud a Nzamb? (Tal chipich cha kwinsambishil.)

¹⁴ Chidi chikasikeshina kwijik anch antu avud a Yehova ajingunin kal anch disudien dia mangand minam diasej kal piswimp nakash ni akwatin kal mupak wa kuswapej mwom yau ni kusambish mudimu wa uchibol. (1 Korint 9:19, 23) Amwing asadin mudi ayibol kwol kwau, ni akwau akat kushemunikin mu chikumangan mudia maswir. Mu mivu yitan yasutina ey, antu 250 000 ni kusut asambisha mudimu wa uchibol ni katat kudi ayibol a rawonsu 1 100 000 ni kusut. Chisangareshin mudi ik kuman anch antu avud asadidin want ipau mulong wa kumusadin Yehova mu mutapu winou!—Kuseng 110:3.

¹⁵ Yom ik yiyikwashina kusadin want ipau wau kwa manangu? Shinshikin chilakej cha John ni Judith, asadina mu jingand kushalijan mu mivu 30 yasutina ey. Arumburil anch chisu chasambisha Shikol ya Mudimu wa Uchibol mu muvu wa 1977, ayikasikesha ansand a shikol kushemunik ni kusadin kwi ndond kwading maswir nakash. Mulong wa kuwanish mupak winou, John ni Judith afanyina kupipej mwom wau. Chawiy John waswimpa mudimu wend. Kupwa, ashemunikina mwi ngand ya wingendj mulong wa kulejan. Yom ik yayikwasha kupandakan milong mudi kwilej dizu disu, kwijidin yaku yisu ni yirung ya ndond yisu? Amulembila Yehova ni amuchingejina mulong wa kuyikwash. Mutapu ik wiyovilau mu kumusadin Yehova mu mutapu winou mu mivu yawonsu yiney? John ulondin anch: “Niyova anch niyandjika mu mudimu umwing uwamp nakash unakad kal kusalangap. Yehova wikala muntu wakin kudi am, mudi mutapu ukutwishay kwikal tatuku wa rukat. Katat novil nawamp kurumburik kwa Jakobu 4:8 ulondina anch: ‘Sejany piswimp kudi Nzamb, chad niyend ukusej piswimp ni yenen.’ Nijika kamu anch natana chom nading nikimbina, mwom usangareshina.”

16. Mutapu ik wasadidina tunan twa antu want ipau nich manangu?

¹⁶ Antu amwing mudi John ni Judith, akutwish kwikal ayibol chisu chilemp. Mulong wa yishiken, antu akwau akutwish kusal mudimu wa uchibol mu chisu chikemp. Pakwez antu avud in kwikatin akat kusal mu mudimu wa kutung usadikina pa mangand mawonsu. Chilakej, akadivar nau anambaz piswimp 27 000 ezin mulong wa kukwash kutung biro mujim wa mangand mawonsu udia mu Warwick mu New York. Antu amwing eza mwi mbing jaad, akwau mu angond akemp, ni akwau kand mu muvu wa kabuj ap machuku mavud. Akadivar nau anambaz avud ipanin chakwel akwasha mudimu ku Warwick. Adi yilakej yiwamp nakash ya antu a Nzamb asadidina want ipau mulong wa kumutumbish ni kumushiman Yehova, Nzamb wa want ipau!

17. Yom ik tukutwisha kuchingejin mu machuku ma kurutu anch twasadin want ipau kwa manangu nlel?

¹⁷ Tujikitishin mulong twashikena kumwijik Yehova ni tukwet want ipau udiokila ku kumwifukwil ndiy. El tumekesha mwamu kusutin ku mipak tukwatina anch want ipau udi chipan chidia cha usey nakash kudi etu. Pa ndond pa kusadin want ipau mu mutapu udia uyimp, el tuusadin mulong wa kumusadin Yehova kukwatijan ni usu tukweta. Mwamu tukutwish kusanger yiyukish yakanay Yehova chisu chikuwanyina uprofet ulondina anch: “Mulong yom yatangau yikutwish kudiokal kand iyinau mu uswik wa yom yivundila, ni kwez ku kwikol kwa uyaj wa an a Nzamb”—Rom 8:21, TMK.