Salany Chakwel Kukul Kwen Kumekana Patok

“Ipanamu chakwel kukul kwey kumekan ku mes kwa antu awonsu.” —1 TIM. 4:15, MM.

1, 2. Yom ik twija piur pa mwom wa kusambish wa Timote ni kukarumuk kwashikenaku pawanyishay mivu 20?

MWAB wa Galatia wa mu Rome, mudia katat Turquie, wawiy wadinga kwolikwau kwa Timote. Imikaku kand yikumangen yivud ya Ukristu kupwa kwa makum ma mivu kwinyim kwa rufu ra Yesu. Pa chisu chimwing, nsand Timote, makwend ni ngakend mband itiyija Ukristu ni asala nich mushiku mu chimwing cha yikumangen yadinga kwinikwa. (2 Tim. 1:5; 3:14, 15) Chakin kamu Timote wasangera mwom wend mudi nsand mwin Kristu mukach mwa antu inay adinga amwija. Pakwez, yom yakarumuka mu mutapu umwing wakad kuchingejin.

² Yom yiney yawonsu yasambisha pa chisu chezay kambuy Paul kapamp ka kaad mu mwab winou. Pa chisu chinicha, chimeken anch Timote wadinga piswimp ap wadinga wawanyisha kal mivu 20. Payay Paul mu Listra, wamana anch chakin kamu Timote wadinga “ni katumb kawamp kudi akadivar” adinga mu yikumangen yadingaku. (Mid. 16:2) Chimeken anch nsand Timote wamekesha anch waswil kal kupandakanamu pa mivu yend. Kupwa, kusutil ku umutakel wa mwiku utumbila, Paul pamwing ni amakurump adingaku amwanzuka Timote makas mau, amwaurila amutek mulong wa mudimu wa pakampwil mu chikumangen.—1 Tim. 4:14; 2 Tim. 1:6.

3. Chisend ik cha pakampwil cha mudimu chatambula Timote?

³ Timote watambula diladikij dimwing diamushena chakwel ikala mbay mwin kwendangan ni Paul! (Mid. 16:3) Tongijokin mutapu wakashimukay ni musangar wovay Timote! Mu mivu yadinga kurutu, Timote wadinga ufanyidin kwendang pamwing ni Paul ni pa yisu yimwing ni antu akwau, kuwanyish midimu kushalijan mulong wa atwimbuy ni mulong wa amakurump. Paul ni Timote asala pamwing mudimu wa kwendangan mulong wa kuyikasikesh nakash akadivar muspiritu. (Tang Midimu 16:4, 5.) Chawiy chezay Timote kwijikan kudiau in Kristu avud mulong wa kukul kwend muspiritu. Kupwa kwa mivu dikum ya kusal ni Timote, kambuy Paul wafundina in Filipoi anch: “Kinikwetip muntu mukwau ukweta muchim mudi [Timote] wa kukutalany anch ushichany nawamp. . . . En wijany kal kashinsh kend, mudi mwan ukat kumusadil tatuku, chawiy ndiy ukat kusal mudimu ni ayamam mu kupalangesh kwa rusangu ruwamp.”—Filip. 2:20-22.

4. (a) Chisend ik chijim chamwinkishau Timote? (b) Yipul ik yifanyidina kwiyipul piur pa mazu ma Paul madia mu 1 Timote 4:15?

⁴ Pa chisu chayifundiay Paul in Filipoi, wamwinkisha Timote chisend chimwing chilimina—cha kuyitond amakurump ni ankwash a mudimu. (1 Tim. 3:1; 5:22) Chakin kamu, Timote wadinga wikadil kal muntu panrend ni mukurump mwin Kristu wa kuchingejin. Pakwez, mu mukand wawiy umwing kand, Paul wamukasikesha Timote asala “chakwel kukul [kwend] kumekan ku mes kwa antu awonsu.” (1 Tim. 4:15) Ov, pa chisu chinech, Timote wadinga kandikal asala mu chilik chakwel anch kukul kwend kumekana mu chilik kanang? Chad, chom chadinga chisotilay Paul kulond ku mazu minam, ni mutapu ik tukutwisha kutanin ku chiyul chend?

Kumekesh Patok Ngikadil ya Muspiritu

5, 6. Kwishitul muspiritu kwa chikumangen cha in Efes kwadinga mu chak mutapu ik, ni mutapu ik welay Timote kuchipwish?

