Ov, Nfalang Jawiy Musul wa Yom Yawonsu Yiyimp?

Chakul cha Bibil

Bwat. Bibil kalondinap anch nfalang jid jiyimp, ap kalondinap anch jawiy musul wa yom yawonsu yiyimp. Antu avud alondining anch “nfalang jawiy musul wa yom yawonsu yiyimp.” Pakwez Bibil kalondinap kwend mwamu. Chakin Bibil ulondin anch “rukat ra nfalang diawiy disambishil dia yom yawonsu yiyimp.”a—1 Timote 6:10.

Yom ik yilondinay Bibil piur pa nfalang?

Bibil ulondin anch kusadin nfalang nich manangu, kukutwish kwikal kwa ukwash ni kukutwish “kukuchidij.” (Mulej 7:12) Chikwau kand, Bibil uyijikitishin antu akweting chaku cha kupan kud antu akwau, kuwejaku ni kuyinkish nfalang.—Jinswir 11:25.

Pa chisu chawiy chimwing, Bibil utubabeshin anch tufanyidinap kutek nfalang pa ndond ya kusambish mu mwom wetu. Ulondin anch: “Kangal ris ra nfalang rakuyikelany, pakwez sangarany nich yom yiukwetany[a].” (Hebereu 13:5) Dilejan dia verse winou did dia kusadin nfalang mu mutapu uwamp ni kulik kusurab mapit. Pakwez tufanyidin kusanger yom tukweta nich kuswir, mud yakudia, masun ni pa kulal.—1 Timote 6:8.

**Mulong wak Bibil utubabeshin piur pa rukat ra nfalang?**

Antu akweta ris kakez kaswanap mwom wa chikupu. (Efes 5:5) Diyingishin dimwing dia anch ris ud mutapu wa kwifukwil akish ap difukwil dia makasu. (Kolosay 3:5) Diyingishin dikwau did anch mulong wa kwikal nich chom chiswirikedinay, mwin ris yisu yivud ukat kusalang yom yiyimp. Jinswir 28:20 ulondin anch “muntu ukata kusot kupit swa swa kakuyingap.” Muntu mwin ris ukutwish kusal yom yiyimp nakash mud kuyovish antu wom, kubwitan yom, kwiy, kwiy antu ap yom ku usu, ap kujipan.

Ap anch rukat ra nfalang rikat chisu chawonsu kuletish yom yiyimp, pakwez kukutwish kwikal yibudikin yikwau yiyimp. Bibil ulondin anch “antu asotila kwikal ampich akat kuwa mu yoziu, ni kufa mu mupit wa maku mayimp ma usup.”—1 Timote 6:9.

Mutapu ik tukutwisha kutaninamu mu yiyul ya Bibil piur pa nfalang?

Anch tusadinap yom yiyimp ni twasal yom yimusangareshina Nzamb mulong wa kukimb nfalang, antu akwau akutulimish, tukwitapil dilau dia Nzamb ni ukutukwash. Nzamb uyikanin mwamu antu akata kusal usu wa kumusangaresh: “Kinikukushap, kinikez kakulikap chikupu.” (Hebereu 13:5, 6) Utwinkishin kand kashinsh anch “muntu ujijamena ukez kayuk nakash.”—Jinswir 28:20.

Maverse ma Bibil malondina piur pa nfalang

Mulej 7:12: ‘Nfalang jid diking.’

Kurumburik: Anch nfalang ajisadin nich manangu, jikutwish kwikal ja ukwash mulong jikutwish kumuletin muntu diking mu chilik kanang.

Luka 12:15: “Mwom wakin wa muntu kiudiap mu yom yikwetay, ap anch ukwetap nchik mapit mavud.”

Kurumburik: Nfalang chawiyap chom cha usey nakash mu mwom wetu, ni jikutupandishap kwetu.

1 Timote 6:10: “Rukat ra nfalang diawiy disambishil dia yom yawonsu yiyimp. Pakwandamamu, antu amwing apumbukin kal kulemp ni ritiy rau. Michim yau yikat kutem nich yakamish yivud.”

Kurumburik: Nfalang ajinau jiyipinap kwau. Pakwez antu akatina nfalang—akata kujitek pa ndond ya kusambish mu mwom wam, akat kwikakin milong, mud kwaurik kwa majuku mau ni ukash wa mujimbu uyimp mulong akat kusal midimu yikash nakash.

Hebereu 13:5: “Kangal ris ra nfalang rakuyikelany, pakwez sangarany nich yom yiukwetany[a].”

Kurumburik: Pa ndond pa kwipond mulong wa kukimb mapit, chid cha manangu kusanger yom tukweta nich kuswir.

Mateu 19:24: “Chikasiken kudi nnam ukweta ndund pa nyim kusut mu dipan dia [ndong], pakwez chipandaken kukasikan kudi mpich kwandam mu Want wa Nzamb.”

Kurumburik: Yesu wading wapwish kal kumutazuk nsand umwing mpich mulong wa kumulondul. Nsand winou walika mulong wading ukatin mapit mend nakash. Chawiy chapanay Yesu kubabesh kwinoku. Muntu utekina mapit pa ndond ya kusambish kusutamu Nzamb ukutwish kushadish mwom wa chikupu.

a Verse winou amukarumuna kand anch: “Rukat ra nfalang wawiy musul wa yom yawonsu yiyimp ya mitapu yawonsu.”