Musul wa Musangar mu Dijuku

Mutapu wa Kupwish Milong

Ikundj ulondil anch: “Ayangadim etu adi kwisu?”

Mband wakwil anch: “Aya kal mu mwab ujim wa makashing akalandaku maswin masu.”

Ikundj ulondil anch: [Wov kal fu ku muchin ni wabaz] “Yik usotila kulond anch ‘akalandaku maswin masu’? Oku alandin makwau masu ngond wapwila ou!”

Mband wakwil anch: [Nich kwiyingish, wov kal ushon mulong amufishin nich] “Oku azembulang usey. Ap mwamu, angita kurutu kwa kuya, yam nayinkishang mbil ya kuya.”

Ikundj ulondil anch: [Wajiman nakash ni wabarok] “Wij anch nikisin nakash mutapu usheshinau ayangadim etu nfalang pakad kwingipul! Ov, mutapu ik ukutwisha kusal mwamu pakad kwinlej?”

OV, UTONGIN anch ambay inay a uruw mulong ik ukwetau uswiridina kupwish? Chimeken patok anch chimukasikedin ngatan kutudish ujim wend. Kuwejin pa chinech, chimeken anch ambay inay a uruw kovijadinap pa mulong wa want ipau ukwetau anau. Ni chimeken anch kwikil kand mutapu wa kwambamb.

Kwikil uruw uwanyidina. Mauruw makutwish mikal nich yikokujol ya mutapu umwing ap ukwau. Milong yikalap yikash ap ya usweral, chidi cha usey anch ikundj ni mband ileja mutapu wa kuyipwish. Mulong wak?

Mu kusut kwa chisu, milong yakad kupwish yikutwish yikal yikangesh yikash yikangeshina mambamb. Mwant Salomon mwin manangu walonda anch: “Matend madi makash mudi tumanguj twa chipang cha mayal.” (Jinswir 18:19) Ov, mutapu ik ukutwisha kwazuril chis cha mambamb piukwetanya milong?

Anch mambamb mawiy mash ma mwom wa uruw, rukat ni kalimish yidi rudung ni michim yitok ya urund. (Efes 5:33) Pa chisu cha kusot kupwish milong, rukat rawiy rikuyibachika ambay a uruw akutwish avuramen kurumbuk kwau kwa pakur—ni akwasin pa mulong usu ukwetau. (1 Korint 13:4, 5; 1 Pita 4:8) Ambay a uruw alimishijadina akat kuyilik ambay nau alonda nich want ipau ni kutesh chirumburikina yilondilay mukwau, kudiap ching kusu kutesh yilondilau.

Jinzau Jinying ja Kupwish Nich Milong

Tushinshikinany jinzau jinying jisambidinau kwishin oku, ni talany mutapu yijil ya Bibil yikutwisha kukukwashany kupwish milong mu mutapu wa rukat ni wa kalimish.

1. Itekinany chisu cha kwisambin mulong. “Kudi chirung cha yom yawonsu, . . . kudi chisu chimwing cha kuninet, kudi chisu chikwau cha kulond.” (Mulej 3:1, 7) Mudi mwachilejanangau mu kutandikijan kudia kwiur oku, milong yimwing yikutwish yalangwish yovil yikash. Anch chom chinech chashiken, ilama amwiney chakwel witudishaku—chakwel “kuninet”—kurutu ujim usweja. Ukutwish wachidijany urund wen ku milong yikwau yivud anch wateshany chiyul cha Bibil chilondila anch: “Disambishil dia matend didi mudi kusambish kujikul mem, chawiy lik piwakadia kal kusambish matend.”—Jinswir 17:14.

Pakwez, kuding kand “chisu chikwau cha kulond.” Milong yiding mudi masuku mayimp, makat kuvulijan anch wamadiulany. Chawiy komb kangal wadiwulany mulong, nich kutong anch ukwipwil kwau. Anch wimikany kutadikijan, mulimisha mbay ney ni kimb chisu chindjing pakad kulabijok chiukwisambinanya pa mulong winou. Kushilamu kwinoku kukutwish kwakukwashany en awonsu aad kusadil yilondila chiyul cha Bibil chinech: “Kangal muten wandam ni ujim wey.” (Efes 4:26) Chakin kamu, ufanyidin kamu kulam kushilamu kwey.

