“Changadim Mwin Isarel” wa mu Chirung Chinech
MBING jaad kurutu kwa Chivurikish cha rufu ra Yesu, muntu win mwawonsu wa mu dijuku dia Sales wa mu Praia Grande, mu Brésil, wafunda list wa majin ma antu akutazukay. Abigayl wadinga ni mivu musamban niyend amwinkisha dipaper dimwing dia diladikij ni amwipul anch ukumwinkishad nany.
Ndiy wakula anch: “Nikumwinkish muntu ukata kwinsangerang chisu chawonsu.”
Anvaj end amwipul anch: “Muntu ik winou?”
Ndiy wayakul anch: “Muntu ushichinga mwi nking ya ayibid awa.”
Kupwa kwa machuku manying, Abigayl wayileja anvaj end muntu winou. Muntu winou, Walter, wadinga ushiching mu mukal wa Chot cha Want. Padingay ni mivu 28, wasala aksident ni motak ni washala ni kalip ku mend, pasutil kal mivu 15. Antu aad adinga ni kumulam mulong wadinga mpich. Patambulay Abigayl mbil ya kwisamb nenday Walter, anvaj end amuleja Walter anch changadim wetu ukwet diladikij disotinay kukwinkish.
Kwinsudiel kwa minsamb yend, Abigayl walonda anch: “Antu avud a mu Chot chetu cha Want akwet maladikij mavud, pakwez am nikwet ching dined dimwing kusu. Ching yey kusu unatazuka kal. Anch walik kwez, nikwikalap ni muntu natazukang. Pakwez anch wez, nikusangar nakash, ni Yehova ukusangar nakash niyend.”
Pa dichuku dia Chivurikish, Atuman, pamwing ni Abigayl, adinga ni kukomb ni kurijek Chot cha Want mulong wa program wa urel wa Chivurikish. Pa dichuku dinidia, Walter wasutina kwadinga Chot cha Want, chad pamumanay Abigayl, wamuleja mwin kwendish motak imana. Wazurila dididish, chad wamwipula Abigayl anch yom ik yisadinay. Wamuleja anch akat kurijek chot chikala chiwamp mulong weyey.
Urel winiwa Abigayl wadinga unenganen. Diskur diasambisha, chad wasambisha kutalijol oku ni oku amana anch Walter wezang kal. Wakashimuk, awonsu, Walter pamwing ni antu amulamininga ashik. Musangar wend wapandikana nakash. Kupwa kwa diskur, Walter wamuleja anch wading urijekin weny wa kuya mu musumb ukwau pakwez waswimpa manangu mend ni weza ku Chivurikish, mulong wendendiy. Kupwa, wawejinaku anch: “Diskur dined diadi kamu yom yinadia niswiridina kutesh.” Wita Bibil ni wasambisha kwilej ni kukumangan kudiosh kamu pinipa.
Mu kusut kwa chisu, mpanyend a Walter walonda anch ukimbin kumanijan nend Abigayl, wadingay ni kujimbul mwanamakwend chisu ni chisu. Pamumanay, wasangara nakash pa kwijik anch Abigayl udi changadim muwamp. Ndiy walonda anch: “Katat nijik kal chad mulong wak mwanamakwam usanger nakash mwamu.”
Walter udandamedin kwilej ni kukumangan ku yikumangan. Ukat kwakulang ni kuyilej antu akwau yom yilejiningay. Chakin kamu, Abigayl changadim mukemp utuvurishin rusangu ra changadim mwin Isarel wamukwasha Naman ashikena ku kumwijik Nzamb wakin, Yehova.—2 Ant 5:2-14, NW.