⁵ El tushinshikinany yom yisambidinau mu mifund ya kurutu ni ya kwinyim kwa 1 Timote 4:15. (Tang 1 Timote 4:11-16, MM.) Kurutu afunda mazu minam, Paul waya ku Makedonia pakwez wamuleja Timote ashala mu Efes. Mulong wak? Mulong antu amwing adinga mu musumb winou adinga musul wa kwiyauril mu chikumangen kusutil ku kwandjikamu kwau malejan ma makasu. Timote wadinga ufanyidin alama kwishitul muspiritu kwa chikumangen. Mutapu ik welay kusal mwamu? Wela kutwish kusal mwamu kusutil ku kwikal chilakej chiwamp chikwimburijau kudi antu akwau.

⁶ Chawiy Paul wamufundina Timote anch: “Ikal chilik chiwamp kudi in kwitiyij ku kulond kwey, ni ku yisalijok yey, ni ku rukat rey, ni ku ritiy rey, ni ku kwilam kwey zwang.” Paul wawejinaku kand anch: “Sal yom yiney nich muchim wey wawonsu, ipanamu nakash chakwel kukul kwey kumekan ku mes kwa antu awonsu.” (1 Tim. 4:12, 15) Kukul kwinoku kwadinga kukwatin ku ngikadil ya muspiritu ya Timote, kwadingap kukwatin ku chom ap chimwing chitadila ulabu. Kwawiy kukul kwinoku kufanyidinay mwin Kristu mwawonsu kumekesh.

7. Yom yiyichingejidinau antu awonsu adia mu chikumangen?

⁷ Nlel mudi muchadinga mu machuku ma Timote, kudi mitapu kushalijan ya yisend mu chikumangen. Antu amwing asadil mudi amakurump ni akwau mudi ankwash a mudimu. Antu akwau asadil mudimu wa uchibol. Pakwez akwau niyau asangaredin mudimu wa kwendangan, mudimu wa ku Bethel ap mudimu wa umishoner. Amakurump asadiling maprogram kushalijan ma kulejan, mudi ku yitentam ya pakampwil ya dichuku dimwing, ya munyingumuku ni ya distrik. Pakwez, in Kristu awonsu—amakundj, amband ni ansand—akwet mutapu wa kumekesh patok kukul kwau muspiritu. (Mat. 5:16) Chakin kamu, mudi muchadinga ku mutambu wa Timote, ap in Kristu akweta yisend ya pakampwil niyau ayichingejidin anch amekesha ku mes kwa antu awonsu ngikadil yau ya muspiritu.

Ikal Chilik mu Kulond

8. Kulond kwetu kukweting usu ik pa difukwil dietu?

⁸ Mu chom chimwing chadinga chifanyidinay Timote kwikal chilik chadinga mutapu wend wa kulond. Mutapu ik tukutwisha kumekesh kukul kwetu patok pa mulong winou? Kulond kwetu kulejening yom yivud padi etu ayinetu. Yesu walonda nawamp anch: “Kan ka muntu kakat kubudish yom yizwila mu muchim.” (Mat. 12:34) Yakob mwanchend a Yesu niyend witiyija usu ukwetinga kulond kwa muntu pa difukwil diend. Ndiy wafunda anch: “Anch mwamu muntu utongil anch: ‘Nidi mwin kumwitiyij Nzamb,’ pakwez kalaminap rudim rend, ritiy rend ridi ramwamu, ukat kwidimb amwinend.”—Yak. 1:26, MM.

9. Kulond kwetu kufanyidin kwikal chilik mu jinjil ik?

⁹ Kulond kwetu kukutwish kwayimekesh antu akwau adia mu chikumangen chilik chetu cha kukul muspiritu. Chawiy lel, pa ndond pa kusadilang mazu makad kuwanyin, mayimp, ma runyinyit ni masansena, in Kristu aswila asadil usu wa kutungijan, kwongojijan ni kukasikeshijan. (Jinsw. 12:18; Efes 4:29; 1 Tim. 6:3-5, 20) Kuswapal kwetu kuyilej antu akwau yitiyij yetu piur pa ngikadil ni kulond patok mulong wa kuchidij yijidik ya piur ya Nzamb kukutwish kwamekesh kwipan kwetu kudi Nzamb. (Rome 1:15, 16) Antu akweta michim yitentamina akez chakin kamu kuman mutapu tusadidila chipan cha dizu ni akutwish alondul chilik chetu.—Filip. 4:8, 9.

Twikalany Yilik Yiwamp mu Yisalijok Yetu ni ku Kwilam Zwang

10. Mulong wak ritiy rakad rubabek ridi ra usey ku kukul kwetu muspiritu?

¹⁰ Kuwejin pa kulond kuwamp kudi yom yikwau yimwitinau mwin Kristu chakwel ikala chilik chiwamp. Kulond yom yishitwila pakad kulond yom yifanyidina kukutwish kwamwikadish muntu mwin rubabek. Paul wadinga wij nawamp rubabek ra Afarise ni yibudikin yar. Wamubabesha Timote tupamp tuvud pantaliken nich kwimekesh kwau kwa ku mes kwa mutapu winou. (1 Tim. 1:5; 4:1, 2) Pakwez Timote kadingap muka rubabek. Mu mukand wend wa kaad wamufundilay Timote, Paul wafundamu anch: “Nikat kuvurik ritiy ra kashinsh ridia mu ey.” (2 Tim. 1:5) Ap mwamu, Timote wadinga uswiridin kumekesh patok ukashinsh wend mudi mwin Kristu kudi antu akwau. Chawiy wadinga ufanyidin kwikal chilik mu yisalijok.

