“Awiy Kijikap Chom Chikushika”
KUDIWUL pakemp kubabesh kukutwish kulet mar mavud.
Musumb wa Darwin, mu Australie, wadinga mu kwirijekang mulong wa misambu ya dichuku dijim mu muvu wa 1974 pa chisu chadila mpwambu chakwel kwijikish anch kudi rinkind mukash wezinaku. Pakwez musumb wa Darwin wadinga wasala kal mivu 30 pakad kusheshik ku rinkind. Ov mulong wak kusheshik katat? Antu avud a mu musumb kamanap kwau ubaj mud wadinga ukash djat ni pasambisha rinkind kutut ni kudiosh misong ya yikumbu ni kuwish pansh mbumbu ja yikumbu mwadinga mwizwila antu. Kushik pamanch dichuku dialondula, musumb wadinga dishitil.
Mu Colombie pa Kalang 1985, mukandu wa kasu wabuzika. Wadjibula mayal ni malau ma kasu pakad kwiman mayijika antu 20 000 ni kusut a mu musumb wa Armero. Ov kwadingap kubabesh kurutu? Mukandu wazala kurutu kwa angond. Pakwez, antu ijidina kal kushakam mwishin mwa mukandu wa kasu, mu Armero alika kuta muchim. Ayileja antakel anch kukwikal kusheshik katat kamu ak, pakwez awiy kasalap kwau chom ap chimwing chakwel kuyibabesh antu. Apana yijikish ku radio chakwel kuyikasikesh antu. Asadila yijimbish mazu ku egliz mulong wa kuyikasikesh antu chakwel ashakama kwau zoong. Kushik urel, kwabarika yidjimin yaad yikash. Ov wela kusha yom yey ni kuchin? Antu akemp kusu awiy asala usu pakwez antu akwau kasalap usu ap ukemp kushik ni pa chisu chakasikana kupand kand.
Chisu ni chisu in kwilej mwikadil wa divu akat kubwak nich kashinsh ndond kukusadika kuzal kwa divu. Pakwez katwishiningap chisu chivud kulejan chisu chikusadika. Mu muvu wa 1999, mu mangand ma kabuj kuzal kwa divu kwajipa antu piswimp 20 000. Antu avud afa adinga ni kutong anch kiyikezap ap dichuku dimwing kuyishiken.
Mutapu ik Ukata Kwakul ku Kubabesh Kudiokila kud Nzamb Amwinend?
Bibil warumburila nakash yishiken yivud kurutu kwa chisu yilejena machuku ma nsudiel. Kwambatan nich kurumburil kwinoku, ukat kutukasikesh kushinshikin “chirung cha Nowa.” “Mu machuku mading mabeb kand kal mashika,” antu adinga akwatiken nakash nich mijikit ya machuku mawonsu ya mwom, chad awiy kijikap kwau chom chikushika piur pa kuvulijan kwa chisum. Mud muchadinga ku dibabesh diapanay Nzamb kusutil kashalapol wend Nowa, “awiy kijikap chom chikushika djat ni pezina mabeb mayijiyish awonsu shutit.” (Mateu 24:37-39) Ov wela kutesh dibabesh anch wadinga ey? Ov mwamu usadila katat?
Chela kwikal mutapu ik kud ey anch washakama mu Sodom, piswimp ni Karung wa Mungu, mu chirung cha Lot, mwipwend a Aburaham? Ngand yadinga yiwamp mud paradis. Musumb wadinga wa dipit nakash. Antu adinga nich wan ipau. Mu chirung cha Lot, “antu awonsu ading ni kudiang ni kuna, ading ni kulandang ni kulandish, ading ni kukunol mu yir ni kutung.” Mu chisak cha antu mwashakamay chadinga kand cha antu in masandj nakash. Ov wela kuta muchim ku dibabesh padingay Lot ni kulond kwa kufish nich yisalijok yiyimp? Ov wela kutesh anch wa kuleja anch Nzamb wakwatin kal mupak wa kushesh musumb wa Sodom? Ap wela kwey kuman mud maswimbu, mud mwasalau antu ela kwikal atatuwenend a Lot? Ov wela kusambish kuchin kupwa kand kukarumuk kutal kwinyim, mud chasalay mukajend a Lot? Ap anch antu akwau alika kuta muchim ku yibabesh, pakwez dichuku diadiokalay Lot mu Sodom, “kasu ni diseng dia diyal dipidilau anch, ‘soufre’ yadiokal mwiur, yayijip antu awonsu.”—Luka 17:28, 29.
Antu avud mu chirung chetu kakatap kuta muchim ku chom chikushikena. Pakwez yilikej yiney ayilamin mu Dizu dia Nzamb mud dibabesh kud etu, chakwel kutukasikesh KUCHISH KU MES!
[Kamushet/Chipich chidia pa paj wa 22]
Ov Chakin Kamu Kwadinga Mabeb ma Mem pa Mangand Mawonsu?
Antu avud alondining anch Bwat kwadingap mabeb ma mem. Pakwez Bibil ulondin anch Madingaku.
Yesu Kristu amwinend wisambina piur pa mabeb, ni wadinga mwom pimeza, wamamena kamu mwiur.
[Kamushet/Chipich chidia pa paj wa 23]
Ov Chakin Kamu Sodom ni Gomor Yasheshika?
Kwilej kwa yom ya pakuru kuletin uman wa kusheshik kwa misumb yiney.
Rusangu ra muntu ra pakuru riyisambidin.
Yesu Kristu wisambina kusheshik kwinoku, ni yom yashikena ayisambidin mu mabuku 14 ma Bibil.