“Chishany Ku Mes” —Chisu Cha Dirumburish Chashik Kal!

‘Chishany ku mes . . . mulong kiwijanyip pa dichuku

dikwezay Mwant wen.’—MATEU 24:42.

1, 2. Chom ik chafanikeshay nich Yesu kwez kwend?

OV, CHOM ik ukusala anch wadi wij anch mwij ukat kwendangan piswimp mulong wa kukimb mutapu wa kwiy ku yikumbu yidia mwi nsulangen ney? Chakwel kuyichidij akatish ney ni dipit diey, ukuker tul, ni kucha ku mes. Ukudandamen kucha ku mes mulong mwij kakatap kutum mukand wa kwijikish chisu chikwezay. Pakwez, wezining zoong ni pa chisu chakad kumuchingejin.a

² Pa yisu yivud, Yesu wasadila mitapu yikatay kusadil mwij mud chilakej. (Luka 10:30; Yohan 10:10) Piur pa yinship yikeza kumekan pa chirung cha kwisudiel ni yikeza kushikij ku kwez kwend chakwel kurumburish, Yesu wapana dibabesh dined: ‘Chawiy, chishany ku mes, mulong kiwijanyap pa dichuku dikwezay Mwant wen. Pakwez anch mwin chikumbu, wadi wij chisu chikwezay mwij, ing welang kuker tul, mulong wa kumukangesh mwij kubuz chikumbu ni kwandam.’ (Mateu 24:42, 43) Chawiy Yesu wafanikesha kwez kwend nich kwez kwa mwij—pakad kumuchingejin.

3, 4. (a) Kutesh dibabesh dia Yesu piur pa kwez kwend kwitin kusal yom ik? (b) Yipul ik yilankinaku?

³ Chilakej chadinga chifanyidin, mulong dichuku dia kwez kwa Yesu dielap kwijikan. Kwisambishil, mu uprofet wawiy umwing, Yesu walonda anch: “Pakwez ya dichuku dinidia ni chisu, kwikil umwing wija, ni angel a mwiur kijip, ap Mwan, ching Tatuku kusu.” (Mateu 24:36) Yesu, wayikasikesha lel in kumutesh end anch: “Ikalany irijekina.” (Mateu 24:44) Antu atila matu ku dibabesh dia Yesu afanyidin kwikal irijekina, iyendishina ayinau muchifanyidina, chikalap nchik chisu chikwezay mud Mwin Kusadish dirumburish dia Yehova.

⁴ Chinech chilangwishin yipul yimwing yijim: Ov, dibabesh dia Yesu didi ching kusu mulong wa antu a mangand, bil anch in Kristu akin niyawiy aswiridin ‘kucha ku mes’? Ov, mulong wak chidi cha usey ‘kucha ku mes,’ ni mutapu ik tukutwisha kusal mwamu?

Dibabesh Kud Nany?

5. Ov, mutapu ik twija anch dibabesh dia ‘kucha ku mes’ diyitadin kand ni in Kristu akin?

⁵ Chidi chakin anch kwez kwa Mwant kukez kwikal mud kwez kwa mwij pad antu a mangand, atekina upul mu matu mulong wa kulik kutesh dibabesh piur pa ubaj udia kurutu. (2 Pita 3:3-7) Pakwez, chidi nchik ku mutambu wa in Kristu? Kambuy Paul wayifundina ambay nend akaritiy anch: “Mulong en ayinen wijany kal nawamp mudi mudikweza dichuku dia Mwant mudi mwij ukat kwez uchuku.” (1 Tesalonik 5:2) Kwikil kwidjidjek ap pakemp mu manangu metu anch ‘dichuku dia Yehova diezin.’ Ov, chinech chipipeshin usey wetwetu kucha ku mes? Tal anch Yesu wayileja in kwilejend anch: ‘Mulong pa chisu chiwakadiany en kutongin, chawiy chikwezay Mwan a muntu.’ (Mateu 24:44) Kwisambishil, payikasikeshay in kwilejend kudandamen kukimb bil Want, Yesu wayibabesha anch: “Itenchikany; mulong pa muten piwakad kutongijokany en pawiy pakwezay Mwan a muntu.” (Luka 12:31, 40) Ov, chimekenap patok anch Yesu wadinga ni kuyitongin in kwilejend papanay dibabesh anch: ‘Chishany ku mes’?

