Mwom mu Mangand Masu ma Chisambu

Piutadila neng yifwatul piur pa trakt winou, ov ukwet yovil yisu? Ov muchim wey uswiridinap chisambu, musangar, ni ngikadil muwamp umena pinap? Chakin uswiridin. Pakwez ov chidi kusu chilat, ap kwa yitongijol, kwitiyij anch ngikadil winou ukez kikaliku kamu pa divu?

Antu avud akutwish kutong mwamu. Ukinakin wa nlel udi njit, chisum, nzal, mayej, upal​—⁠kujimbulaku kusu yikemp. Ap mwamu kuchidaku mulong wa kuchingej. Kutalang kurutu, Baibel ulondidil “maur masu ni divu disu tuchingedila kulondulijan ni kushilimu [kwa Nzamb], mwinomu kutentam kufanyidin kusok.”​—⁠2 Pita 3:13; Isaya 65:​17, New World Translation.

“Maur masu” minam ni “divu disu,” kulondulijan ni Baibel, madap maur masu mamekena am ap divu disu didip divu diakinakin. Divu ni maur mamekena ayisala yiwanyidina, ni Baibel ulejen anch yikez kashakam chikupu (Kuseng 89:36, 37; 104:5) “Divu disu” dikez kwikal chisak chitentamina cha antu ashakamining pa divu, ni “maur masu” makez kwikal want uwanyidina wa mwiur, ap guvernement, ukeza kayikel piur pa chisak chinech cha ukadivu cha antu. Ov komb chidi cha kashinsh kwitiyij anch “divu disu,” ap mangand masu ma uyaj, didi ditwishikina?

Inge, tal nawamp uyakin wa kwel anch ngikadil mudi winou wadinga umwing wa mu rutong ra kusambish ra Nzamb mulong wa divu. Wayiteka antu aad a kusambish mu Paradis wa ukadivu wa Eden ni kuyinkish mudimu umwing uwamp nakash: “Songishijanany, vulijanany, shakamany, izwishany ngand ni kuyiziyish.” (Disambishil 1:28) Mwaning, rutong ra Nzamb radinga anch awiy avala aan ni kujimbish Paradis wau piur pa divu diawonsu. Ap anch eza kutond panyim kumubwambukin Nzamb, chad lel kwimekeshang akadinga kufanyin kushakam chikupu, rutong ra kusambish ra Nzamb kirakarumukap. Ni rifanyidin kushiken mu mangand masu!—Isaya 55:​11, NW.

Chakin, piukata kulembil dilembil dia Nsalejetu, ap Tatukwetu, kwitang Want wa Nzamb weza, ukat kulembilang mulong wa guvernement wend wa mwiur kudiosh tuyimp pa divu ni kuyikel piur pa mangand masu minam. (Mateu 6:9, 10). Ni tukutwish kuchingej anch Nzamb ukez kakwil dilembil dined, mulong Dizu diend dikat kushilimu anch: “Mwin kutentam ukez kaswan ngand, ukez kushakamimu chikupu.”​—⁠Kuseng 37:29.

Mwom mu Mangand Masu ma Nzamb

Want wa Nzamb ukez kalet yiyukish yivud yakad kwisikej ni yikwau, kushikijang yom yawonsu yiwamp Nzamb watongina pa kusambish mulong wa antu’end kusangarin pa divu. Kukisijan ni kusadilijan nayimp kukupwa bwi, ni chad lel muntu mwawonsu ukez kikal murund wakin ni muntu nend. Mu Baibel, Nzamb ukat kushilimu anch ‘ukez kakatwish njit ni kwisudiel kwa mangand.’ “Muchid kiukez kazambulap mpak ya musamun piur pa muchid ukwau, nau kand kakezap kwilej njit ap pakemp.”​—⁠Kuseng 46:9; Isaya 2:4, NW.

Divu diakabuj lel akez kadilet pakemp pakemp ku mashakamin mafanikena ni rupangu ra uparadis. Baibel ulondil: “Mpay ni ndond yakad mem yikez kazangam, ni mpat ya mpay yikez kizwil sens nich musangar ni kuzem mud sefuron. . . . Mulong mwi mpay mem makez kabudik, ni tuwit mwi mpat ya mpay. Ni divu diumikina nakash dikwez dikalang kal mud dijiy dia mishiy, ni divu dia impu mud misul ya mem.”—Isaya 35:1, 6, 7, NW.