PAKISH BIL MWAMU: Itekina chisu rubing ni rubing cha kwisambin milong ya dijuku. Ang waman anch yey ukatininga kutadikijan pa chisu kanang pa dichuku—chilakej, anch washik kamu kudiokal ku mudimu ap anch kandikal udia—ovijanany anch kangal wisambinany milong pa yisu yiney. Pakwez, tondany en awonsu chisu umenanya anch chawiy udianya en awonsu aad nawamp.

2. Lond kamu yovil yey nich uyakin ni kalimish. “Londany yakin kudi muntu ni mukwau.” (Efes 4:25) Anch waten kal ap anch akwatin kal, mukwen muntu wa piswimp nakash udi mbay ney wa uruw. Chawiy lond uyakin ni zwat yovil yey piwisambina ni mbay ney wa uruw. Margareta,a wasadila kal mivu 26 mu uruw, ulondil anch: “Pangatau, nadinga nichingejin anch nfumwam ukwijik kwend munidinga anch mulong walank. Nileja anch kuchingejin kwinoku kikwadingap kwakin. Katat nikat kupakish kulond yitongijok ni yovil yam patok.”

Vurikany anch, rutong ren piwisambidinanya pa mulong kiridiap mulong wa kuwin matend ap mulong wa kumukwat mukankuny, pakwez ridi mulong wa kumulej mbay ney mutapu wovila ap utongina. Kusal mwamu mu mutapu uwamp, kulond yitonginay wawiy mulong, kulond chisu chiwasambisha, ni kurumburil mutapu wiyovila. Chilakej, anch ukisin kwikis kwa mbay ney a uruw, ukutwish walond nich kalimish anch, ‘Ukat kwinziyish nakash piudiokilinga ku mudimu ni piushilinga maswin pansh [chisu ni wisu mulong], nimening mudi usu unisadila mulong wa kwinangish chikumbu udi kwau wa chamwamu [rumburil nawamp mutapu wovilinga].’ Kupwa nich kalimish muleja chiutongidina anch chawiy ufanyidina kusal mulong wa kupwish mulong winou.

PAKISH BIL MWAMU: Chakwel kukukwash wijika nawamp mu manangu mey chiusotila kumulej mbay ney wa uruw, fund mutapu uteshina mulong ni mutapu utongidina kuupwish.

3. Mutesha ni jingunin yovil ya mbay ney wa uruw. Mwin kwilej Yakob wafunda anch in Kristu afanyidin “atesha swa, alonda pakemp pakemp, ova ujim pakemp pakemp.” (Yakob 1:19) Kudi yom yivud yikata kushesh musangar mu uruw kupandakanamu kwimen ching pa chiumena anch mbay ney kateshinap mutapu wovila pa mulong winou. Chawiy kwat mupak kangal mbay ney akumana anch mwamu umutongidina!—Mateu 7:12.

Wolfgang, wasadila kal mivu 35 mu uruw, ulondil anch, “Pitwisambidina milong, nitudisha mu muchim, pakampwil anch najingunin anch mukajam kateshinap mutapu unitongina.” Dianna, wasadila kal mivu 20 mu uruw, witiyijin anch, “Nadinga ni kumwinanin nfumwam chisu ni chisu anch kakatap kamu kwitesh pitwisambidina pa milong.” Mutapu ik ukutwisha kupandakan chikangesh chinech?

Kangal watongin anch wij yitonginay ni yovilay mbay ney. Dizu dia Nzamb dilondil anch: “Kwibaz kukat kulet matend, pakwez manangu madi kudi awiy akata kutambul chiyul.” (Jinswir 13:10) Mulika mbay ney alonda yitonginay pakad kumukaturij. Kupwa, kushinshikin anch watesh kal yilondilay, chirikin yiwatesha kal ni mulejirilay mbay ney, salang mwamu pakad kumupipesh ap chisum. Muleja mbay ney akwonana anch watesh nayimp chom chalondangay. Kangal en awonsu walondany chisu chimwing. Salany ou walond wapwish mukwau niyend walond djat ni piukwovijananya en awonsu aad anch wovany kal yitongijok ni yovil ya umwing ni mukwau pa mulong winou.

