Ukutwish kwirijek katat chakwel utwish kwandam mwi ngand yiwamp nakash yidia piswimp ap
Ngand Yisu Yikwikala Paradis Yid Piswimp!
Nzamb watanga divu chakwel antu atentamina ashakamap chikupu. (Kuseng 37:29) Wayiteka ambay a uruw akusambish, Adam ni Ev, mu chir chiwamp nakash cha Eden, wayinkisha ambay a uruw inay ni anau chisend cha kudim divu ni kudilam nawamp.—Disambishil 1:28; 2:15.
Nlel unou divu didiap Paradis mud mwakatay Nzamb anch dikal. Pakwez rusot rend riswimpinap. Mutapu ik mukuwanyishay Nzamb rusot rend radingay nich kwinsambishin? Mud mwalejanangau mu mitu ya milong yasambelang, Nzamb kakusheshap divu. Pakwez rusot rend rid anch antu ashinshamena ashakama pa divu dined. Ov, chisu chikuwanyishay Nzamb kushilamu kwend, mashakamin makwikal nchik pa divu?
Guvernema umwing ndiy ukuyikela mangand mawonsu
Piswimp ap chisu chikusambisha guvernema wa Nzamb kuyiyikel antu awonsu, divu dikwikal ndond yiwamp yikusangerau antu kushakam mu uumwing ni kusal mudimu usangareshina. Nzamb wamutondin kal Yesu Kristu chakwel ayikel pa divu. Chinyim ni anyikel a nlel, Yesu ukuyibangin antu akuyikelay. Ukutakel nich rukat, ni ukwikal Mwant muwamp, ukweta ranaken ni utentamina.—Isay 11:4.
Uumwing pa mangand mawonsu
Antu akwikala mwi ngand yisu, akwikal mu uumwing, kukwikalap kushalijan kwa michid ap tubil. Antu awonsu akwikal mu uumwing. (Kujingunik 7:9, 10) Antu awonsu akushakama pa divu akumukat Nzamb ni amutej nau, ni akusal mu kovijan mulong wa kuwanyish rusot radingay nich Nzamb kwinsambishin, ra kulam nawamp divu.—Kuseng 115:16.
Kukwikal kwovijan pakach pa antu ni yitang
Anch Want wa Nzamb wasambish kuyikel pa divu, Sakatang ukutukwash kwikal ni yirung yiwamp. (Kuseng 24:1, 2) Chisu chadingay Yesu pa divu, wamekesha usu wamwinkishau kud Nzamb paninetishay rinkind mukash. (Marko 4:39, 41) Pakuyikelay Kristu, kwikil muntu ap umwing ukwova kand wom wa mar madiokila ku yom yatangau. Want wa Nzamb ukulet chisambu pakach pa annam ni antu.—Ozey 2:18.
Ukash uwamp wa mujimbu ni yakudia yivud
Muntu win mwawonsu ukwikal ni ukash wa mujimbu uwanyidina. Kwikil muntu ap umwing ukuyela, kananap ap kufa. (Isay 35:5, 6) Antu akusanger kushakam mwi ndond yiwamp nakash, yinangina mud yasangerau ambay a uruw akusambish mu chir cha Eden. Mwi ngand yisu, mud mutapu muyading mu Eden, divu dikusongish yakudia yivud nakash chakwel antu awonsu akwikala pa divu ikal ni yakudia yivud. (Disambishil 2:9) Mud mwading muchid wa Isarel wa pasak, antu awonsu mu Paradis akez ‘kudia yakudia [yau] ni kwikut.’—In Levi 26:4, 5.
Chisambu chakin ni diking diakin
Pakuyikela guvernema wa Nzamb pa mangand mawonsu, antu awonsu akwikal mu chisambu ni akuyisadin akwau mu mutapu uwamp ni kutentam. Kukwikalap kand njit, ap kusadin nayimp ulabu, ni kwikil muntu ukumana mar mulong wa kuwanyish maswir mend. Bibil ukanin anch: “Akez kashakam mu chisambu mu yir yau ya mitond ya nviny ni mitond ya nfung. Kwikil muntu ap umwing ukeza kayakamish.”—Mike 4:3, 4.
Yikumbu yiwamp ni midimu yisangareshina
Dijuku ni dijuku dikwikal ni chikumbu chau ni kakwovap wom anch akutwish kuchishadish, akutanyinamu mu midimu yawonsu yikusalau. Mud mulondinay Bibil, antu akwikala mwi ngand yisu ya Nzamb “midimu yau yawonsu yikusalau yikez kawanyin,” usu wau ukuyap mu mem.—Isay 65:21-23.
Mafundish mawamp nakash
Bibil ukanin anch: “Ngand yikez kizul nich ronganyin ra [Yehova].” (Isay 11:9) Antu akwikala mwi ngand yisu akez kilejin ku manangu makad musul ma Sakatang wau, Yehova, ni piur pa yom yiwamp nakash yatangay. Antu kakezap kusadin manangu mau mulong wa kuchil mat ap mulong wa kuyisal akwau nayimp. (Isay 2:4) Pakwez akwilej mutapu wa kushakam mu chisambu umwing ni mukwau ni mutapu wa kulam nawamp divu.—Kuseng 37:11.
Mwom wa chikupu
Nzamb watanga divu mu mutapu uwamp nakash chakwel tusangera mwom dichuku diawonsu. Rusot rend rading anch antu ashakama chikupu pa divu. (Kuseng 37:29; Isay 45:18) Mulong wa kuwanyish rusot rend radingay nich kwinsambishin, Nzamb “ukez kadiosh rufu chikupu.” (Isay 25:8) Bibil ukanin anch: “Kukez kikalap kand rufu, ap madil, ap kwishikokin, ap kusansan.” (Kujingunik 21:4) Nzamb ukuyinkish antu awonsu mwom wa chikupu—awonsu akupandishay pakusheshay mangand minam mayimp ni akwau avud nakash akuvumbulay mwin ngand yisu.—Yohan 5:28, 29; Midimu 24:15.
Ap katat mamiliyon ma antu pa mangand mawonsu irijekin mulong wa kushakam mwi ngand yisu yezina piswimp ap. Ap anch ad antu akad kuwanyin, pakwez asadin usu wa kwikal antu awamp akwitiyay Nzamb kwandam mwi ngand yend yisu. Mutapu ik? Kusutil kwilej kumwijik Yehova Nzamb ni Yesu Kristu watumay.—Yohan 17:3.
Jingunin yom ufanyidina kusal mulong wa kupand ku disudiel dia mangand minam ni kushakam mwi ngand yiwamp nakash yezina piswimp ap. Ileja Bibil pakad kufut pamwing ni Kaman wa Yehova, ap yang pa kapend kau ka jw.org.