Yilejan Anen
Timote—Wadinga Tayad ni Usotila Kusadil
‘OV, WITENCHIKINANY?’ Ov, akwipulanyap kal chipul chinech?—Mwaning, muntu wakwipula mwamu wasota ijika anch witenchikinany kal. Chilakej, muntu ukutwish usotil kwend kulond anch: ‘Ov, ukwet mabuku mey ma kwilej? Ov, watanga kal malejan mey?’ Mudi mutukumana, Timote wadinga witenchika kal.
Timote wadinga kand usotil. Wij chirumburikina dizu dined?— Pamutazukau Timote akamusadila Nzamb, ndiy wadinga ni ngikadil mudi ya umwing wa atushalapol akwau a Nzamb; walonda anch: “Yam unou, ntuma.” (Isay 6:8) Mulong ndiy wadinga witenchika kal ni usotil kusal, Timote wadinga nich mwom usangareshina. Ov, usotil utesha mwadingay?—
Timote wavadikina kulemp, ku makilometre ni Yerusalem, ku Listre. Ngakend mband Lois ni makwend, Yunise, adinga in kwilej akash a Mifund. Ap padingay Timote uchidi mwanikanch, asambisha kumulej Dizu dia Nzamb.—2 Timote 1:5; 3:15.
Padingay Timote uchidi ni dikum dia mivu, kambuy Paul, pamwing nenday Barnabas, aya ku Listre weny wau wa kusambish wa kulejan. Chimeken anch pa chisu chinicha makwend a Timote ni ngakend ikala in Kristu. Ov, usotil utesha yikokujol yarau nich Paul ni Barnabas?— Mwaning, antu adinga ayikisin in Kristu amwasa Paul mayal, amwasa pansh, ni amupwitina pol pa musumb. Awiy atonga anch wafa kal.
Antu itiyija yom yadinga yilejenay Paul amwombilamu bwalikan, ni watumbuka. Dichuku dialondulap, Paul ni Barnabas atumbuka aya kwau, pakwez kwinyim kwa ka chisu kakemp achirika ku Listre. Pachirikau, Paul wasala diskur ni wayileja in kwilej anch: “Tuwapidil kwandam mu want wa Nzamb ni yakamish yivud.” (Midimu 14:8-22) Ov, chom ik chasotay Paul kulond?— Wasota kulond anch antu akwau akutwish ayimesh mar antu amusadidila Nzamb. Kupwa Paul weza kumufundin Timote anch: ‘Awonsu asotila kwikal antu a Nzamb akez kikonk.’—2 Timote 3:12; Yohan 15:20.
Kupwa Paul ni Barnabas adiokala ku Listre, achirika kwolikwau. Kwinyim kwa angond kanang, Paul wamusenda Silas waya nend mu weny, ni awonsu aad achirika aya kuyikasikesh in kwilej asu ku jindond kwalejanay Paul. Pashikau ni ku Listre, Timote wasangara nakash pa kumuman kand Paul kakwau! Timote wasangara kand nakash pamutazukau chakwel aya pamwing ni Paul ni Silas. Timote witiyija kuya nau. Wadinga witenchika kal ni usotil kuya.—Midimu 15:40–16:5.
Aya awonsu asatu, enda makilometre mavud, ni kupwa andama mu waat. Pashikau ku chikum, aya ku Tesalonik djat ku Gres. Antu avud a kwinikwa ikala in Kristu. Pakwez akwau ajimana ni aleta ruvundu. Mwom wa Paul, wa Silas ni wa Timote wadinga mu chak, chawiy chatumbukau aya ku Bere.—Midimu 17:1-10.
Paul wadinga uyakamidin in kwilej asu a mu Tesalonik, chawiy chamuchirishay Timote kwinikwa. Ov, mulong wak?— Paul weza kurutu kuyirumburil in Kristu a ku Tesalonik anch: ‘Mulong wa kukukasikeshany ni kukwongojany.’ Ov, wijany mulong wak Paul wamutuma Timote mu teritwar wa ubaj mudi winou?— Mwaning, in rupompat kadingap amwija nawamp Timote, niyend wasota kuya. Chom chinech chamwita kukapuk nakash! Yom yasuta nchik? Pachirikay Timote kudiay Paul, ndiy wamuleja Paul mutapu wadinga ujijamenau in Tesalonik mu ritiy. Chawiy Paul wayifundina ach: “Etu twiyongojil kudi en.”—1 Tesalonik 3:2-7.
Timote wasala pamwing ni Paul mivu dikum yalondulaku. Kupwa Paul amukasa mu Rome, ni Timote, wadia walikishauku kal mu rukan, waya akikala nend. Padingay mu rukan, Paul wayifundila mukand in Filipoi, pamwingap wamusadila Timote mudi kalerik wend. Paul walonda anch: ‘Nichingejin kukutuminany Timote, mulong kinikwetap muntu mukwau ukweta muchim mudi ndiy wa kukutalany anch ushichany nawamp.’—Filipoi 2:19-22; Hebereu 13:23.
Mazu minam mamusangaresha Timote mudi ik! Paul wamukata nakash Timote mulong wadinga witenchika kal ni usotil kusal. Tuchingejin anch niyey mwamu muukwikala.
Yipul:
○ Kwisu kwapaminay Timote, ni chom ik chasadikaku payay Paul kwinikwa?
○ Chom ik chasalay Timote pamutazukau asambish kwend pamwing ni Paul ni Silas?
○ Mutapu ik wamekeshay Timote kukapuk, ni mulong wak Paul wamukata nakash?
[Chipich chidia pa paj wa 18]
Chom ik chasadikaku?