11. Paul wamufundina Timote chom ik piur pa mapit?

¹¹ Mu mikand yend yawonsu yaad yamufundilay Timote, Paul wamukasikesha mu mitapu kushalijan ya mashakamin. Chilakej, Timote wadinga ufanyidin kwipuk kulondul nakash mapit. Paul wamufundina anch: “Rukat ra nfalang wawiy muj wa mitapu yawonsu yiyimp; antu avud asota kwikal ampich akat kurumbuk mwi njil ya ritiy, abuzikin kal michim yau nich maushon mavud.” (1 Tim. 6:10) Rukat ra mapit ridi chijingidij cha kukep kwa mwikadil wa muspiritu. Pakwez, in Kristu akata kutan musangar mu kupipesh mwom wau, akwet “yakudia ni yakudjal,” amekeshin patok kukul kwau muspiritu.—1 Tim. 6:6-8; Filip. 4:11-13.

12. Mutapu ik tukutwisha kumekesh patok kukul kwetu mu mwom wetu?

¹² Paul wamuleja Timote mutapu chadinga cha usey kudiau amband in Kristu chakwel “adjala maswin makad kuzut ku mes, kwakad kwimekesh ni kwibaz nich.” (1 Tim. 2:9) Amband ikepishina ni ishitwila mu manangu pa kutond kwau maswin ma kudjal, ku kwikas nswich ni ku kwileng kwau, ni mu yom yikwau mu mwom wau, adi yilik yiwamp. (1 Tim. 3:11) Chijidik chinech chisadil ni padiau amakundj in Kristu. Paul wayiyula amakurump chakwel “ikala ni yaku yiwamp ni kashinsh.” (1 Tim. 3:2) Pitukata kumekesh ngikadil yiney mu midimu yetu ya pichuku ni pichuku, kukul kwetu kukumekan patok ku mes ma antu awonsu.

13. Mudi Timote, mutapu ik tukutwisha kwikal ilik yiwamp mu kwilam zwang?

¹³ Timote wadinga ufanyidin kand kwikal chilik mu kwilam zwang. Pasadilay dizu dined, Paul wadinga wisambidin pa chom kanang chijikena mu mashakamin, pa mulong wa kumanijan kwa amakundj ni amband. Timote wadinga ufanyidin kwikal wakad kufa nich pakampwil mu mutapu wend wa kusal pamwing ni amband. Wadinga ufanyidin kuyiman “amband amakurump mudi amaku, ayangadim mudi anambaz, yawonsu mu muchim udia zwang.” (1 Tim. 4:12; 5:2) Ap yisal ya masandj yikutwisha yamekan mudi yijingamena nakash yijiken kwau kudiay Nzamb ni chakin kamu ching yez yijikanik kudi akwetu antu. Pakwez chidi kand chakin kwijik anch chikasiken kujindjik midimu yiwamp ya mwin Kristu. (1 Tim. 5:24, 25) Awonsu adia mu chikumangen akwet mutapu wa kusal anch kukul kwau kumekana patok mu yisalijok ni mu kwilam kwau zwang.

Rukat ni Ritiy Yidi ya Usey

14. Mifund yikasikeshidin mutapu ik maswir ma kukatijan ayinetu?

¹⁴ Rukat ridi chom chimwing chijim nakash cha in Kristu akin. Yesu wayileja in kwilejend anch: “Ku chinech kwawiy kukwijikinau antu awonsu anch en udiany in kwilej amam anch wakatijanany.” (Yoh. 13:35) Mutapu ik tumekeshininga rukat riner? Dizu dia Nzamb ditukasikeshin tulikishijadina “muntu ni mukwau mu rukat,” twikala “adimukina, in kwanakenijan muntu ni mukwau, in kulikishijadin muntu ni mukwau,” ni kwikal in kwakijan. (Efes 4:2, 32, MM; Heb. 13:1, 2) Kambuy Paul wafunda anch: “Katijanany amwing ni akwau mudi mufanyidinau akadivar kukatijan.”—Rome 12:10.

