Kimbany Nzamb Mulong wa Uruw Usangareshina

Yehovaa Nzamb watenchika nawamp uruw wa kusambish. Bibil utulejin anch ndiy wamutanga mband wa kusambish ni ‘wamupana kudi ikundj.’ Adam wasangara nakash ni walonda anch: “Dined katat didi difup dia mafup mam ni musuny wa misuny yam.” (Disambishil 2:22, 23) Chawiy lel, Yehova usotining kand antu atijadina kal chakwel ikala nich musangar.

Anch watijanany, ukutwishany kutongijok anch yom yawonsu yikez kwikal nawamp kamu. Chimeken patok anch, ikundj ni mband akatijadina chakin kamu umwing ni mukwau akez kwikal nich milong kanang. (1 Korint 7:28) Mu broshir winou, ukez kutanamu yany ya Bibil anch wayisadil yikutwish kukwash uruw ni dijuku diey yikala nich musangar.​—Kuseng 19:8-11.

1 ITIY CHISEND CHAKWINKISHAY YEHOVA

CHILEJENAY BIBIL: Ngatan udi mutu wa dijuku.—Efes 5:23.

Anch udi ngatan, Yehova ukwitin chakwel umulama nawamp mukajey. (1 Pita 3:7) Ndiy wamutanga mband mulong wa kwikal nkwash wey ni usotin chakwel ushakam nend nich kalimish ni rukat. (Disambishil 2:18) Ufanyidin kumukat mukajey nakash ni kutek maswir mend pa ndond ya kusambish kupandakanamu maswir mey.—Efes 5:25-29.

Anch udi ngachik, Yehova ukwitin chakwel umulimisha nfumwey nakash ni umukwasha chakwel awanyisha chisend chend. (1 Korint 11:3; Efes 5:33) Ukumukwash mu mipak yend ni kusal pamwing nend nich muchim wawonsu. (Kolosay 3:18) Anch wasal mwamu, ukez kwikal wa ufun ku mes kwa nfumwey ni kwa Yehova.​—1 Pita 3:1-6.

CHIUKUTWISHA KUSAL:

• Mwipula mbay ney wa uruw pa mutapu ukutwisha kwikal ngachik ap ngatan muwamp. Tesh nawamp kamu, ni sal usu wey wawonsu ukwitina kusal chakwel uswimpa

• Ikal mwin kushimpish muchim. Chikez kwit chisu chakwel en awonsu aad wilejany mutapu wa kumusangaresh umwing ni mukwau

2 BANGIN CHAKIN KAMU PA YOVIL YA MBAY NEY WA URUW

CHILEJENAY BIBIL: Uswiridin kubangin pa maswir ma mbay ney wa uruw. (Filip 2:3, 4) Shakam ni mbay ney wa uruw mudi chom cha usey, vurik anch Yehova uyitining atushalapol end chakwel ikala in “kwitudish kudi antu awonsu.” (2 Timote 2:24, TMK) Bibil ulondin anch: “Kulond mazu makash mudi kutap kwa mpak ya musamun, pakwez jindim ja in manangu jikat kwokan.” Chawiy, tond nawamp mazu mey. (Jinswir 12:18) Spiritu wa Yehova ukez kukukwash chakwel ulonda mazu mawamp ni ma rukat.—Galatia 5:22, 23; Kolosay 4:6.

CHIUKUTWISHA KUSAL:

• It ukwash mu malembil chakwel ushimpisha muchim ni ulama manangu mawamp kurutu kwa kwisambin milong yikash pamwing ni mbay ney wa uruw

• Tongijokin nawamp kamu piur pa yom yiukeza kulond ni mutapu ukez kuyilond

3 TONGIJOKINANY PAMWING

CHILEJENAY BIBIL: Anch watijanany, wikalany kal “mujimbu umwing” ni mbay ney wa uruw. (Mateu 19:5) Pakwez, piudianya antu aad ashalijadina ukutwish kwikalany nich yitongijok kushalijan. Chawiy, ufanyidinany kwilej kwikal mu uumwing mu yitongijok yen ni mu yovil. (Filip 2:2) Uumwing udi wa usey pa chisu ukwatinanya mipak. Bibil ulondin anch: “Yiyul yawiy yikata kukasikesh yitongijok ya kusal yom.” (Jinswir 20:18) El amboku, yany ya Bibil yikutakelany piukwatinanya mipak ya usey pamwing.​—Jinswir 8:32, 33.

CHIUKUTWISHA KUSAL:

• Chifanyidinap ching kusu kumwijikish mbay ney wa uruw yovil yey pakwez mwijikisha kand jinsangu ap yitongijok

• Mwipula mbay ney wa uruw kurutu kwa kutambul yisend kanang