6. Ov, mulong wak tuswiridina ‘kucha ku mes’?

⁶ Ov, mulong wak tuswiridina ‘kucha ku mes’ ni ‘kwikal irijekina’? Yesu warumburila anch: “Kukez kikal antu aad mu chingand, umwing amudiosh, mukwau amusha. Amband aad akwikala kwitwil ni kutwa wung, umwing amudiosh, mukwau amusha.” (Mateu 24:40, 41) Antu irijekina kal awiy akezau ‘kudiosh,’ ap kupandish, pa chisu chikezau kushesh mangand makad kumuziyil Nzamb. Akwau akez ‘kuyisha’ chakwel kuyishesh mulong adandamena kulondul njil jau ja mwom wa choy. Mu antu inay mukez kwikal antu endila mu kutok mu kachisu kakemp pakwez alika kudandamen kuchish ku mes.

7. Kuburen kwijik chisu chikweza nsudiel kututwishishin kusal yom ik?

⁷ Kuburen kwijik dichuku dia nsudiel ya ditenchik dined dikur kutwinkishin mutapu wa kumekesh anch tukat kumusadil Yehova nich muchim wishitwila. Ov, mulong wak? Chitwishikin kumekan anch nsudiel yilabin kushik. Cha ushon, in Kristu amwing akata kutongang mwamu akepishin kal mushiku wau wa kusal mudimu wa Yehova. Pakwez, kusutil ku kwipan kwetu, twipanin kal ayinetu a kabuj kudiay Yehova mulong wa kumusadil. Antu amwija Yehova ij anch ndiy kakutwishap kubang mushiku umekeshinau ching kusu kwisudiel. Ndiy ukat kutal chidia mu muchim.—1 Samwel 16:7.

8. Mutapu ik rukat ra Yehova ritubachikina kudandamen kucha ku mes?

⁸ Mulong tumukatin chakin Yehova, tukat kutan musangar ujim mu kusal rusot rend. (Kuseng 40:8; Mateu 26:39) Ni tusotil kumusadil Yehova chikupu. Ruchingej riner ridiap ra usey ukemp anch mulong tufanyidin kuchingelaku kand kupandakanamu mutapu twadia ni kuchingejin. Chipandakena usey, tudandamedin kuchish ku mes mulong tusambedin kamu kuman chikurumburika kwez kwa dichuku dia Yehova mu kuwanyin kwa rutong rend. Kusot kwetu nich kashinsh kumusangaresh Nzamb kutubachikin kusadil yiyul ya Dizu diend ni kutek Want wend pa ndond ya kusambish mu mwom wetu. (Mateu 6:33; 1 Yohan 5:3) Tushinshikinany mutapu kudandamen kucha ku mes kukutwisha kwikal nich usu pa mipak yitukwatina mu mwom wetu pichuku-pichuku.

Kwisu Kuyila Mwom Wey?

9. Ov, mulong wak kudi kuswir kwa kuswapej kud antu a mu mangand kujingunin kurumburik kwa miten yetu?

⁹ Antu avud ilel ij anch milong yikash ni yishiken yikash yikadil kal yom yisadikina kwawonsu dichuku ni dichuku, ni chitwishikin anch kasangerap nich mutapu uyila mwom wau. Ov, ij chakin kamu kurumburik kwa mikadil yidia mu mangand? Ov, ij anch tudi mu machuku ma “kwisudiel kwa mangand”? (Mateu 24:3) Ov, ajingunin anch kuvulijan kwa yifu, chisum, kuburen kwa winzamb yimekeshin anch yisu yiney yidi “machuku ma kwisudiel”? (2 Timote 3:1-5) Kudi kuswir kwa kuswapej ku mutambu wau kujingunin kurumburik kwa yom yiney yawonsu ni kushinshikin mutapu uyila mwom wau.

