CHIKUNKU 4
Mutapu wa Kusadil Nfalang
“Yiyul yawiy yikata kukasikesh yitongijok ya kusal yom.”—Jinswir 20:18
Etu awonsu tuswiridining nfalang mulong wa kukwash majuku metu nich yom yiswiridinau. (Jinswir 30:8) Kupwa kwa yawonsu, ‘nfalang jidi diking.’ (Mulej 7:12) Piudianya ambay a uruw, chikutwish kukasikan kwisambin pa nfalang, pakwez, kangal walikidilany nfalang jikala musul wa milong mu uruw wen. (Efes 4:32) Ambay a uruw afanyidin kwichingejin umwing ni mukwau ni kusal pamwing chisu chikwatinau mupak piur pa mutapu ukezau kusadil nfalang.
1 TENCHIK NAWAMP
CHILEJENAY BIBIL: “Anch muntu umwing wa pakach penen ukatil kutung dinguj dilemp, ukat kushakam pansh pakusambish mulong wa kurijek usey wa yom yawonsu, chakwel ijik anch ukwet nfalang jiwanyidina ja kupwish nich mudimu wawonsu.” (Luka 14:28) Chidi cha usey kutenchik en awonsu mutapu ukeza kusadilany nfalang jen. (Amos 3:3) Kwatany mupak wa kwijik yiuswiridinanya kuland ni mutapu ik ukutwishanya kusal usu wa kuyiland. (Jinswir 31:16) Chidiap anch mulong ukwetany nfalang ja kuland chom kanang, chawiy ufanyidinany kuchiland. Ipukany mabaz. Sadilany ching kusu nfalang jiukwetanya.—Jinswir 21:5; 22:7.
CHIUKUTWISHA KUSAL:
Anch ukwetany nfalang jivud kwisudiel kwa ngond, kwatany mupak pamwing wa kwijik mutapu ukezany kujisadil
Anch ukwetany dibaz, tenchikany pakampwil mutapu wa kukepish kusadil nfalang jen. Chilakej, ukutwish kurijekany yakudia yen ayinen pa ndond pa kuya ku restoran
2 LOND PATOK NI MU MUTAPU UWAMP
CHILEJENAY BIBIL: “Mulong tusotil kusal yom yitentamina ku mes ma [Yehova ] ni ku mes ma antu kand.” (2 Korint 8:21) Ikal mwin kashinsh kudi mbay ney wa uruw piur pa mutapu utambwiling nfalang ni pa mutapu wa kujisadil.
Mwijikisha yisu yawonsu mbay ney wa uruw chisu ukwatininga mipak yijim piur pa nfalang. (Jinswir 13:10) Kwisambin pamwing piur pa nfalang kukez kukukwashany kulam chisambu mu uruw wen. Kangal kuman nfalang jiukweta mudi jidi jeyey amwiney, pakwez jimana mudi jidi ja dijuku. —1 Timote 5:8.
CHIUKUTWISHA KUSAL:
Itiy uvud wa nfalang jikutwishau kusadil kudi muntu ni muntu pakach pen pakad kumwijikish mukwau
Kangal wachingejin djat ni pa kulanka mulong kanang kurutu kwa kwisambin piur pa nfalang