15. Mulong wak rukat ridi ra usey kudi antu awonsu, pakampwil amakurump in Kristu?

¹⁵ Anch Timote wadinga mukash ni mwin kulond kuyimp pantaliken nau ambay nend in Kristu, ing yom yiney yashesha yom yiwamp yelay kusal mudi mulej ni mukurump. (Tang 1 Corint 13:1-3.) Ku mutambu ukwau, yisal ya rukat ya Timote pantaliken nau akadivar nend, yasalay kusutil ku kuyak ni ku midimu yiwamp piur pau, chakin kamu yakasikeshina kukul kwend muspiritu. Chadinga chifanyidina, anch mu mukand wend wamufundilay Timote, kambuy Paul wajimbula pakampwil rukat mudi chimwing cha ngikadil mwadinga mufanyidinay Timote kwikal chilik.

16. Mulong wak Timote wadinga ufanyidin kwikal nich ritiy rikash?

¹⁶ Padingay ku Efes, ritiy ra Timote rikala mu choziu. Antu amwing adinga ni kupalangesh malejan madinga mapwitijadina nich uyakin wa Ukristu. Akwau niyau adinga ni kupalangesh “yishimu yamwamu” ap anch yitongijok yadingau ni kukimbijol yakad kuwejin chom ap chimwing ku mwikadil wa muspiritu wa chikumangen. (Tang 1 Timote 1:3, 4, MM.) Paul wayisambina antu inay mudi ‘in kwitutul, kijap kwau chom, in matend nakash ni ntad.’ (1 Tim. 6:3, 4) Ov, Timote wela kwikal mu chak cha kushinshik ap pakemp yitongijok yadinga yandamina ku ujindj mu chikumangen? Bwat, mulong Paul wamukasikesha Timote chakwel arisha “kurish kuwamp kwa ritiy” ni iyepa “ku yilondilond ni mazu ma ntad ja antu idimbil[a] anch ronganyin rakin.” (1 Tim. 6:12, 20, 21) Kwandingap kwidjidjek pa mulong wa Timote wa kulondul kwend chiyul cha manangu chamwinkishau kudiay Paul.—1 Kor. 10:12.

17. Mutapu ik ukutwisha nlel unou ritiy retu kwikal mu choziu?

¹⁷ Cha musangar, amuleja Timote anch: “Mu machuku ma kurutu amwing akez kawa kudiokal ku ritiy, akez kutesh ku jinsangu jamwamu ja washankuru, akez kwitiy dilejan dia Satan.” (1 Tim. 4:1) Antu awonsu adia mu chikumangen, pamwing ni in akweta yisend, aswiridin kwikal mudi Timote mu kwikal nich ritiy rikash, rakad kunyikek. Kusutil ku kukwash mupak ukash pantaliken nich kupumbuk, tukutwish twamekesh patok kukul kwetu ni kwikal kwetu chilik mu ritiy.

Salany Usu Chakwel Kukul Kwen Kumekana

18, 19. (a) Mutapu ik ukutwisha kusal chakwel kukul kwey kumekana ku mes kwa antu awonsu? (b) Chom ik tukwileja mu mutu ulondwilaku ou?

¹⁸ Choviken, kukul muspiritu kwa mwin Kristu kuyilap pamwing kumekan kwa ku mes, ngikadil ya chivadik ap kwikal nich ntumb. Ni kukatap kumeken ku uvud wa mivu ya mudimu mu chikumangen. Pakwez, kukul kwakin muspiritu kukat kumeken patok kusutil ku kumuziyil kwetu Yehova mu yitongijok, mu kulond ni mu yisalijok. (Rome 16:19) Tufanyidin tutesha mbil ya kukatijan muntu umwing ni mukwau ni kwikal nich ritiy rikash. Inge, el tusokany mu mazu mamulejau Timote kudiay Paul ni twipanamu nakash chakwel kukul kwetu kumekena ku mes kwa antu awonsu.

¹⁹ Ngikadil yikwau yikata kumeken ku kukul kwetu muspiritu ni ku kuswa kwa Ukristu yidi musangar, chikunku cha dibuj dia mwiku utumbila wa Nzamb. (Gal. 5:22, 23) Mutu wa mulong ulondwilaku ou ukwisambin piur pa mutapu tukutwisha kukudish ni kulam musangar mu yisu ya kanvundangesh.

Ukwakul Nchik?

• Chom ik chikutwishau antu akwau kwilejin kudi etu kusutil ku kulond kwetu?

• Kukul kwetu kumekenin nchik mu yisalijok ni mu kwilam zwang kwetu?

• Mulong wak ufanyidinau in Kristu kwikal chilik mu rukat ni mu ritiy?

[Chipich chidia pa paj wa 11]

Nsand Timote wamekesha kukul kupadakenamu mivu yend

[Chipich chidia pa paj wa 13]

Kukul kwey kumeken ku mes kwa antu akwau?