10. Chom ik tufanyidina kusal chakwel kwikal nich kashinsh anch tudandamedin kucha ku mes?

¹⁰ Ov, chidi nchik kud etu? Dichuku ni dichuku tukwet mipak ya kukwat piur pa mudimu wetu, ukash wetu wa mujimbu, dijuku dietu, ni difukwil dietu. Twij yilondilay Bibil, ni twikasikeshin kuyisadil. Chawiy lel, tuwapidil kwiyipul ayinetu anch: ‘Ov, nikat kulikin yakamish ya mwom chakwel yimpumbula kwi ntong jam ja muspiritu? Ov, nikat kushil filozofi wa mangand ndond ni yitongijok yend, chakwel yitakela mipak nifanyidina kukwat?’ (Luka 21:34-36; Kolosay 2:8) Tufanyidin kudandamen kumekesh anch tumuchingejidin Yehova nich muchim wetu wawonsu ni tukatap kukungamen pa chovu chetu ayinetu. (Jinswir 3:5) Mwi njil yiney, tukez ‘kulamat ba ku mwom wakin’—mwom wa chikupu mu mangand masu ma Nzamb.—1 Timote 6:12, 19.

11-13. Yom ik tukutwisha kwilejin ku yilakej ya yom yashikena (a) mu machuku ma Nowa? (b) mu machuku ma Lot?

¹¹ Bibil ukwet yilakej yivud ya dibabesh yikutwisha kutukwash kudandamen kucha ku mes. Tushinshikinany yashikena pa chirung cha Nowa. Kurutu kamu kwa chisu chifanyidina, Nzamb washinshikina anch kufanyidin kwikal dibabesh. Pakwez kudioshamu kusu Nowa ni dijuku diend, antu adiwula kwau dibabesh. (2 Pita 2:5) Pa chinech, Yesu walonda anch: “Mudi muchadinga pa machuku ma Noa, mwamu muchikeza kikal kwez kwa Mwan a muntu. Mulong mu machuku minima kikwadingap kal mabeb, ading ni kudia ni kuna, ading ni kwatan ni kwachik, ni kushik pa dichuku diandamay Noa mu wat, awiy kijikap ni pimeza mabeb mayijiyish awonsu shutit, ni mwamu kand muchikeza kikal kwez kwa Mwan a muntu.” (Mateu 24:37-39) Yom ik tukutwisha kwilejinaku? Anch umwing wetu washil milong ya mangand ndond—yikalap nchik mijikit yifanyidina ya mwom—yiyikela mijikit ya muspiritu yitulejinay Nzamb anch yifanyidin kwikal pa ndond ya kusambish, tufanyidin kutongin nakash pa mwikadil wetu.—Rom 14:17.

¹² Tongin kand, pa machuku ma Lot. Musumb wa Sodom, mwadinga mushichay Lot ni dijuku diend, wadinga wa dipit nakash, pakwez kand mwasadikanga masandj mapandikena. Yehova wayituma angel end chakwel aushesha. Angel amukasikesha Lot ni dijuku diend kuchin mu Sodom ni kuyijidik kutal kwinyim. Chayikasikeshau kud angel, awiy adiokala mu musumb. Pakwez, mband wa Lot, wadandamena kutongijokin piur pa chikumbu chend chashala mu Sodom. Wabwambwila, watal kwinyim ni pa chinech ndiy washadisha mwom wend. (Disambishil 19:15-26) Yesu wababesha mu uprofet anch: “Muvurikany mband wa Lot.” Ov, tukat kusal kwambatan nich dibabesh dined?—Luka 17:32.

¹³ Antu atesha kubabesh kwa Nzamb apanda. Mwamu chadinga ku mutambu wa Nowa ni dijuku diend ni kud Lot ni anend amband. (2 Pita 2:9) Anch twata muchim ku kubabesh kudia mu yilakej yiney, tukwikal kand akasikeshinau nich uruu wa dipandish udiamu mulong wa antu akatina kutentam. Rusangu riner rizwinshin michim yetu nich ruchingej rakin ra kuwanyin kwa kushilamu kwa Nzamb kwa ‘maur masu ni mangand masu’ mukeza ‘kwikal kutentam.’—2 Pita 3:13.

‘Chisu cha Dirumburish Chashik Kal’!

14, 15. (a) ‘Chisu’ cha dirumburish chisendin yom ik? (b) ‘Kumwov Nzamb wom ni kumwinkish uyaj’ kwitin chom ik?

