DILEJAN 4

Yesu Kristu Udi Nany?

1. Mutapu ik wasambisha mwom wa Yesu?

1. Yesu udi mwiur; 2. Yesu uchid bebe udi ni Mariy ni Joseph; 3. Yesu uyifundichin an akemp — Mikadil ik yadingay ni Yesu yasala anch chiyiswapel antu kwabamb nend?—MATEU 11:29; MARKO 10:13-16.

Chinyim ni antu akwau, Yesu washakama mwiur mudi muntu wa muspiritu kurutu kwa kuvadik pansh. (Yohan 8:23) Ndiy wading chitangil cha kusambish cha Nzamb ni wakwasha mu kutang kwa yom yikwau. Ndiy mwan umwing kusu watangau kudi Yehova ni chawiy lel chimutazukinau anch “mwanend kapokal.” (Yohan 1:14) Yesu wasala mudi Muruu wa Nzamb, chawiy lel amutazuka anch “Dizu.”—Tang Jinswir 8: 22, 23, 30; Kolosay 1:15, 16.

2. Ov, mulong wak Yesu weza pa divu?

Nzamb wamutuma Mwanend pa divu kusutil ku kutek mwom wend mwivum mwa mujik mwin Yuda wa dijin dia Mariy. Chawiy lel Yesu kadingap ni tatuku wa chiuntu. (Luka 1:30-35) Yesu weza pa divu mulong wa (1) kulejan uyakin piur pa Nzamb, (2) kulet chilakej piur pa mutapu wa kusal rusot ra Nzamb, ni (3) kupan mwom wend uwanyidina mudi “difut.”—Tang Mateu 20:28.

3. Ov, mulong wak tuswiridin difut?

Difut didi usey ukatau kufut mulong wa kumubudish muntu mu rukan. (Kubudik 21:29, 30) Rufu ni upal yadingap mu rutong ra kusambish ra Nzamb piur pa mangand. Ov, mutapu ik twija mwamu? Nzamb wamuleja muntu wa kusambish, Adam anch ang wasal chitazukinay Bibil anch “chitil,” ukez kufa. Anch Adam kasalap chitil, ndiy kelap kufa. (Disambishil 2:16, 17; 5:5) Kwambatan nich Bibil, rufu ‘randama’ mu mangand ma antu kusutil kudi Adam. Ni Adam wapalangesha chitil ni chibau cha chitil kudi anend awonsu. Chawiy lel, tuswiridin difut mulong wa kutudiosh ku chibau cha rufu chitwaswana kudi Adam.—Tang Rom 5:12; 6:23.

Ov, nnany ukutwisha kufut difut mulong wa kutukwol ku rufu? Pitukata kufa, tufutining chibau mulong wa yitil yetu ayinetu kusu. Muntu wakad kuwanyin ap umwing kakutwishap kufut difut mulong wa yitil ya antu akwau.—Tang Kuseng 49:7-9.

4. Ov, Yesu wafa mulong wak?

Yesu ukimbin kufa pa mutond wa mar, pakwez kupwa amuvumbul kal ni ukat kutakel mudi mwant mwiur

Chinyim niyetu, Yesu wading uwanyidin. Chawiy ndiy kafap mulong wa yitil yend amwinend—ndiy kasalap chitil ap chimwing. Pakwez, Yesu wafa mulong wa yitil ya antu akwau. Nzamb wamekesha rukat rend ripandakena mulong wa antu pamutumay Mwanend chakwel atufila. Yesu wamekesha kand rukat kudi etu kusutil ku kumuziyil Tatukwend ni ku kupan mwom wend mulong wa yitil yetu.—Tang Yohan 3:16; Rom 5:18, 19.

Tal video ulondina anch Mulong wak Yesu Wafa?

5. Ov, chom ik chisadinay Yesu katat?

Padingay pa divu, Yesu wayoka ayej, wayivumbul afu, ni wayidiosha antu mu uyimp. Ndiy wamekesha yom yikezay kuyisadil antu awonsu aziyidina. (Mateu 15:30, 31; Yohan 5:28) Kupwa kwa rufu ra Yesu, Nzamb wamuvumbula nich mujimbu wa muspiritu. (1 Pita 3:18) Chawiy lel, Yesu wachingela ku chikas cha katatuku cha Nzamb djat ni pamwinkishau kudi Yehova usu wa kuyikel mudi Mwant wa mangand mawonsu. (Hebereu 10:12, 13) Nlel unou Yesu uyikedil mudi Mwant mwiur, ni in kwilejend adia pa divu alejen rusangu ruwamp mu mangand mawonsu.—Tang Daniel 7:13, 14; Mateu 24:14.

Piswimp ap, Yesu ukez kusadil usu wend mudi Mwant mulong wa kupwish mar mawonsu ni kuyishesh antu amaletin. Antu awonsu atekina ritiy rau mudiay Yesu ni kumuziyil akez kusanger mwom mu paradis pa divu.—Tang Kuseng 37:9-11.

Anch usotin kwijik jinsangu jivud, tal shapitre wa 4 ni 5 wa buku Chom ik Chitufundishinay Bibil?