CHIKUNKU 5
Mutapu wa Kwikal mu Chisambu Pamwing ni Anamakwey
“Djalany . . . kudimuk, ni kwishikumwish, ni kuwap, ni kushimpish kwa muchim.”—Kolosay 3:12
Uruw usadining dijuku disu. Ap anch yisu yivud ukez kuyikat ni kuyilimish anvaj ey, pakwez, mbay ney wa uruw udi katat muntu wa usey upandakena kudi ey pa divu. Chinech chikutwish kukasikan kudi anamakwey amwing kwitiy mulong winou. Pakwez, yany ya Bibil yikutwish kukukwash chakwel wikala nich chitongijok chisikena chakwel ulama chisambu pamwing ni anamakwey, piusadina usu wey wawonsu mulong wa kukudish urund mu dijuku diey disu.
1 LAM CHITONGIJOK CHIWAMP PIUR PA ANAMAKWEY
CHILEJENAY BIBIL: “Mulimisha tatukwey ni makwey.” (Efes 6:2) Chikalap nchik chimbu cha mivu yiukweta, yisu yawonsu ufanyidin kuyimekeshin ntumb ni kuyilimish anvaj ey. Vurik kand anch mbay ney wa uruw, padiay mwan ikundj ap changadim, uswiridin kuyibangin anvaj end. “Rukat kirukwetap mukau,” chawiy kangal wakam piur pa urund udia pakach pa mbay ney wa uruw ni anvaj end.—1 Korint 13:4; Galatia 5:26.
CHIUKUTWISHA KUSAL:
Ipuk mazu makusesan nich mudi “Yisu yawonsu dijuku diey dipipejining” ap “Makwey kasangarediningap chom chawonsu nisadininga”
Pakish kuman yom mu mutapu uwamp mudi muyimenay mbay ney wa uruw
2 IKAL MUKASH ANCH CHITWISHIKIN
CHILEJENAY BIBIL: “Pa chinech ikundj ukez kudiokal kudi tatukwend ni makwend, ni kulamat kudi mukajend, chad awiy aad akwikal mujimbu umwing.” (Disambishil 2:24) Piwatijadinanya kal, anvaj en akutwish kuman anch akwet kand chisend padi en, ni akutwish kusot kwiyandjik nakash mu uruw wen kupandakanamu yom yifanyidinau kusal.
Chikutadin ey ni mbay ney wa uruw piur pa mipak yiukezanya kuyitekin anvaj en ni kuyilej nich rukat. Ukutwishanya kulond patok nich kalimish kawonsu. (Jinswir 15:1) Kwishikumwish, kuwap ni kushimpish muchim kukez kukukwashany kukudish urund usangareshina pamwing ni anamakwen ni kudandamen ‘kukwashijan umwing ni mukwau mu rukat.’—Efes 4:2.
CHIUKUTWISHA KUSAL:
Anch usotin kwijik uvud wa anamakwen akukukwashanya mu mwom wen, isamba pamwing ni mbay ney wa uruw anch milong kandikal yilanka
Shikenany ku kwitiy pamwing pa mutapu ukezanya kupwish milong yiney