¹⁴ Chom ik tukutwisha kuchingejin, pitudandamedina kucha ku mes? Buku wa Kujingunik ulejen mu mutapu ujim kulondulijan kwa yishiken mu kuwanyin kwa rutong ra Nzamb. Kusal kwambatan nich yilondilau kudi kwa usey anch tusotin kwikal irijekina kal. Uprofet urumburil nawamp yinship yikushikena pa “dichuku dia Mwant,” dichuku diasambisha pamudishau Kristu want mwiur mu muvu wa 1914. (Kujingunik 1:10) Kujingunik upwitidin manangu metu kudiay mwangel winkishau “rusangu ruwamp ra chikupu.” Ndiy ulondil nich dizu dikash anch: “Mwovany Nzamb wom, panany uyaj kud ndiy! Mulong chisu chend cha kuyirumburish antu chashik kal.” (Kujingunik 14:6, 7, MM) ‘Chisu’ chinech cha dirumburish kadi kachirung kiswimp; chisendin yom yaad, kulejan ni kurumburish kwisambidinau mu uprofet winou. Tushich katat mu kachirung kinak.

¹⁵ Katat, kurutu kwa kushiken kwa muten wa dirumburish, atukasikeshin anch: “Mwovany Nzamb wom, umwinkany uyaj.” Mazu minam marumburikin ik? Wom ufanyidina wa Nzamb uwapidil kutubachik kwiyep kusal yom yiyimp. (Jinswir 8:13) Anch tukat kumulimish Nzamb, tukez kumutesh nich kalimish kakurikina. Tukezap kukwatikan nich yom yindjing mu chilik cha kudiwul kutang Dizu diend, Bibil, chisu ni chisu. Tukezap kupipej chiyul chend, cha kukumangan ku yikumangan ya Ukristu. (Hebereu 10:25) Tukez kukat chisend cha kulejan rusangu ruwamp ra Want wa Umesia wa Nzamb nich mushiku. Tukez kumuchingejin Yehova mu yisu yawonsu nich muchim wetu wawonsu. Chitwija anch Yehova udi Mukaleng Mwant, tukat kumulimish kusutil ku kumuziyil mud Mukaleng wa mwom wetu. Ov, chakin kamu ukat kumwov Nzamb wom ni kumwinkish uyaj mu jinjil jinej jawonsu?

16. Ov, mulong wak tulondila anch dirumburish dia Babilon Mujim disambidinau mu Kujingunik 14:8 diasadikin kal?

¹⁶ Shapitre wa 14 wa Kujingunik udandamedin kurumburil yinship yikushikena pa muten wa dirumburish. Babilon Mujim, want wa mangand wa relijon wa makasu, ndiy wisambidinau wa kusambish: “Mwangel mukwau wa kaad walondula, wend ulond anch: ‘Wawa kal! Babilon mujim wawa kal!’” (Kujingunik 14:8, NW) Inge, ku mes kwa Nzamb, Babilon Mujim, wawa kal. Mu muvu wa 1919 atushalapol a Yehova azizidilau many akolika ku urul wa malejan ni yisal ya Babilon, wayikela kal antu ni michid mu tutikit twa mivu. (Kujingunik 17:1, 15) Atwisha kudiosh kamu pinipa kwipan ayinau mu kutwal kurutu difukwil diakin. Kulejan rusangu ruwamp ra Want wa Nzamb pa mangand mawonsu kwasambisha kudiosh kamu pinipa.—Mateu 24:14.

17. Chom ik tufanyidina kusal chakwel kudiokal mu Babilon Mujim?

¹⁷ Pakwez yiney yawonsu kiyawiyap kusu yiwanyishina dirumburish dia Nzamb piur pa Babilon Mujim. Disheshik diend dia nsudiel diezin piswimp ap kamu. (Kujingunik 18:21) Bibil uyingin kwend payikasikeshinay antu kwawonsu kudiau anch: ‘Diokalany mu musumb winou [Babilon Mujim], . . . anch usotilanyap kwibomb ku yitil yend.’ (Kujingunik 18:4, 5) Mutapu ik tukutwisha kubudik mu Babilon Mujim? Chinech chitin yivud kupandakanamu kwau kukatul kusu urund win wawonsu nich relijon wa makasu. Usu wa Babilon umeken mu misambu ni yaku yivud ya antu, mu mangand mitiyidina antu kusal masandj, makasikeshina mulad wa mwom ni kwipuwangesh kukwachikina nich aspiritu ayimp, ni yom yikwau yivud. Chakwel kudandamen kucha ku mes, chidi cha usey anch tumekesh uman anch tudi kulemp ni Babilon Mujim mu yom yawonsu, mu yisal yetu ni mu maku ma muchim wetu.

