Mangand Masu Mashilayimu Nzamb
BIBIL, Dizu dia Nzamb diafundau, dikat kutwinkish ruchingej rikash pidilondila anch: “Pakwez etu tukat kuchingej maur masu ni mangand masu mudi mwashilayimu Nzamb. Chad kwinikwa kwawiy kukeza kwikal kutentam.”—2 Pita 3:13.
“Maur masu” yom ik? Bibil wambatishin maur nich winyikel. (Midimu 7:49) “Maur masu” udi winyikel usu ukeza kuyikel divu diawonsu. Autazukin anch usu mulong ukez kuswinkan ditenchik dia winyikel wa katat; udi kand ruzau risu mu kuwanyish kwa rutong ra Nzamb. Yesu watufundisha kulembil mulong wa Want winou. (Mateu 6:10) Mulong Nzamb ndiy musul wau ni ndiy ushiching mwiur, chawiy chiutazukiningau anch “Want wa Mwiur.”—Mateu 7:21.
“Mangand masu” yom ik? Didiap divu disu bwat, mulong Bibil ulondil patok anch divu akez kudishakam chikupu. “Mangand masu” madi chisak chisu cha antu. Chikez kwikal chisak chisu mulong antu ayimp akez kuyidioshap. (Jinswir 2:21, 22) Awonsu akeza kushakamap akez kumulimish ni kumuziyil Sakatang ni akez kushakam kwambatan nich mbil yend. (Kuseng 22:27) Antu a michid yawonsu ayitazukin kwez ni kwilej mbil yiney ni kushakam kwambatan nich mbil yiney kusambish kamu katat. Ov mwamu usadila?
Mu mangand masu ma Nzamb, muntu ni muntu ukez kulimish winyikel Wend. Ov rukat ra Nzamb rikubachikin kumuziyil? (1 Yohan 5:3) Ov kumuziyil kwinoku kumeken mu dijuku diey? ku mudimu ap ku shikol? mu mutapu ukata kusadil mwom wey?
Mu mangand minam masu, chisak cha antu chikez kwikal mu umwing wa kumwifukwil Nzamb wakin. Ov ukat kumwifukwil Sakatang wa diur ni divu? Chakin kamu difukwil diey dikutekin mu umwing pamwing nau ambay ney in kwifukwil a michid yawonsu, a ulombu wawonsu, a jindim jawonsu?—Kuseng 86:9, 10; Isay 2:2-4; Sofoniy 3:9.
[Kamushet kadia pa paj wa 17]
Nzamb Ukat Kushilamu Yom Yiney
Ndiy Sakatang wa maur ni Divu yimekena. Ndiy walejanau kud Yesu Kristu mud ‘Nzamb umwing kusu wakin.’—Yohan 17:3.
Antu avud akat kulimish anzamb asadilau ayinau. Mamiliyon ma antu makat kwifukwil atupwany akad mwom. Akwau akat kutumbish yirijek ya antu, filozofi wengamidina pa yom ya ku mujimbu, ap maswir mau ayinau. Ap in akata kufa mu kan anch akat kusadil Bibil kakatap awonsu kushiman dijin dia ulejenau kwikal ‘Nzamb wakin.’—Kuvurik Yijil 4:35.
Sakatang amwinend ulondil anch: ‘Yam Yehova. Diawiy dijin diam.’ (Isay 42:5, 8, NW) Dijin dined dimeken tupap 7000 ni kusut mu Bibil mu rudim ra kusambish ramufundau. Yesu Kristu wayifundisha in kwilej end kulembil anch: “Tatukwetu udia mwiur, dijin diey aditumbish.”—Mateu 6:9.
Nzamb wakin udi muntu wa mutapu ik? Urumburil amwinend kwikal Nzamb ukweta “ranaken ni mwin riy, wakad kwovang ujim swa, wizwila sens nich rukat ni uyakin” ni mud muntu wakad kuyingish muntu kudiosh ku chibau cha antu akata kujiril yijil yend ku kwikatil. (Kubudik 34:6, 7) Rusangu ra yisal yend pantaliken nich muchid wa muntu rimekeshin uyakin wa mazu minam.
Dijin ni muntu ujimbwilau ku dijin dined yifanyidin ntumb, ap kuyiman mud yitumbila. Chidiay Sakatang ni Mukaleng wa Mangand mawonsu, ndiy ufanyidin kuziyil kwetu ni difukwil dietu. Ov ey, ukat kumuziyil ni kumwifukwil?
[Kamushet/Chipich chidia pa paj wa 18]
“Maur Masu ni Mangand Masu” Makez Kulet Kukarumuk Ik?
Divu dikez kwikal Paradis Luka 23:43
Chisak cha pa mangand mawonsu Yohan 13:35
mukezau kwikal antu a michid Kujingunik 7:9, 10
yawonsu, a ulombu wawonsu, a jindim
jawonsu chikez kwinung mu umwing wa rukat
Chisambu pa mangand mawonsu, Kuseng 37:10, 11
kwikang kwakin mulong wa antu awonsu Mike 4:3, 4
Mudimu usangareshina, yakudia too Isay 25:6; 65:17, 21-23
Mayej, minan, rufu yikez kupwa Isay 25:8;
Kujingunik 21:1, 4
Mangand makez kwikal mu umwing Kujingunik 15:3, 4
ni kumwifukwil Nzamb wakin
[Kamushet/Yipich chidia pa paj wa 19]
Ov Ukez Kuyisakin?
Nzamb kakutwishap kudimban!—Titus 1:2.
Yehova ulondil anch: “Mwawiy mukeza kwikadil dizu didiokila mu kan mwam. Dikezap kuchirik kud am pakad yibudikin, pakwez dikez kuwanyish kamu chom chinikata kusanger, ni dikez kupandakan mu yawonsu naditumina dizu diam kusal”—Isay 55:11.
Yehova ukat kutang “diur disu ni mangand masu.” Winyikel wa mwiur wasambishin kal kusal. Mufulandal wa “mangand masu” autekin kal.
Kupwa kwa kwisambin yom yimwing yamushena yikezau kuyiletin antu kud “diur disu ni mangand masu”, Kujingunik ulejen anch Nzamb amwinend, Mukaleng Mwin Mangand, ulondil anch: “Talany, am nayikarumun kal yom yawonsu kwikal yisu.” Ndiy ulondil kand anch: “Fund, mulong mazu minam madi ma kushinshaman ni makin.”—Kujingunik 21:1, 5.
Chipul chijim chidi anch, ov tukat kusal yitenchik yiswiridikina chakwel kwikal achindinau kwikal antu afanyidina a mu “mangand masu” mwishin mwa umutakel wa “diur disu”?