Mariy—wimish Kal Pakwez Kachikinap

Mariy wawanyish kal angond anying ni madikaj. Vurik anch wasutisha angond amwing a madikaj mend payay kumutal mwanamakwend Elizabet kwindum kwa ngand ya mikandu ya Yudeya. Kupwa, Mariy wachirika kwol kwau ku Nazaret. Pa chisu chinicha, madikaj mend asambisha kumajingunin kudi antu akwau. Tongin mutapu wiyakamishay mulong wa madikaj minam!

Mulong winou wading ukash nakash kudi Mariy, mulong ading amutondin kal kudi Josef musong a mabay. Ndiy wading wij anch kukwatijan ni Chijil cha Nzamb chayinkishau in Isarel, mband watondau kal mulong wa kumwat anch wasal masandj afanyina kumwas mayal chakwel afa. (Kuvurik Yijil 22:23, 24) Ap anch Mariy kasalap masandj, pakwez ndiy wading kutong mutapu ukumurumburilay Josef mulong winou wa madikaj ni yom yafanyina kumushiken.

Mariy washakama ndond yindjing mu angond asatu, chawiy tukutwish kwikal nich kashinsh anch Josef wading ni kuswir kwa kumuman. Pamanijanau, chimeken anch Mariy wamuleja Josef anch ukwet madikaj, ni wamurumburila anch madikaj minam madiokil ku ukash wa spiritu utumbila wa Nzamb. Mudi ukutwisha kutong, mulong winou wading umukasikedin Josef kuutesh ni kuwitiyij.

Josef wading wij anch Mariy wading mband wilimishina ni wading ni mwikadil uwamp. Wading umukatin nakash. Pamulejau mulong winou, chimeken anch Josef watonga pamwing ap anch Mariy amwinkisha madikaj kudi ikundj kanang. Josef kakatap anch amwasa Mariy mayal chakwel afa ap amukwatisha usany kudi antu, chawiy ndiy wakwata mupak wa kwaurik nend ku ujindj. Mu chirung chinicha, antu ading atondijadina kal ading mudi atijadin kal ni anch akwat mupak wa kulikijan afanyina kufund mikand ya kulikijan.

Kupwa, Josef wamana anch mulong winou wading ujim nakash, chawiy waya kulal. Mwangel wa Yehova wamumekena mu chilat ni wamuleja anch: “Kangal wov wom wa kumwat mukajey Mariy, mulong ndiy wimisha ku ukash wa [spiritu] utumbila. Ndiy ukez kuval mwan ikundj, chad ey ukez kumupil anch Yesu, mulong ndiy ukez kuyipandish antwend ku yitil yau.”—Mateu 1:20, 21.

Palankay Josef, musangar mud ik wovay pateshay kurumburik kwa mulong winou! Witiya kusal yom yamulejau kudi mwangel. Chawiy, wamusenda Mariy waya nend kwol kwend. Kumusend Mariy chakwel aya nend kwol kwend chawiy chamekesha patok anch Josef ni Mariy atijan kal. Padingay Mariy ni madikaj ma kumuval Yesu, Josef kamanijanap ap pakemp ni Mariy mu uruw.

Kupwa kwa angond, Josef ni mukajend Mariy wading piswimp ni kuval afanyina kudiokal ku Nazaret mulong wa kusal weny ulemp. Kwisu kwafanyinau kuya chisu chinicha padingay Mariy piswimp ni kuval?