18. Kulondulijan nich yisambidinau ku Kujingunik 14:9, 10, chom ik chiyepinau in Kristu adimukina?

¹⁸ Ku Kujingunik 14:9, 10, isambidinaku chom chikwau piur pa ‘chisu cha dirumburish.’ Mwangel mukwau, niyend ulondil nich dizu dijim anch: “Anch kudi muntu wamwifukwila kal nnam [wa chidiany] ni chirumbidij chend, ni kutambul chijingidij pa mpal pend ap pa chikas chend, ni yend kand ukez kuna maruvu ma ujim wa Nzamb.” Ov, mulong wak? Mulong ‘nnam wa chidiany ni chirumbidij chend’ yidi yifanikesh ya winyikel wa muntu wakad kwitiyij ukaleng wa Yehova. In Kristu adimukin nakash chakwel kangal ez atambul chijingidij chau kusutil ku ngikadil ya manangu ap ku yisal, mud muchidia ku mutambu wa antu akad kwijik kwikalaku kwa ukaleng wa Nzamb wakin, Yehova. In Kristu ij anch Want wa Nzamb awimikin kal mwiur, ni ukez kupuchol ni kusudish winyikel wa muntu, chad wawiy ukez kushakam chikupu.—Daniel 2:44.

Kangal Kushadish Chitongijok Chey cha Kuswapej!

19, 20. (a) Chitwashikena kal kulemp mu machuku ma nsudiel, chom ik twija nich kashinsh chikusotay Satan kusal? (b) Tufanyidin kukwat mupak wa kusal ik?

¹⁹ Chitwija anch twashikedin kal kulemp nakash mu machuku ma kwisudiel, yakamish ni yoziu yikudandamen kwiwejinaku. Chitushicha mu ditenchik dined dikur ni chitukwachikina nich kuburen kuwanyin kwetu ayinetu, tukwachikin nich yom mud kuyip kwa ukash wa mujimbu, upal, rufu ra akatish, yovil yisansena, kushadish musangar pitumena kuburen kusanger mulong wa usu tusadila mu kulejan Dizu dia Nzamb, ni yom yikwau yivud. Kangal kuvuramen anch Satan usotin kusadil yakamish turishina nich chakwel kutushikij ku kulik—kulik kulejan rusangu ruwamp ap kulik kushakam kwambatan nich yijil ya Nzamb. (Efes 6:11-13) Chinech chidiap chisu cha kushadish chitongijok chetu cha kuswapej chikalap nchik chirung tushicha!

²⁰ Yesu wading wij anch tukez kwikal nich yipwichik yivud ya kutushikij ku kulik, chawiy chatuyulay anch: “Chishany ku mes, chad lembilany chakwel kangal wawany mu yoziu.” (Mateu 26:42) Tudandamenany, komb, kucha ku mes chakwel kujingunin pitudia mu kusut kwa chisu. Tudimukinany mpung ya Satan yikutwisha kutuchirish kwinyim ap kulik uyakin. Tukwatany mupak wa kulejan rusangu ruwamp ra Want wa Nzamb nich mushiku ujim ni kutakaman. Chakin, tulamany chitongijok chetu cha kuswapej pituteshina kubabesh kwa Yesu anch: ‘Chishany ku mes.’ Anch twasal mwamu, tukez kumushiman Yehova ni kwimekesh ayinetu anch tudi mukach mwa antu akutambula yiyukish yend ya chikupu.

Ov, Ukwakul Nchik?

• Ov, mutapu ik twija anch kubabesh kwa Yesu kwa “kudandamen kucha ku mes” kuyitadil in Kristu akin?

• Yilakej ik ya dibabesh yidia mu Bibil yikutwisha kutukwash “kudandamen kucha ku mes”?

• Chisu cha dirumburish chom ik, ni chom ik chitukasikeshinau kusal kurutu chishika?

[Dizu didia Kwishin kwa paj]

[Chipich chidia pa paj wa 26]

Disheshik dia Babilon Mujim didi piswimp