Yipul ya in kutang
Kupwa kwa Yesu kuvadik, mulong wak Josef ni Mariy adandamena kushakam ku Betlehem pandond pa kuchirik ku Nazaret?
Bibil kalondinap chom. Pakwez ulejen yom yimwing ya usey yikutwisha kutukwash kutesh mulong wak alika kuchirik ku Nazaret pa chisu chinicha.
Mwangel wamuleja Mariy anch wafanyina kwimish ni kuval mwan. Chisu chamulejau uruu winou kud mwangel, Mariy ni Josef ading ashich ku Nazaret, musumb wa chivadik wa Josef, mu Galaliya. (Luka 1:26-31; 2:4) Kupwa, padiokalau mwi Idjibit, achirika ku Nazaret. Yesu wapamina kwinakwa ni wikala mwin Nazaret. (Mat. 2:19-23) Chawiy anch twajimbul dijin dia Yesu, Josef, ni Mariy, tukat kuvurik kapamp kamwing musumb wa Nazaret.
Mariy wading uvariken ni Elizabet, mband wading ushicha mu Yudeya. Ading amwatin kud Zakariy ni ndiy wamuvala Yohan Mubatish. (Luka 1:5, 9, 13, 36) Mariy waya kumutal Elizabet ni washakama nend mu angond asatu mu Yudeya. Kupwa Mariy wachirika ku Nazaret. (Luka 1:39, 40, 56) Chawiy chasala anch Mariy ijidin ndong yiney.
Pa chisu chinicha, Josef waziyina kwi mbil ya “kwifundish.” Chawiy Josef wasal weny wa kudiokal ku Nazaret mulong wa kuya ku Betlehem, wadinga “ul wa chivadik wa Mwant David” mwasambelau aprofet kulond anch kwawiy ku kuvadikinay Mesia. (Luka 2:3, 4; 1 Sam. 17:15; 20:6; Mik. 5:2) Kupwa kwa kumuvadin Yesu kwinakwa kud mariy, Josef kakatap anch mariy asala weny ulemp mulong wa kuchirik ku Nazaret ni mwan mwinkond. Ashakamina mu Betlehem musumb wadinga mu akilometre piswimp 9 ni musumb wa Yerusalem. Chawiy chafanyina kuyiswapel kumutwal mwanau ku tempel ni kupan ya kupesh yiwanyidina.—Levi. 12:2, 6-8; Luka 2:22-24.
Mwangel wa Nzamb wasambela kumulej Mariy anch mwanend ukez katambul “ditand dia David.” ni wafanyina “kwikal Mwant.” Ov, Josef ni Mariy afanyina kuman anch chid cha usey kwijik anch Yesu wavadikina mu musumb wa David? (Luka 1:32, 33; 2:11, 17) Afanyina kutong anch chid cha usey kudandamena kushakam kwinikwa ni kuchingel uman umekeshina rusot ra Nzamb.
Twijap kamu kulep kwa chisu chasutishau mu Betlehem kupwa kwa in manangu kushik. Pa chisu chinicha, dijuku diading dishich mu chikumbu. (Mat. 2:11) Chimeken anch pandond pa kuchirik ku Nazaret, ashakama ku Betlehem mu chisu kanang.
Herod wapana mbil ya “kuyijip an amakundj awonsu a mu Betlehem . . . avadika pa chisu chinicha, kushik ni ku an akweta mivu yaad.” (Mat. 2:16) Patambulau umutakel wa Nzamb piur pa mbil yiney, Josef ni Mariy achinina mu Idjibit pamwing ni mwanau Yesu, djat ni pafilay Herod. Kupwa, Josef wachirika ni dijuku diend ku Nazaret. Mulong wak kachirikap ku Betlehem? Mulong pa chisu chinicha, Arkelaus mwan ikundj wa Herod wading uyikedil mu Yudea, ni wading ukwet chisum nakash. Chikwau kand, mwangel wamuleja kapamp kakwau anch chading cha ubaj kuchirik kwinikwa. Ku Nazaret Josef wafanyina kumulil Yesu mu diking ni kumukwash kwez kwikal kashalapol wakin wa Nzamb.—Mat. 2:19-22; 13:55; Luka 2:39, 52.
Chimeken anch Josef wafa kurutu kwa Yesu kufungul njil ya kuya mwiur. Komb Josef akumuvumbul panap pa divu. Antu avud akwikal ni dilau dia kumanijan nend ni kwilej yom yivud kusutin ndiy piur pa mayingishin mamubachika ndiy ni Mariy kushal ku Betlehem kupwa kwa Yesu kuvadik.