Kuvadik kwa An Kuswimpining Uruw

Kuvadik kwa mwan kukutwish kwalet musangar ap mar kudi ambay a uruw. Piudianya anvaj asu, ukutwishany kushimok pa kuman anch ukezany kusadil chisu chen chawonsu ni usu wen wawonsu mulong wa kumubangin mwanen. Kuburedin kulal tul pamwing ni kuswimp kwa yovil kukutwish kwatek urund wen wa piswimp mu mwikadil wa kupwitijan. En awonsu aad ukez kutenchikany mutapu wa kumubangin mwanen ni kulam uruw wen. Ov, mutapu ik chiyul cha Bibil chikutwisha kukukwashany chakwel urishany nich yikokujol yiney?

1 IJIK NAWAMP MUTAPU MWAN USWIMPINAY MASHAKAMIN MA MWOM WEN

CHILEJENAY BIBIL: “Rukat rikat kushimpish muchim, rudimukin kand. Rukat kirukwetap mukau, rukat kiribazilap, ap kwishimek.” (1 Korint 13:4, 5) Piudia maku musu, chimeken anch chitongijok chey chidi cha kumubangin mwaney. Pakwez, nfumwey ukutwish kwiyov mudi umudiwil, chawiy kangal wavuramen anch ni ndiy kand uswiridin kumubangin. Kusutil ku kushimpish muchim ni ku kudimuk, ukutwish kumukwash chakwel iyova anch uswiridiken ni wipanin mu kumubangin mwanen.

‘Niyen amakundj . . . shakamany nawamp nau kwambatan nich ronganyin.’ (1 Pita 3:7) Ijik nawamp anch mukajey ukez kusutish usu wend wawonsu mulong wa mwanend. Ndiy ukwet yisend yisu ni yikutwish kumunenganesh, kumuziyish ap kumumesh mar. Yisu yimwing, mukajey ukutwish kukwovish ujim, pakwez, pakish kwitudish, mulong muntu “ukweta ujim ukemp umupandakenamu mwin dikand kuwap.” (Jinswir 16:32) Mekesh anch udi muntu mwin manangu ni pan ukwash uswiridikenay.​—Jinswir 14:29.

CHIUKUTWISHA KUSAL:

• Atatuku: Yikwashany akajen chakwel ayibangina an uchuku ni muten. Tekany mupak piur pa uvud wa chisu chiukusutishanya mu mijikit yikwau chakwel usutishany chisu chivud pamwing ni akajen ni anen

• Amaku: Anch anfumwen ipanin mu kukukwashany kuyibangin an, itiyany ukwash wau. Anch kawanyishinap nawamp chisend chinech, kangal wayilondany nayimp, pakwez, yilejena mu mutapu uwamp chifanyidinau kusal

2 KASIKESHANY URUND WEN WA PISWIMP

CHILEJENAY BIBIL: “Awiy aad akwikal mujimbu umwing.” (Disambishil 2:24) Ap anch ukwetany chid chisu mu dijuku dien, vurikany anch ey ni mbay ney wa uruw udandamedinany kwikal “mujimb umwing.” Salany usu wen wawonsu chakwel ulamany urund wen wa piswimp.

En amband, sangerany amboku ukwash wa anfumwen. Mazu men ma kujikitish nich makutwish kwikal ma ‘kwokan nich.’ (Jinswir 12:18) En amakundj, yilejany akajen mutapu uyikatinanya ni mutapu ukwetau usey. Yishimanany piur pa mutapu ubangidinau majuku.​—Jinswir 31:10, 28.

“Kangal wasot kusu ching kuwap kwey amwiney, pakwez sot kuwap kwau akwen.” (1 Korint 10:24) Yisu yawonsu sal yom yipandakena kuwamp mulong wa mbay ney wa uruw. Piudianya ambay a uruw, itekinany chisu cha kwambamb, cha kujikitishan ni cha kuteshijan umwing ni mukwau. Kangal kwikal nich choy anch wovany maswir ma kumanijan umwing ni mukwau. Shinshikin pa maswir ma mbay ney wa uruw. Bibil ulondin anch: “Kangal wakokijanany kusankan pamwing.” (1 Korint 7:3-5) Chawiy lel, isambinany nich kashinsh mulong winou pakach pen. Kushimpish kwen kwa muchim ni kwijik nawamp kukez kukasikesh urund wen wa piswimp.

CHIUKUTWISHA KUSAL:

• Kangal wavuramenany kusutish chisu pamwing

• Sal tuyom tukemp tukutwisha kumwovish mbay ney wa uruw anch umukatin, mudi kumutumin kamukand ap kumwinkish kachipan kanang

3 MUFUMBANY MWANEN

CHILEJENAY BIBIL: “Kudiokal ku wanikanch wey, ey wij kal mikand yitumbila, yawiy yikweta ukash wa kukwinkish ey manangu chakwel upandila.” (2 Timote 3:15) Tenchik yom yiukeza kusal chakwel umufundisha mwaney. Ukwet ukaliweny wamushena wa kwilej, ap kurutu avadika. Ap padingay mwivumu, mwaney ukutwish kujingunin dizu diey ni kwakul ku yovil yey. Mutangina ap anch uchidi mwanikanch. Ap anch kakutwishap kutesh nawamp yom yiutangina, chikutwish kumukwash chakwel asangera kutang pa chisu chikupamay.

Mwaney kandikal ikala nsand ap changadim chakwel atesha yom yiulondina piur pa Nzamb. Mulika atesha piumulembidila Yehova. (Kuvurik Yijil 11:19) Ap anch wiswedishinany nend pamwing, isambina piur pa yom yatangay Nzamb. (Kuseng 78:3, 4) Payilay mwaney ni kupam, ukez kukudish rukat rend piur pa Yehova ni ukez kwilej kand kumukat.

CHIUKUTWISHA KUSAL:

• Lembil pakampwil mulong wa kwikal nich manangu ma kumufumb nich mwaney

• Muchirikidina mwaney mazu ni yitongijok yijim yikeza kumukwash kusambish kwilej pachidiay mwan mukemp