Mutapu wa Kupwish Milong

Piusambishinanya mashakamin ma mwom pamwing ni mbay ney wa uruw, milong kushalijan yikez kushiken. Yikutwish kudiokal ku mitapu kushalijan mu mutapu utonginingay, wovilingay ni umeningay mwom umwing pakach pen. Ap milong yikutwish kudiokil ku misul kanang ya pol pa uruw ni ku yinship yakad kuchingejin.

Chikutwish kwikal choziu cha kwipuk milong ya mwom, pakwez, Bibil utuyudil kupwish milong yetu. (Mateu 5:23, 24) Ukez kutan mutapu uwamp wa kupwish milong yey kusutil ku kusadil yany ya Bibil.

1 ISAMBINANY PA MULONG WEN

CHILEJENAY BIBIL: “Kudi . . . chisu cha kulond.” (Mulej 3:1, 7) Ikal nich kashinsh anch usutishiningany chisu cha kwisambin pa mulong wen. Nich kashinsh kawonsu muleja mbay ney wa uruw mutapu wovila ni chom chiutongina pa mulong winou. Chisu chawonsu ‘lond uyakin’ kudi mbay ney wa uruw. (Efes 4:25) Ap anch kudi yovil yikash, ipuk mwikadil wa kwov ujim. Chakul chitudishina chikutwish kupipej mambamb makutwisha kushikij ku kupwitijan ku matend.​—Jinswir 15:4; 26:20.

Ap anch witiyijinap, lam mazu mawamp, kangal kuvuramen kumekesh rukat ni kalimish kudi mbay ney wa uruw. (Kolosay 4:6) Pakish kupwish mulong winou pakad kulab anch chitwishikin ni kangal wakaturij minsamb.​—Efes 4:26.

CHIUKUTWISHA KUSAL:

• Itekina chisu chiwanyidina mulong wa kwisambin mulong wen

• Anch chidi chisu chey cha kutesh, ipuk mwikadil wa kukaturij. Ukez kwikal niyey nich chisu cha kulond

2 TESH NI IJIK NAWAMP MULONG

CHILEJENAY BIBIL: “Katijanany amwing ni akwau mudi mufanyidinau akadivar kukatijan. Chifanyidin kukasikesh kulimishijan amwing ni akwau.” (Rom 12:10) Mutapu wey wa kutesh udi wa usey. Pakish kwijik nawamp dinans dia chitongijok cha mbay ney wa uruw nich ‘yovil ya rukat . . . nich kwitudish.’ (1 Pita 3:8; Jakobu 1:19) Kangal kumekesh mudi muntu uteshina. Anch chitwishikin, tek kuns yom yiusadina ni pwitin nkeu jey padiay mbay ney wa uruw, ap mwipula anch ukutwishany kwisambin mulong winou chisu chikwau. Anch umumening mbay ney wa uruw mudi nkwash wey pa ndond pa kumuman mudi mukankuny ney, ukezap kwikal “mwin kwov ujim swa.”​—Mulej 7:9.

CHIUKUTWISHA KUSAL:

• Dandamen kutesh nich manangu mawamp, chikalap inchik chom chiuteshina chakad kukusangaresh

• Tesh kurumburik kwa rusangu. Ijik nawamp dizu ni mutapu wend wa kulond

3 LONDUL KACHOM NI KACHOM

CHILEJENAY BIBIL: “Mudimu wawonsu ukat kulet dipit, pakwez kulond mazu kusu kukat kulet uzwendj.” (Jinswir 14:23) Kwitiy mutapu uwamp wa kupwish mulong kuwanyidinap kusu. Ufanyidin kulondul kachom ni kachom piur pa mipak yiukwatinanya en awonsu aad. Chinech chikutwish kwit mudimu ukash ni usu ukash, pakwez chikez kwikal cha ukwash. (Jinswir 10:4) Anch usadilany pamwing ni mbay ney wa uruw, ukez kutambulany “difut diwamp” mulong wa mudimu wen ukash.—Mulej 4:9.

CHIUKUTWISHA KUSAL:

• Kwatany mupak wa kutond jinzau ja kusadil jikutwisha kumukwash muntu ni muntu pakach pen chakwel upwishany mulong wen

• Chisu ni chisu, shinshikinany pa kuya kurutu kwen