Kukez kikal chom chawonsu cha kwikal ni musangar mu divu dia Paradis. Antu kakezap kand kufa nzal mulong wa kuburen yakudia. “Divu dikusongish mabuj mad,” Baibel ulondil. (Kuseng 67:6; 72:16) Awonsu akez kasangarin mabuj ma mudimu wau, mud mushilamishinay Sakatang wetu: “Chakin kamu akez kakun mitond ya nviny ni kudia ya mabuj mau. . . . kakez kakunap chakwel muntu windjing adia.”—Isaya 65:21, 22, NW.

Mu mangand masu ma Nzamb, kimukez kikalap kand antu akeza kashakam mu mirundu mu tupalikany ap muzu (chikumbu) mwa ayiman-a-mar, mulong Nzamb ukat kushilimu anch: “Akez katung chakin yikumbu ni kushakamimu . . . Kakez katungap chakwel muntu windjing ashakamamu.” Baibel ukat kushilimu kand anch: “Kakez kamanap mar mamwamu.” (Isaya 65:21-23, NW) Komb antu akez kikal ni midimu ya kusongish mabuj ni kwikutish. Mwom kiukez kikalap wa usweral.

Pa chisu chifanyina, Want wa Nzamb ukez kachirish kand urund wa chisambu wadinga mu chir cha Eden pakach pa annam, ni pakach pa annam ni aanantu. Baibel ulondil: “Kangol ukez kashakam chisu kanang ni kan ka mukoku, ni chisump ukez kalal pamwing ni kan ka mpemb, musambu a ntambu ni nnam udishilau nawamp, awonsu pamwing kansand kakemp kamu kakez kikal mutakel piur pau.”—Isaya 11:6-9, NW; Hosea 2:​18, NW.

Tongap bil pakemp, mu divu dia Paradis mayej mawonsu ni yilim ya mujimbu akez kayiyeril kand yawonsu! Dizu dia Nzamb ditushinshikishidin anch: “Kwikil mwin kusok ukeza kalond anch: ‘am niyedil’.” (Isaya 33:​24, NW) “[Nzamb] ukez kayikuswol mansoj mawonsu ku mes kwau; kukez kikalip kand rufu; ap kukez kikalip kand madil, ap kushikok kudil, ap kusansan, kwamwamu kand. Mulong yom yikuru yasutil kal.”—Kuburik 21:4.

Mutapu Chitwishikina kud Ey

Chakin muchim wey ufanyidin kwikal ubachikinau kusutin yishilamish ya Nzamb yitadina mwom mu mangand masu matentamina. Ap anch amwing aman yiney mud yipandikena kuwap chakwel yikala yakin, yiyukish mud yiney yidap yipandikena kuwap chakwel yidioka kuday Sakatang wetu mukarukat.​—⁠Kuseng 145:16; Mika 4:4, NW.

Chakin, kudaku yitinau tusala ang tusotin kushakam chikupu mu Paradis ukweza pa divu. Yesu walejana chitinau chijim, kulondang mu dilembil kud Nzamb anch: “Kwinoku kwawiy kurumburik kwa mwom wa chikupu, kwandjikang kwau mukach ronganyin rey, Nzamb umwing wakin kusu, ni ra ndiy watuma ey, Yesu Kristu.”—Yohan 17:3, NW.

Chawiy ang tusotin chakin kushakam mu mangand masu ma Nzamb, tufanyidin bil kwilej rusot ra Nzamb ni chad lel kurisadil. Mulong ech chidi chom chakin: “Minam mangand makat kusutang ni mwamu mudi maku may, pakwez ndiy ou usadila rusot ra Nzamb ushich rawonsu,” Chakwel kusangarin chikupu yiyukish yidiokila kud Sakatang wetu mukarukat.—1 Yohan 2:​17, NW.

[Caption on page 5]

Ching anch ayilejen, mifund ya Baibel yidiamu yidiokil mu Mukand wa Nzamb wa Uruund.