Chakin, chitin kwikepish ni kushimpish chakwel umutesha nawamp mbay ney ni chakwel witiyija yitongijok yend. Pakwez anch wikal wa kusambish mu kumumekeshin mbay ney kalimish kinak, mbay ney niyend ukwikal tayad kukulimish.—Mateu 7:2; Rome 12:10.

PAKISH BIL MWAMU: Piuchirikidina yilondilay mbay ney, kangal wachirikinamu kwey chamwamu mazu mend. Mu mutapu umwing wa kukasikeshin, pakish kurumburil yiuteshina yilondilay ni mu yovil ya mbay ney.—1 Pita 3:8.

4. Ovijanany mutapu wa kuupwish. “Antu aad asadila mudimu pamwing amupandakenamu muntu umwing, difut dia mudimu wau didi diwamp. Mulong anch umwing wawa, mukwau ukumulangwish.” (Mulej 4:9, 10) Milong yivud ya mu uruw chitwishikin kuyipwish ching anch ambay awonsu aad ovijadin ni akwashijadin umwing ni mukwau.

Chakin, Yehova wamutonda ikundj ikal mutu wa dijuku. (1 Korint 11:3; Efes 5:23) Pakwez umutu urumburikinap kuyikel ku usu. Ikundj mwin manangu kakwikwatinap amwinend mipak. David, wasadila kal mivu 20 mu uruw, ulondil anch, “Napakisha kukimb nijika mulong utukata kupwitijadin ni mukajam ni tukimba mupak utukutwisha kukwat etu awonsu.” Tanya, wawanyish kal katat mivu sambwad mu uruw, ulondil anch: “Kitwadingap ni kusot kwijik nany uyingina ni nany ufila nich. Pa yisu yimwing yitongijok kusu yawiy yadinga yishalijadina pa mutapu wa kupwish mulong. Nashikena ku kujingunin anch chakwel nitwisha chifanyidin nikala wisikena ni kumutesh mukwetu.”

PAKISH BIL MWAMU: Sal kwikala chaku cha kusadil mu uumwing ni en awonsu aad fundany mitapu kushalijan ya kupwish nich milong mudi muutonginanya. Anch wapwishany kufund yitongijok, shinshikinany dipang dien ni kupwa tekany kashony pa mutapu wa kupwish nich witiyijany kal en awonsu aad. Kupwa, itekinany chisu pakad kulambijok cha kushinshikin anch wasadidilany kukwatijan nich mupak wakwatanya ni kudi yibudikin ik.

Pwitany Pamwing, Kangal Waurokany

Yesu waufanikesha uruw nich mpand. (Mateu 19:6) Pa chirung chend, mpand yadinga chikunku cha mutond chadingau kuyikasin annam aad pamwing chakwel asala mudimu pamwing. Anch annam kovijadinap, akusal yom yikemp ni mpand yikuyitap pa jinshing jau. Anch asal mu kwovijan, akutwish apwit yom yilimina nakash ap akutwish adim chir.

Chawiy chimwing, ngatan ni mukajend akangena kusadil pamwing mudi chisak akutwish itap yitat mwi mpand ya uruw. Ku mutambu ukwau, anch ilej mutapu wa kupwit pamwing, akutwish apwish mulong ap wisu ni akutwish asal yom yivud. Kalala, ngatan umwing mwin musangar ulondil piur pa mulong winou mu wiswimp anch, “Mu mivu 25, mukajam ni am amwinam tupwishining milong yetu kusutil ku kwisamb nich uyakin, kusutil kwitek ayinetu pa ndond ya muntu, kusutil ku kumwit Yehova atukwasha, ni ku kusadil yijil ya Bibil.” Ov, ukutwish niyey kusal mwamu?

IYIPULA . . .

▪ Mulong ik nisotila nakash nakash tuwisambina ni mbay nam?

▪ Mutapu ik nikutwisha kwikal nich kashinsh anch natesh kal yovil yakin ya mbay nam pa mulong winou?

▪ Anch nikat kushindilang ching yom yisadika mutapu unikatina am, mulong ik unikata kusarumun?

[Mazu madia kwishin kwa paj]