CHIKUNKU 2
Kwikal In Kashinsh Umwing ni Mukwau
“Muntu kafanyidinap kwauril antu abombakeshay kal Nzamb.”—Marko 10:9
Yehova utwitin chakwel “tusangera kushinshaman.” (Mike 6:8, NWT) Chinech chidi cha usey pakampwil mu uruw wey mulong pakad kushinshaman, kwikil ruchingej. Ni ruchingej ridi ra usey mulong wa kukudish rukat.
Nlel unou, kushinshaman mu uruw chidi chikokujol chikash. Chakwel ukinga uruw wey, ufanyidin kukwat mupak wa kusal yom yaad.
1 TEK URUW WEY PA NDOND YA KUSAMBISH
CHILEJENAY BIBILA: “Kujingunin yom yipandakena kuwap.” (Filip 1:10) Uruw chidi chom chimwing chipandakena usey mu mwom wey. Ufanyidin kwikal pa ndond ya kusambish.
Yehova usotin ey ushinshikidina pa mbay ney wa uruw ni ‘kusanger mwom’ pamwing. (Mulej 9:9) Ndiy umekeshin patok anch ey ufanyidinap kumuvuramen mbay ney wa uruw, pakwez en awonsu aad ufanyidinany kukimb mitapu ya kwisangaresh umwing ni mukwau. (1 Korint 10:24) Sal usu chakwel mbay ney wa uruw iyova kwikal uswiridikena ni umusangaredina.
CHIUKUTWISHA KUSAL:
Ikal nich kashinsh anch usutishiningany chisu pamwing ni kubangin nakash mbay ney wa uruw
Tongin padi “etu” pa ndond pa “am”
2 LAM MUCHIM WEY
CHILEJENAY BIBIL: “Muntu mwawonsu ukumutala mband wamwovil ris ra kulal nend, muntu mwinou wasal kal chitil cha kulal nend mu muchim wend.” (Mateu 5:28) Anch muntu kanang udandamedining kutongijokin pa yom ya masandj, mu mutapu winou, ndiy kakwikalap ushinshamena kudi mbay nend wa uruw.
Yehova ulondin anch chifanyidin ey ‘ulama muchim wey.’ (Jinswir 4:23; Jeremiy 17:9) Chakwel usala mwamu, ufanyidin kulam mes mey. (Mateu 5:29, 30) Londul chilakej cha nshakur Job, muntu wachipa machip ni mes mend pakad ap pakemp kushinshikin padi mband mukwau nich ris. (Job 31:1) Kwat mupak wa kulik kutal pornografi. Ni kwat kand mupak wa kwipuk kumekesh chitongijok cha rukat ni muntu kanang kusutamu mbay ney wa uruw.
CHIUKUTWISHA KUSAL:
Yilejamu kamu patok antu akwau anch winungin kal rawonsu kudi mbay ney wa uruw
Shinshikin pa yovil ya mbay ney wa uruw ni pwish kapamp kamwing urund win wawonsu ukutwisha kumutek mbay ney wa uruw mu mwikadil ukumwovisha kuyip