Difundish dia 5

Arund nend Nzamb akushakam mu paradis

Paradis kakwikalap mud mangand mutushicha katat. Nzamb kasotap anch divu dikala dizwila nich ruvundu ni runeng, kusansan ni mar. Mu machuku ma kurutu, Nzamb ukwikalish divu kwikal paradis. Ov Paradis ukwikal mutapu ik? Tushinshikinany amboku yilondilay Baibel:

Antu awamp. Paradis ukez kwikal chikumbu cha arund nend Nzamb. Akez kusadilijan yom yiwamp muntu ni mukwau. Akez kushakam kulondulijan ni njil jitentamina ja Nzamb.—Jinswir 2:21.

Yakudia yivud. Mu Paradis, mukwikalap nzal. Baibel ulondil anch: “Kukwikal mbut [ap, yakudia] yivud mwi ngand.”—Kuseng 72:16.

Yikumbu yiwamp ni mudimu usangarishina. Pa divu dikwikala Paradis, dijuku ni dijuku dikwikal ni chikumbu chau. Muntu ni muntu ukusal mudimu uletina musangar wa kashinsh.—Isay 65:21-23, NW.

Chisambu pa mangand pawonsu. Antu kakurishijanap kand ni kufa mwi njit. Dizu dia Nzamb dilondil anch: “[Nzamb] ukat kukatwish njit.”—Kuseng 46:8, 9.

Ukash wa mujimbu uwamp. Baibel ukat kushilamu anch: “Kwikil muntu [wa mu Paradis] ukulonda anch: ‘Niyedil.’” (Isay 33:24, NW) Chikwau kand, kukwikalap kand chibid, mputames, kajikamatu ap muntu wakad kutwish kulond.—Isay 35:5, 6, NW.

Kusansan, runeng ni rufu yikupwa. Dizu dia Nzamb dilondil anch: “Kukez kwikalap kand rufu, ap madil ap kwishikokin, ap kusansan. Mulong yom yikur kiyamekanap kand.”—Kujingunik 21:4.

Antu ayimp kakwikalakwap kand. Yehova ukat kushilamu anch: “Antu ayimp. . . akuyidiosh mwi ngand, ni in rubabek akez kayidioshamu.”—Jinswir 2:22.

Antu akez kukatijan ni kulimishijan umwing ni mukwau. Kukez kwikalap kuburen kutentam, kuyidjatil akwau pansh, ris, ni kukisijan. Antu akez kwikal mu umwing ni akez kushakam kulondulijan ni njil jitentamina ja Nzamb.—Isay 26:9, NW.