Kuta Muchim Kwapandisha Mwom Wau

YESU KRISTU wapana kubabesh piur pa nsudiel ya ditenchik dia yom dia in Yuda diadinga diengamidina pa tempel wadinga mu Yerusalem. Ndiy kijikishap dichuku dia ngond dikeza kushiken nsudiel yiney. Pakwez wisambina yishiken yikeza kutwal ku disheshik. Wayikasikesha in kwilej end kwikal achila ku mes chakwel achina mwi ndond ya ubaj.

Yesu wasambela kulond anch: “Piukumananya amasalay awombamu musumb wa Yerusalem, chad ukez kwijikany anch, udi piswimp ni kusheshik.” Ndiy walonda kand anch: “En ukez kumanany Mukish Utakanena wa Kusheshan . . . akez kumwimik mwi Ndond Yitumbila, . . . chifanyidin antu awonsu adia mu Yudeya achinyin ku mikandu.” Yesu wayikasikesha in kwilej end anch kangal kuchirik kwinyim mulong wa kupandish yom ya ku mujimb. Adinga afanyidin kuchin swa anch asota kupandish mwom wau.​—⁠Luka 21:​20, 21; Mateu 24:​15, 16, MM.

Chakwel kupwish wintombuj wa machuku mavud, Cestius Gallus wayitakela amasalay a in Rom kutaliken pa Yerusalem mu muvu wa 66 C.C. Wandama mu musumb ni kwombamu tempel. Ruvundu rizula too mu musumb. Antu acha ku mes amana anch disheshik didi piswimp. Ov chadinga chitwishikin kuchin? Pakad kutongin, Cestius Gallus wadioshamu yisak yend ya amasalay. Ayuda antombuj apakisha kuyilondul. Katat chawiy chadinga chisu cha kuchin kudiokal mu Yerusalem ni mu Yudeya mwawonsu!

Muvu walondulap, yisak ya amasalay ya in Rom yeza mu umutakel wa Vespasien ni mwanend Titus. Ngand yawonsu yandama mwi njit. Kwinsambishil kwa muvu wa 70 C.C., in Rom atunga nich mitond yisomburikina kunyingumuku Yerusalem mwawonsu. Chadingap kand chitwishikina kuchin. (Luka 19:​43, 44) Yisak ya amasalay yadinga mukach mwa musumb ajipijana umwing ni mukwau. Antu ashalap ayijipa kud in Rom akwau ayisenda mu uswik. Musumb ni tempel wend yasheshika. Kulondulijan ni yilondilay Josef mwin kwilej jinsangu ja in Yuda wa mu chitot cha mivu cha kusambish, antu miliyon umwing ni kusut afa. Chikala chikash kumutunguril kand tempel winou.

Anch in Kristu ashakama mu Yerusalem djat mu muvu wa 70 C.C., ela niyawiy kuyijip ap kuyisend mu uswik pamwing ni antu akwau adingaku. Pakwez, in kwilej jinsangu ja pakuru alondil anch in Kristu atesha dibabesh dia Nzamb ni achina kudiokal mu Yerusalem ni mu Yudeya mwawonsu kuya ku mikandu ya kwingangel kwa Wit Yordan. Amwing aya ku Pela, mu teritwar wa Perea. Asha Yudeya ni kachirikap bwat. Kuta matu ku dibabesh dia Yesu kwapandisha mwom wau.

Ov Ukat Kukwat Nich Usey Kubabesh Kudiokila ku Misul ya Kuchingejin?

Kupwa kwa kutesh kubabesh piur pa yom kushalijan yakad kal kusadik, antu avud akat kusend kubabesh kwinoku kwawonsu nich usey ukemp. Pakwez, kuta muchim ku kubabesh kukutwish kupandish mwom wey.

Mu Chine mu muvu wa 1975, apana kubabesh anch kukwikal kuzal kwa divu. Amakurump itiyija ni kulondul kubabesh kwinoku. Antu niyawiy itiyija. Tunan ni tunan twa mwom twapanda.

Mwi Ndol muvu wa 1991 mu Filipine, antu a mu mal madia mwishin mwa Mukandu Pinatubo alejana anch kud yishoshot ni rufunfut yadinga yibudikina ku mukandu. Kupwa kwa kubabesh piur pa mwikadil winou mu angond aad, Ditenchik dia Filipine dia in Kwilej Mikandu ya Kasu ni Kuzal kwa Divu diayibabesha mulong wa ubaj wadinga piswimp. Kapamp kamwing, tunan ni tunan twa antu adiokala mwi ndond yiney. Kushik kwinsambishil kwa Kalol 15, nich chidjimin cha usu, kwabudika divu mud malau diaya mwiur ni kumwangikin pa mwab wa akilometre kare chinan ni diaya mitambu yawonsu ya ngand. Kuta muchim kwapandisha tunan ni tunan twa mwom.

Bibil ubabeshin piur pa nsudiel ya ditenchik dia yom dia katat. Tudi katat mu machuku ma nsudiel. Chiyidia nsudiel piswimp, ov uchil ku mes? Ov usadil chakwel udiokal mwi ndond ya ubaj? Nich chitongijok cha kuswapej, ov ukat kuyibabesh antu akwau niyawiy kusal chilik chimwing?

[Chipich chidia pa paj wa 20]

Kuta muchim ku kubabesh kwapandisha mwom wa antu avud Mukandu Pinatubo piwadjibula maut ma kasu

[Chipich chidia pa paj wa 21]

Mwom wa in Kristu atesha kubabesh kwa Yesu wapanda chisu chasheshau Yerusalem mu muvu wa 70 C.C.